ރަމަޟާން ކްރިކެޓް ކާނިވަލުގެ ކޮމްޕެނީ ޓޭޕް ބޯލް މުބާރާތުގެ ކުޅުން ފަށައިފިއެވެ.
މި މުބާރާތުގެ ކުޅުން އެކުވެނި ކްރިކެޓް ދަނޑުގައި ކުރިއަށްދާއިރު، 14 ޓީމެއް ވަނީ މިއަހަރުގެ މުބާރާތުގައި ބައިވެރިވެފައެވެ. މުބާރާތުގެ ކުޅުން ކުރިޔަށްދާނީ ތިން ގްރޫޕަކަށް ބަހާލައިގެންނެވެ. މުބާރާތުގެ ސެމީ ފައިނަލަށް ދާނީ ކޮންމެ ގްރޫޕަކުންވެސް އެންމެ މޮޅު ޓީމެވެ. ސެމީގެ ފަހު ޖާގަ ލިބޭނީ ތިން ގުރޫޕުން އެންމެ ގިނަ ޕޮއިންޓް ހޯދާފައިވާ ހަތަރުވަނަ ޓީމަށެވެ.
މި މުބާރާތުގައި ކުޅުނު ފުރަތަމަ މެޗުގައި ބައްދަލުކޮށްފައިވަނީ ގްރޫޕް އޭގައި ހިމެނޭ އެމްޓީސީސީގެ ބީ ޓީމާއި އެމްޑަބްލިޔުއެސްސީއެވެ. މި މެޗު 11 ލަނޑުން ކާމިޔާބުކުރީ އެމްޓީސީސީގެ ބީ ޓީމުންނެވެ. މި މެޗުގެ ގުރު ދިމާވުމުން އެމްޓީސީސީ ބީ ކުޅެން އަރައި އަށް އޯވަރު ހަމަވިއިރު ހަ ކުޅުންތެރިން ނުބައިވެގެން ވަނީ 103 ލަނޑު ހަދާފައެވެ. ޖަވާބުގައި އެމްޑަބްލިޔުއެސްސީ ކުޅެން އަރައި އަށް އޯވަރު ހަމަވިއިރު ހެދިފައިވަނީ 92 ލަނޑެވެ.
މުބާރާތުގެ ދެވަނަ މެޗުން ޖޯލީ ބޯއިސް ވަނީ ކޮންޓެކް އަތުން 62 ލަނޑުން މޮޅުވެފައެވެ. މި މެޗުގެ ގުރު ދިމާވުމުން ޖޯލީ ބޯއިސް ކުޅެން އަރައި އަށް އޯވަރު ހަމަވިއިރު އެއްވެސް ކުޅުންތެރިއެއް ނުބައިނުވެ ވަނީ 150 ލަނޑު ހަދާފައެވެ. ޖަވާބުގައި ކޮންޓެކް ކުޅެން އަރައި އަށް އޯވަރު ހަމަވިއިރު އެންމެ ކުޅުންތެރިއެއް ނުބައިވެގެން ހެދިފައިވަނީ 88 ލަނޑެވެ.
ކްރިކެޓް ކާނިވަލަކީ ރަމަޟާން މަހުގައި ކުރިއަށްގެންދާ ކުޅިވަރުގެ އެންމެ ބޮޑު އެއް ހަރަކާތެވެ. އެގޮތުން މި ކާނިވަލުގައި ތިން މުބާރާތެއް ކުޅެއެވެ. އެއީ އޯޕަން ޓޭޕް ބޯލް ކްރިކެޓް މުބާރާތާއި، ކުންފުނިތަކަށް ހުޅުވާލައިގެން ބާއްވާ ކޮމްޕެނީ ޓޭޕް ބޯލް ކްރިކެޓް މުބާރާތާއި، ސަރުކާރު އޮފީސްތަކުގެ މެދުގައި ބާއްވާ އޮފީސް ޓޭޕް ބޯލް ކްރިކެޓް މުބާރާތެވެ.
