ދުނިޔޭގައި ފުރަތަމަ ފަހަރަށް، ޖަނަވާރުތަކަށް ޚާއްސަ ކޯވިޑް19 ވެކްސިން ރަޝިއާއިން އުފައްދައިފި ކަމަށް، އެގައުމުގެ ދަނޑުވެރިކަމާބެހޭ ކަންކަން ބަލައްހައްޓާ އިދާރާއިން ހާމަ ކޮށްފިއެވެ. ރަޝިއާއިިން އުފައްދާފައިވަނީ، މި ވެކްސިން ފުރަތަމަ ބެޗްގައި، 17،000 ޑޯޒްގެ ވެކްސިނެވެ.
ރަޝިއާއިން، 'ކާނިވެކް-ކޯވް' ވެކްސިން ފުރަތަމަ ފަހަރަށް ރަޖިސްޓަރ ކޮށްފައި މިވަނީ، މިއަހަރުގެ މާރޗްމަހު ހެދިފައިވާ ތަހުލީލުތަކުން، މި ވެކްސިން ޖެހުމުން ކުއްތާއާއި، ބުޅަލާއި އަދި ހިޔަޅުގެ ހަށިގަޑުގައި ކޮރޯނާ ވައިރަހާ ދެކޮޅަށް ހަގުރާމަ ކުރާ އެންޓިބޮޑީސް އުފައްދާކަމަށް ދައްކާފައި ވުމާއި ގުޅިގެންނެވެ.
މި ވެކްސިންގެ ފުރަތަމަ ބެޗް، ވަރަށް އަހަވަށް ރަޝިއާގެ އެކި ރީޖަންތަކަށް ސަޕްލައި ކުރުމަށް ހަމަޖެހިފައިވާ ކަމަށް، ދަނޑުވެރިކަމާ ބެހޭ އެންމެހާ ކަންކަންބަލަހައްޓާ ރަޝިއާގެ މުވައްސަސާކަމުގައިވާ، ރޮއްސެލްޚޮޒްނަޑްޒޯރ އިން ނެރުނު ބަޔާނެއްގައި ބުނެފައި ވެއެވެ.
އެ ބަޔާނުގައި އިތުރަށް ބުނެފައިވާ ގޮތުންގައި، ޖާމަނީ، ގްރީސް، ޕޮލޭންޑް، އޮސްޓްރިއާ، ކަޒަކިސްތޏް، ތަޖިކިސްތާން، މެލޭޝިއާ، ތައިލޭނޑް، ދެކުނު ކޮރެއާ، ލުބުނާން، އިރާން އަދި އާޖެންޓީނާއިން މިހާރުވެސް މި ވެކްސިން ހޯދުމަށް ޝައުގުވެރިކަން ފާޅު ކޮށްފައިވާ ކަމުގައެވެ.
ދުނިޔޭގެ ސިއްހަތު ޖަމިއްޔާއިންވަނީ، ކޮރޯނާ ވައިރަސް އިންސާނުންނާއި ޖަނަވާރުތަކާ ދެމެދު ފެތުރެން ފަށާފާނެކަމުގެ ރިސްކު ވަރަަށް ބޮޑަށް އޮތް ކަމަށް ބުނެފައެވެ.
އެހެންނަމަވެސް، ރަޝިއާގެ ވެކްސިންގެ ކަންކަން ބަލަހައްޓާ ފަރާތުން ބުނެފައިވަނީ، މި ވެކްސިން އަމާޒު ކުރެވޭނީ، ނެތި ދިއުމުގެ ނުރައްކާތެރިކަމާ ކުރިމަތިލާން ޖެހިފައިވާ ޖަނަވާރުތަކަށް ކަމަށާއި، އަދި އަނެއް މަގުސަދަކީ، ޖަނަވާރުތަކުގެ ގައިން، ވައިރަސް މިއުޓޭތް ވެގެން ދިއުމުގެ ފުރުސަތު ކުޑަކުރުމެވެ.
"ގާތްގަޑަކަށް 20 ވަރަކަށް ޖަމާޢަތަކުން ވަނީ، މިހާރުވެސް އެ ޖަމާއަތްތައް ނިސްބަތްވާ ގައުމުތަކަށް މި ވެކްސިން އެތެރެ ކުރުމާބެހޭ މަޝްވަރާތައް ކުރުމަށް ވަނީ ތައްޔާރު ވެފަ،" ރަޝިއާގެ ދަނޑުވެރިކަމާބެހޭ ކަންކަން ބަލަހައްޓާ މުވައްސަސާއިން ބުނެފައިވެއެވެ.
