އިންޑިއާގައި އާދަޔާޚިލާފަށް ބާރުމިނުގައި ފެތުރެމުންދާ ކޯވިޑް19ގެ ޝިކާރައަކަށްވެ، ބޮޑުވަޒީރު ނަރެންދުރަ މޯޑީގެ ބޮޑު ދައިތަ ނިޔާ ވެއްޖެއެވެ.
މޯޑީގެ އާއިލާއާ ހަވާލާދީ، އިންޑިއާގެ ޕްރެސް ޓްރަސްޓް އޮފް އިންޑިއާ (PTI) ނިއުސް އޭޖެންސީން ރިޕޯޓު ކޮށްފައިވާ ގޮތުގައި، ނަރުމަދަބެން މޯޑީ ކޯވިޑް19އަށް ޕޮޒިޓިވް ވެގެން ނިޔާވެފައިވަނީ، މި ހަފްތާގެ އަންގާރަ ދުވަހުއެވެ.
(PTI) ނޫސް އޭޖެންސީން މައުލޫމާތު ދީފައިވާ ގޮތުގައި، އުމުރުން 80 އަހަރުގެ ނަރުމަދަބެން މޯޑީ ނިޔާވިއިރު ގެންދިޔައީ ހޮސްޕިޓަލުގައި ކޯވިޑް ބައްޔަށް ފަރުވާ ހޯއްދަވަމުންނެވެ.
"އަހަރުމެންގެ ބޮޑު ދައިތަ ނަރުމަދަބެން ކޯވިޑަށް ޕޮޒިޓިވްވެ ހާލު ދެރަވުމުގެ ސަބަބުން އަމިއްލަ ހޮސްޕިޓަލެއްގައި ފަރުވާ ދެމުން ދާތާ 10 ވަރަކަށް ދުވަސް ވަނީ ވެފަ،" އިންޑިއާގެ ބޮޑުވަޒީރުގެ ކޮއްކޮ ޕްރަހްލާޑް މޯޑީ އާއި ހަވާލާދީ (PTI) ނިއުސް އޭޖެންސީން ރިޕޯޓު ކޮށްފައި ވެއެވެ.
"ބޮޑު ދައިތަ ވަނީ ހޮސްޕިޓަލުގައި މިއަދު، އެންމެ ފަހުގެ ނޭވާ ދޫކޮށްފައި،" އޭނާ ވިދާޅުވެފައި ވެއެވެ.
ބޮޑު ދައިތަ ކޯވިޑް ބަލީގައި ނިޔާވުމާއި ގުޅިގެން، އިންޑިއާގެ ބޮޑުވަޒީރު ނަރެންދުރަ މޯޑީ އަދި އެއްވެސް ކޮމެންޓެއް ކޮށްފައި ނުވި ނަމަވެސް، އިންޑިއާގައި ވަރުގަދަޔަށް ހާލަތު ގޯސްވަމުންދާ ކޯވިޑް ކާރިސާ މޯޑީގެ ސަރުކާރުން މެނޭޖު ކުރަމުންދާ ގޮތާއި ގުޅޭގޮތުން އޭނާއަށްވަނީ ބޮޑެތި ފާޑު ކިއުންތަކެއް އަމާޒު ވެފައެވެ.
ވަރަށް ފަހަކާ ޖެހެންދެން، އިންޑިއާގައި ކޯވިޑް ހާލަތު ގޯސްވަމުން ދިޔަނަމަވެސް، ބޭއްވުމަށް ހަމަޖެހިފައިވާ މުނިސިޕަލް ކައުންސިލްތަކަށް ކެމްޕޭން ކުރުމަށްޓަކާ، މޯޑިގެ ބީޖޭޕީން ޕާޓީންވަނީ ބޮޑެތި އެއްވުންތައ އިންޑިއާގެ އެކި ކަންކޮޅުތަކުގައި ބާއްވަމުން ގެންގޮސްފައެވެ. މިގޮތުން ބޭއްވުނު ބޮޑެތި ބައެއް އެއްވުންތަކަށް މީހުން ހާޒިރު ވެފައިވަނީ، މާސްކުވެސް އެޅުމެއް ނެތިއެވެ. މީގެ ބައެއް އެއްވުންތަކުގައި ބޮޑުވަޒީރު މޯޑީވެސްވަނީ ބައިވެރި ވެވަޑައިގެންފައެވެ.
މިމަހުގެ ކުރީކޮޅު، ކުރިމަތިވަމުން އައި ކޯވިޑް ކާރިސާގެ ކަންކަން ބެލެހެއްޓުމުގައި ސަރުކާރުން އަަމަލް ކުރުންދާ ގޮތްތަކާ ގުޅުންހުރި އެއްތައް ސަތޭކަ ޕޯސްޓެއް ޓުވިޓަރ އަދި ފޭސް ބުކްއިން ނައްތާލުމަށް މޯޑީގެ ސަރުކާރުން ވަނީ މަސައްކަތް ކޮށްފައެވެ.
މި ހަފްތާގެ އަންގާރަ ދުވަހު އެކަނިވެސް، ކޯވިޑް19ގައި އިންޑިއާގައި ވަނީ 3,293 މީހުން މަރުވެފައެވެ. މިއީ ކޯވިޑް ފެތުރެން ފެށިފަހުން ރެކޯޑް އަދަދަކަށް އެގައުމުގައި މީހުން މަރުވި ދުވަހެވެ. މިހާތަނަށް އިންޑިއާގައި ކޯވިޑްބަލީގައި 200،000 މީހުން ވަނީ މަރުވެފައެވެ.
ސިއްޙި އިދާރާތަކުން މައުލޫމާތު ދީފައިވާގޮތުގައި އަންގާ ދުވަހު އެކަނިވެސް 360,960 މީހުންވަނީ އަލަށް ކޯވިޑް19އަށް ޕޮޒިޓިވް ވެފައެވެ. މިއީ ޖެހިޖެހިގެން 300،000 އަށްވުރެ ގިނަ މީހުން ކޮންމެ ދުވަހަކުވެސް ޕޮޒިޓިވް ވަމުންދާ 7 ވަނައަށް ވީދުވަހެވެ.
