ލީގު ކަޕްގެ ޗެމްޕިއަންކަން ސިޓީން ހޯދައިފި

ޓޮޓެންހަމް ބަލިކޮށް މެންޗެސްޓާ ސިޓީން ޖެހިޖެހިގެން ހަތަރުވަނަ ފަހަރަށް އިނގިރޭސި ލީގު ކަޕް ކާމިޔާބުކޮށްފިއެވެ.

ވެމްބްލީ ސްޓޭޑިއަމްގައި ކުޅުނު މި މެޗު ސިޓީން ކާމިޔާބުކުރީ 0-1 ގެ ނަތީޖާއަކުންނެވެ. މި މެޗު ބެލުމަށް އިނގިރޭސި އެފްއޭއިން ވަނީ މި މެޗު ބަލަން 8،000 ސަޕޯޓަރުން ދަނޑަށް ވައްދާފައެވެ.

ސިޓީން މި މުބާރާތް ކާމިޔާބުކުރުމާއި ގުޅިގެން އެޓީމު ވަނީ މި މުބާރާތް އެންމެ ގިނައިން ކާމިޔާބުކުރި ލިވަޕޫލުން ހަދާފައިވާ ރެކޯޑާ އަރާ ހަމަކޮށްފައެވެ. ލިވަޕޫލާއި ސިޓީން ވަނީ އަށް ފަހަރު މި މުބާރާތް ކާމިޔާބުކޮށްފައެވެ.

މި މެޗުގައި ސިޓީން ޖެހި ހަމައެކަނި ލަނޑު އެޓީމުން ޖަހާފައިވަނީ މެޗުގެ 82 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ފްރާންސްގެ ޑިފެންޑަރު އައިމެރިކް ލަޕޯޓް އެވެ.

މި މޮޅާއެކު ޖެހިޖެހިގެން ހަތަރުވަނަ ފަހަރަށް ސިޓީން ލީގު ކަޕުގެ ޗެމްޕިއަންކަން ހޯދިއިރު، މިއީ ސިޓީގެ ކޯޗު ޕެޕް ގާޑިއޯލާގެ ކޯޗިން ކެރިއަރުގައި އޭނާ ހާސިލުކުރި 30 ވަނަ ޓްރޮފީއެވެ.

ސިޓީއަށް ސީޒަނުގައި އަދި 2 މުބާރާތެއް ކާމިޔާބުކުރުމުގެ ފުރުޞަތު އެބައޮތެވެ. އެގޮތުން އިނގިރޭސި ޕްރިމިއަރ ލީގުގެ ޗެމްޕިއަންކަން ކަށަވަރުކުރުމާއި ގާތަށް ސިޓީ ޖެހިލާފައިވާއިރު، ޔުއެފާ ޗެމްޕިއަންސް ލީގުގައި އެޓީމު މިވަގުތު އޮތީ ސެމީ ފައިނަލުގައެވެ. ސެމީ ފައިނަލުގެ ފުރަތަމަ ލެގުގައި މި ހަފްތާ ސިޓީ ނުކުންނާނީ ޗެމްޕިއަންސް ލީގުގެ އެންމެ ކާމިޔާބު ޓީމު ރެއާލް މެޑްރިޑާ ދެކޮޅަށެވެ.