ތުނިތުނިކޮށް ވެހެމުން ދިޔަ ވާރޭގެ ތެރޭގައި ހަސަނު ހިނގަމުން ދިޔައެވެ. އޭނާގެ މިސްރާބު ހުރީ އޭނާގެ ގެއާއި ދިމާއަށެވެ. އިރާކޮޅުގެ ވަގުތު ނަމަވެސް މުޅިރަށްވަނީ ނިދައި ހަމަހިމޭން ވެފައެވެ. ގަސްގަހުގައި ވައިއެޅުމުން އިވޭ އަޑާއި ވާރޭގެ އަޑު ފިޔަވައި އެހެން އަޑެއް ނުއިވެއެވެ. ގޭގޭގެ ފުޅިބައްތިތަކުން މަގުމައްޗަށްހުރި އަލިކަމެއް ފިޔަވައި މުޅިރަށުގެ ތެރޭގައިވެސްވަނީ ކަނު އަނދިރިކަމެވެ.

އުންމީދު ގެއްލި މާޔޫސްވެފައިވާ ހަސަނު ވާރޭ ތެރޭގައި ހިނގަމުންދިޔައީ އާވާރާއެއް ފަދައިންނެވެ. ވެހެމުންދިޔަ ހިމަފޮދުވާރޭގެ ތެރޭގައިވެސް އޭނާ ތެމި ފޯވެއްޖެއެވެ. ލައިގެން ހުރި ގަންޖުފަރާހާއި މުންޑުވެސް މެއެވެ. ބޮލުގެ އިސްތަށިގަނޑުގެތެރެއިން ފޭދިގެން މޫނުމައްޗަށް ފައިބާފެން ހަސަނު އިރު އިރުކޮޅާ ފުހެލައެވެ.

ދެލޮލުގެ ފެނުން ގެއްލިދާ ފަދަ ގަދަ ވިދުވަރާއި އެކު ޖަހާލި ހޮނު ގުގުރީގެ އަޑުން ބިންގަނޑު ތުރުތުރުއަޅައިގަތެވެ. ގުގުރީގެ އަޑު ފަޅައިގަތުމުގެ ކުރިން އަލިނަރެއްހެން ފޭބި ހޮނު ޖެހުނީ ސީދާ ހަސަނުގެ ބޮލުގައެވެ. ހަމަވަގުތުން އޭނާ ވެއްޓުނެވެ. ބޮލުގެ އިސްތަށިގަނޑުބައެއް އެނދިއެވެ. ހަސަނުވެއްޓުނީ މަގުމަތީގައި ހެދިފައި އޮތް ކިލާފެންގަނޑުގެ ތެރެއަށެވެ. މިނެޓެއްވެސް ނުވަނީސް އޭނާ ތެދުވެ ހިނގައި ގެންފިއެވެ. ބޮލުގައި އަތް އުނގުޅަމުންނެވެ. ގަނެފައި ހުރި ބިރާއި އެކު އޭނާއަށް ކޮޅަށްވެސް ހުރެވޭ ވަރެއް ނޫނެވެ.

އަރި އަރި އަޅަމުން އަނެއްކާވެސް މަގުގެ މެދުން ހަސަނު ހިނގަންފެށިއެވެ. މަގުމެދުން އޭނާ ހިނގަމުންދިޔައީ ވިއްސާރަވެފައި ވިދާ ގުގުރާއިރު ރުއް ގަސްދަށުން ހިނގަން ނުވާނެ ކަމަށް މުސްކުޅިން ބުނާތީއެވެ. އެވާހަކަ ހަސަނުވެސް ޤަބޫލު ކުރާތީއެވެ. މުސްކުޅިން އެހެން ބުނެ އުޅެނީ ވިދާ ގުގުރާއިރު ހޮނުއަޅަނީ ގިނައިން ރުއްގަހަށް ކަމުގައި ވާތީއެވެ.

ވާރޭގެ ތިކިތައް ހަސަނުގެ ގައިގައި ބީހެމުން ދިޔައިރު އޭނާގެ ކަނދުރާމައްޗަށްވެސްދިޔައީ ދިލަހޫނެއް ވަމުންނެވެ. އަތްޖައްސާލުމާއި އެކު ހަސަނަށް ހީވީ ރޯފާރުގަނޑެއްގައި ލޮނު މިރުސް އެޅިހެންނެވެ. ނަގައިގަތް ދިލައިން އޭނާއަށް ޞުބުޙާނަށްﷲ އޭ ބުނެވުނެވެ. ދެވަނަ ފަހަރަށް ވިދާލި  ކުރިއަށް  ވުރެވެސް ގަދަ ވިދުވަރާއި އެކު އަނެއްކާވެސް އުދަރެހުން ފައިބައިގެން އައި ވަރުގަދަ ހޮނު އަމާޒުވީ ސީދާ ހަސަނުގެ ބޮލަށާއި މުޅި ގަޔަށެވެ. ލައިގެން ހުރި ގަންޖުފަރާސްވެސް ބުރަކައްޓާއި މޭމަތިން ދިޔައީ އަނދައިގެންނެވެ. އެއާއިކު އަނެއްކާވެސް ހަސަނުވެއްޓުނީ ކިލާފެންގަނޑުތެރެއަށެވެ. އެކަމަކު މިފަހަރު އޭނާ ވެއްޓުނީ އުއްޑުންނެވެ.

ޖަހާލި ބާރު ގުގުރިއާއި އެކު ބިންގަނޑު ގުޑައިގެން ދިޔައިރު ފެންގަނޑުތެރެއަށް ވެއްޓިފައި އޮތް ހަސަނަށް އެއިހްސާސްވެސް ކުރެވުނެވެ. އޭނާގެ ލޮލަށް ކަޅު އަނދިރިކަން ފިޔަވައި އެހެން އެއްވެސް އެއްޗެއް ނުފެނެއެވެ. ވާރޭ ބޯކޮށްލުމުން ހަސަނު ލޯމަރައި ތަގުޅި ކޮއްލީ ވާރޭގެ ތިކިތައް ލޮލަށް ޖެހެމުންދިޔަތީއެވެ.

ފެންގަނޑުގެ ތެރޭގައި އޮތް ހަސަނުގެ ނޭވާ ދިޔައީ ކުރުވަމުންނެވެ. ހިތުގެ ވިންދު ދިޔައީ އަވަސްވަމުންނެވެ. އޭނާ އެހާލުގައި އޮތްކަން ދެނަހުރި އެކަކުވެސް ނެތެވެ. ވިއްސާރަ ރެއަކަށްވެފައި އިރާކޮޅުގެ ވަގުތުތައް ފަހަނަ އަޅައިދާއިރު މީހުންތައް ގެއަށްވަދެ ނިދައިފިއެވެ. އެހެންކަމުން ހަސަނުގެ ހާލު ދެކޭނޭ އަދި ފެންނާނެ މީހަކު ނެތީއެވެ.

ނޭވާ އުފުރެމުން މަރުގެ ސަކަރާތުގެ ތެރޭގައި އެއްފައިމައްޗަށް އަނެއްފައި ލެވެމުން ދިޔައިރު ހަސަނަށް ދިޔައީ އޭނާގެ ފާފަތަކަށް އިޤުރާރުވެވެމުންނެވެ. އޭނާގެ ނުބައިކަމާއި ރަހުމެއް ނެތްކަން ދުނިޔެ ނުދަތަސް ކަށަކުޅަދުންވަންތަ އިލާހު އެކަން ދެކެ ދެނެވޮޑިގެންވެއެވެ. ޝަހާދަތް ކިޔޭތޯވެސް ހަސަނު އުޅެއެވެ. އެކަމަކު އޭނާގެ ދޫ އޮޅެނީއެވެ. ހަނދާން ނުވަނީއެވެ. މަރުވަނީކަން އެނގި އިހްސާސްވަމުންދާއިރު އޭނާއަށްޓަކައި ތައުބާގެ ދޮރުކޮޅުވެސް ބަންދު ވެއްޖެކަމާއި ވައިނޮޅީގެ ކަށިގަނޑާއި ހަމައަށް ފުރާނަ ފޯރައްޖެކަމުގައިވެސް އޭނާގެ ޟަމީރު އޭނާއަށް ބުނެދެމުން ދަނީއެވެ.

ހަށިގަނޑުގައި އަޅަމުންދިޔަ ވޭނާއި އެކު މަރަށް ހާޟިރުވެފައި އޮތް އިރުވެސް ހަސަނަށް ފެންނަމުންދަނީ އަނބިމީހާ ޒަރީނާއާއި މައުސޫމު ހަތަރު ދަރީންގެ މޫނެވެ. ހުދުކަފުނުގައި އެމީހުން ތިބީ ހަސަނުވަށާލައިގެންނެވެ. އެހީވާކަށް ނޫނެވެ. ހަސަނުގެ ނުބައިކަމާއި ރަހުމެއް ނެތްކަމުގެ މައްޗަށް ލަޢުނަތް ދޭށެވެ.

ހަސަނަކީ އޭނާގެ އަނބިމީހާއާއި ހަތަރު ދަރީންގެ ޤާޠިލެވެ. އެކަމަކު ދުނިޔެ އެކަމެއް ނުދަނެއެވެ. އެކަން ސިއްރުވެފައި އޮތީއެވެ. ހަސަނުގެ މައްޗަށް މީހަކު ޝައްކެއްވެސް ނުކުރާތީ އަދި އެމަންޒަރު ފެނުނު ދޮށީދަރިފުޅު އައިމިނަ ޝޮކެއް ޖެހި ވާހަކަނުދެއްކިފައި ހުންނާތީ ހަސަނު ދުނިޔެއަށް ބޭޒާރުކޮށްލެވޭނެ ވަރުގެ އިންސާނަކު ނެތެވެ.

ހިތާވެގެން އުޅުނު އަންހެނަކު ބުނި ދެރަބަހަކަށް ހަސަނު އޭނާގެ އަންހެނުންނާއި ފަސްދަރީން މަރާލަން ޒަހަރުލީއެވެ. ބަތް ތަވައަށް ޒަހަރު އެޅީއެވެ. ފުރަތަމަ ދުވަހު އަންހެނުން ޒަރީނާއަށް ބަތްތަވާގައި އާދަޔާ ޚިލާފް ކުލައެއް ހުރިކަން ފާހަގަވެގެން އުކާލީއެވެ. ދެވަނަ ދުވަހުވެސް ހަސަނު ބަތް ތަވައަށް ޒަހަރު އެޅިއެވެ. އެ ދެދުވަހުވެސް ބައްޕަ ބަދިގެއަށް ވަދެ އަޅި އުނދުންމައްޗަށް އުދާފައި ހުރި ބަތްތަވައަށް ބިއްލޫރި ކުޑަފުޅިއަކުން އެއްޗެއް އަޅާތީ ހަސަނާއި ޒަރީނާގެ ދޮށީ ދަރި އުމުރުން ދިހަ އަހަރުގެ އައިމިނައަށް ފެނުނެވެ. އެކަމަކު އެޅަ ސިކުނޑިއަށް ބަތްތަވައަށް އަރާކުލައާއި ބައްޕަ އެކުރާ ކަމަކާއި ގުޅޭ ކަމުގެ ވިސްނުމެއް ނައެވެ.

ބަތްތަވާގައި އާދަޔާ ޚިލާފު ރަތް ފާޑެއްގެ ކުލައެއް ހިފާފައި ހުންނާތީ ދެދުވަހުވެސް ޒަރީނާ ބަތްތަވާ އެކަކަށްވެސް ކާންނުދީ އުކާލީއެވެ. އެކަމަކު ދެވަނަ ދުވަހު އޭނާ ގޮނޑުދޮށަށް އަޅާލި އެބަތްތަވާގައި ހުރި ބަތްކޭ ކާޅުތައް ނުއުދުހެވި ގޮނޑުދޮށަށް ވެއްޓި މަރުވާތީ އޭގައި ގޯހެއް އުޅޭކަން ވިސްނިގެން ޒަރީނާ ގެއަށް އައީ ބަތްކައްކާ ތެލިވެސް މޫދަށް އެއްލާލައި އޮޔަށް ދޫކޮށްލާފައެވެ. އެއީ ތެލީގެ ސަބަބުން ވާކަމެއް ކަމުގައިވެސް ހީވެގެންނެވެ.

ޖެހިޖެހިގެން ދެދުވަހު ކެއްކި ބަތްތަވާވެސް އުކާލަން ޖެހުމުން އަނެއްދުވަހު ޒަރީނާ ކެއްކީ ކަށިކޭލު ބަތްޕެނެވެ. އެއީ ޒަރީނާއާއި ކުދިންގެ ނިމުން އައިދުވަހެވެ. ހަސަނުގެ ރޭވުން ކާމިޔާބުވި ދުވަހެވެ. ތަޤުދީރުގައި ލިޔެވިގެންވީ ގޮތަށް ހަސަނުގެ ގެއިން ފަސް ސަންދޯއް ނެރުނު ދުވަހެވެ.

އެދުވަހު ޒަރީނާ ހުރިހާ ކުދިން ގޮވައިގެން ބަތްޕެން ކެކުމުން ކާން އިށީނީ ގޭގެ މެދުގޭ ތެރޭ ކުނާ އަޅައިގެންނެވެ. ގޭގައި ގޮދަންފުށްކޮޅެއް ނެތުމުން މެންދުރުވާން އުޅެނިކޮށް ކަށިކޭލު ބަތްޕެއް ކެއްކުނު އިރު ކުދީންވެސް ތިބީ ހައިވެފައެވެ. އެހެންކަމުން ތަށިތައްޓަށް ބަތްޕެން އަޅައި ހުރިހާ ކުދީންނާއި އެކު ޒަރީނާވެސް ކާން އިށީނެވެ. ދޮށީދަރިފުޅު އައިމިނަގެ އުމުރު ދިގުވެފައި އޭނާގެ ނަޞީބުގައި ތަން ހުރީތީ، އޭނާގެ ބަތްޕެން ތައްޓަށް ހަކުރު އަޅަންވާއިރަށް ލާހިން ހަކުރު ހުސްވެއްޖެއެވެ. އެހެންކަމުން ގެރިކިރު ދަޅުން ހަދާފައި ލާހި ހިފައިގެން އައިމިނަ ދިޔައީ ބަދިގޭގައި ހުރި  ހަކުރު ޑަބިޔަލުން ހަކުރު ނަގާށެވެ.

ޒަރީނާއާއި ކުދިންނަށްވެސް ކެވުނީ ކުޑައެތިކޮޅެކެވެ. އެނބުރުން އަރަން ފަށައިފިއެވެ. ފާޑެއްގެ ގޮތެއްވާން ފަށައިފިއެވެ. އެންމެ ފުރަތަމަ ވެއްޓުނީ ހަތަރު އަހަރުގެ ދަރިފުޅެވެ. ދެންތިބި ކުދިންވެސް ބޯ އަނބުރަނީއޭ ބުނި އިރު ޒަރީނާވެސް އިނީ ބޯބަރުވެފައެވެ. އޭނާއަކަށް މާބޮޑު ހަރަކާތެއް ނުކުރެވުނެއެވެ. ތަޅުން މައްޗަށް އޭނާވެސް ވެއްޓިއްޖެއެވެ. ލޮލުގެ ކުރިމަތީގައި ހަތަރު ކުދީން ވެއްޓި މަރަށް ތެޅެމުން ދިޔަ މަންޒަރު ޒަރީނާއަށް ފެނުނެވެ. މައިލަގޮނޑިއަކަށް ކެތެއް ނުވިއެވެ. އޭނާވެސް ތެދުވެ ވޭތޯ މަސައްކަތް ކުރަމުން ދިޔައެވެ. އެންމެ ގާތުގައި އޮތް ފަސް އަހަރުގެ ފިރިހެން ދަރިފުޅުގެ އަތުގައި ހިފައި ގާތަށް ގެނެވޭތޯ އުޅުނެވެ. ހަޅޭލެވޭތޯ އަޑު ބޭރުވޭތޯވެސް އުޅުނެވެ. ޒަރީނާގެ ހަށިގަނޑާއި ފުރާނަ ވަކިވަމުން ދިޔައިރު އޭނާގެ ލޮލުން ދިޔައީ ކަރުނަ އޮހެމުންނެވެ. ހަށިގަނޑުގައި އަޅާވޭނަކުންނެވެ. ދަރީންނަށްޓަކައެވެ. އެވަގުތު ގޭގެ ދޮރުމައްޗަށް ހުއްޓުނު ހަސަނުވެސް ޒަރީނާއަށް ފެނުނެވެ. އެހީއަށް އެދި އޭނާ އަތްވެސް ދިއްކޮށްލިއެވެ. އެކަމަކު އަޅާވެސް ނުލައި ހަސަނު އެނބުރި ދިޔައީއެވެ.

އެތައް ވަރަކުން އައިމިނަ ޑަބިޔާގެ މަތި ނެގި އިރު ހަކުރު ޑަބިޔާހުރީ ހުހަށެވެ. އެހެން ކަމުން ކުޑަކުޑަ އައިމިނަ ލާހިދަޅު ހިފައިގެން ދިޔައީ ޖެހިގެން ހުރި ބަކުރުބޭ ގެއަށެވެ. ހަކުރުކޮޅެއް ހޯދާށެވެ. އޭރު އޭނާގެ މަންމައާއި ހަތަރު ކޮއްކޮ ދިޔައީ މަރަށް ތެޅެމުންނެވެ. ވަރުގަދަ ޒަހަރާއި އެކު އެހަތަރު މައިންގެ އެތެރެހަށީގެ ގުނަވަންތައް ދިޔައީ ކެނޑި ބުރިބުރި ވަމުންނެވެ.

ޖެހިގެން ހުރި ބަކުރުބޭގެއިން ހަކުރު ކޮޅެއް ހިފައިގެން އައިމިނަ އައިސް ގޯތިތެރެއަށް ވަތްއިރު ބައްޕަ ބަދިގޭތެރެއިން ނުކުމެގެން ދަނިކޮށް އައިމިނައަށް ފެނުނެވެ. އޭނާ ބައްޕައަށް ގޮވާވެސް ލިއެވެ. އެކަމަކު އަޑު ނުއިވުނީކަންނޭނގެއެވެ. ހަސަނުގޮސްވަނީ ގިފިއްޔަށެވެ.

އައިމިނައަށް ގޭދޮރުމައްޗަށް އެރެވުމާއި އެކު އަޑުގެ ކޮޅަށް ލަވައިގަނެވުނީ ހަޅޭކެވެ. އެންމެ ފަހުނޭވާ ގުނަމުންދާ މަންމަ އޭރުވެސް ފަހަރަކު ކުއްޖަކު ގާތަށް ގެނެވޭތޯ އުޅެއެވެ. އައިމިނަ އަތުން ހަކުރު ލާހިވެއްޓި އޮޅިމަތީގައި ޖެހުމާއި އެކު ވިއްސައިގެން އައި ހަކުރުފުއްތަށް އެޅުނީ އައިމިނަގެ ލޮލަށެވެ. އެވަގުތު ޒަރީނާ އޭނާގެ ފަހުނޭވާ ދޫކޮށްފިއެވެ.

އައިމިނަގެ ހަޅޭކާއި ރުއިމުގެ އަޑަށް އެންމެ ފުރަތަމަ އެގެއަށް އައީ ބަކުރުބޭގެ ދެމަފިރީންނެވެ. ގިފިލިތެރޭ އުޅެފައި ހަސަނުވެސް އައީ އޭގެ ފަހުންނެވެ. މީހުންތައް ޖަމާވެއްޖެއެވެ. ސިއްޚީ ޚިދުމަތްދޭ ތަނެއް ނެތް ޒަމާނެއް ކަމުގައި ވުމުން ދެން ހެދޭނެ ގޮތެއް ނެތެވެ. އެއްފަހަރާ ފަސްފުރާނަ ދުނިޔެއިން ވަކިވީއެވެ.

ޒަރީނާއާއި ކުދީންނަށް ކެވުނީ ޒަހަރެއްކަން ރަށުގެ ރައްޔިތުންނަށްވެސް އެނގެއެވެ. އެމީހުންގެ ލޮލުގައި އަނދުން އެޅުވުމަށްޓަކައި ބަތްޕެންކެއްކި ތެއްޔަށް މަރާފައި ނަންނުގައްޗެއްލީ ހަސަނެވެ. އެއީ އޭރުން މީހުން ހީކުރާނީ ކުދިންނާއި އަނބިމީހާ މަރުވީ އޭގެވިހައިގެ ސަބަބުން ކަމަށާއި އަދި އެއީ މީހެއްގެ ރޭވުމެއް ނެތް ހާދިސާއެއްކަމުގައި ކަން މީހުންނަށް ވިސްނައި ދިނުމަށްޓަކައެވެ.

ހަސަނުގެ ހަތަރުދަރީންނާއި އަނބިމީހާ މަރުވިތާ މިއީ ހަތްވަނަ ދުވަހުގެ ރެއެވެ. ހަސަނު އެއައީ ހަސަނާއި އިންނާނީ އޭނާގެ ފަސްދަރީންނާއި އަނބިމީހާ މަރާލުމުން ކަމަށްބުނި އަޒީޒާގެ ގެއިންނެވެ. އެކަން ހިނގިފަހުން އަޒީޒާވެސް ހުންނަނީ ހަސަނުދެކެ ބިރުންނެވެ. އޭނާ އުޅެނީވެސް ހަސަނަށް ފިލައިގެންނެވެ. އޭނާ ހަސަނާއި ދިމާއަށް އެހެން ބުނީ ކޮންމެހެން ހަސަނުލައްވައި އެވަރުގެ ކަމެއް ކުރުވާކަށް ނޫނެވެ. ހަސަނާއި ނުއިންނާނެކަން ޔަޤީންކޮށްދޭށެވެ. އަދި މިރޭ އިރާކޮޅު ހަސަނު އައިސް އަޒީޒާއާއި ބައްދަލުކުރުމުން އޭނާ ހަސަނާއި ދުވަހަކުވެސް ނުއިންނާނެކަމަށް ބުންޏެވެ. އަދި އެއީ ހާދިސާއެއް ނޫންކަމާއި ހަސަނު ކުރި ކަމެއް ކަމަށް އޭނާއަށް ހީވާކަމުގައިވެސް ބުންޏެވެ.

ހަސަނު ވާރޭތެރޭގައި ގެއަށް ހިނގަމުން އައީ ދެކޮޅުންވެސް ކެހި ލިބުމުގެ ހިތާމައިގައެވެ. ދީވާނާވެ އަމިއްލަ އަތުން އަމިއްލަދިރިއުޅުން ހަލާކުކޮށްލެވުނު ކަމުގެ ހިތާމައިގައެވެ. އޭނާގެ ގަޔަށް ދެފަހަރަށް ހޮނުއެޅީ އެއާވާރާކަމުގައި މަގުމަތީގައި ހިނގަމުން އަންނަނިކޮށެވެ.

ފަތިސްވި އިރުވެސް ފެންގަނޑުގެ ތެރޭގައި ހަސަނު އޮތެވެ. މަރެއްވެސް ނުވެއެވެ. މަރަށް ހާޟިރުވެފައި މަރު ނުވެވިފައި އޮތީއެވެ. ހީވަނީ އޭނާގެ ފާފައިގެ މައްޗަށް ހެކިވާނޭ މީހަކު ނެތި އޭނާގެ ފުރާނަ އެހަށިގަނޑު ދޫކޮށްފައިދާން އިންކާރުކުރަނީ ހެންނެވެ.

ވެއްޓިފައި އޮތް ހަސަނު އެންމެ ފުރަތަމަ ފެނުނީ ފަތިސްނަމާދަށް ދާން ދިޔަ މުދިން ބެއަށެވެ. މުދިންބެގެ ހަޅޭކުގެ އަޑަށް ނުކުތް އަވައްޓެރީން ހަސަނު ނަގައިގަނެގެން ވެއްދީ ޖެހިގެން ހުރި ގެއަށެވެ. އެގޭގެ މެދުގޭ ތެރޭ އެނދެއްގައި ހަސަނު ބޭއްވި އިރުވެސް އޭނާގެ ފުރާނަ ހީވަނީ ހަމަ އެވަކިވަނީ ހެންނެވެ. ހަސަނަށް ޝަހާދަތް ލައިދެވޭތޯ މުދިންބެ އުޅުނެވެ. އެކަމަކު އޭނާ އަށް ހަމައެކަނި ބުނެވުނީ ޒަރީނާއާއި ހަތަރުކުދިން މަރުވީ އޭނާ ޒަހަރުލައިގެން ކަމުގައެވެ. އަދި އޭނާގެ ގަޔަށް މިރޭ ދެފަހަރަށް ހޮނުއެޅީކަމުގައެވެ. އިތުރު ވާހަކައެއް ނުބުނެވުނު ތާނގައި ހެޔޮއެއްޗެއްވެސް ހަސަނަކަށް ނުކިޔުނެވެ. އޭނާގެ ހަށިގަނޑުން ފުރާނަ ނުކުމެގެން ހިނގައްޖެއެވެ.

ޒަރީނާ އާއި ހަތަރު ކުދީންގެ ޤާތިލަކީ ހަސަނުކަން ރަށުގެ އެއްމެންނަށް އެނގިއްޖެއެވެ. އޭނާގެ ނުބައި ނިމުން ރަށުގެ އެންމެން ދެކެފިވެސް މެއެވެ. އެކަމަކު އެވަރުގެ ބޮޑު އަނިޔާއެއް ކުރީ ކީއްވެކަން އެކަކަށްވެސް ވިސްނައެއް ނުގަނެވުނެވެ. އެކަން އެނގޭ މީހަކަށް ހުރީ އަޒިޒާއެވެ. އަމިއްލަ ސަލާމަތަށްޓަކައި އޭނާ އަނގަހިމޭނުންލައިގެން ހުރީއެވެ.

– ނިމުނީ –