ލެސްޓާ ސިޓީ ތިންވަނައިގަ ހަމަޖެހިލައިފި

ވެސްޓް ބްރިމްވިޗް އެލްބިއަން ބަލިކޮށް ލެސްޓަރ ޕޮއިންޓް ތާވަލްގެ ތިންވަނައިގާ ހަތަރު ޕޮއިންޓް ގެ ލީޑެއް ނަގައިފިއެެވެ.

ލެސްޓަރގެ ދަނޑުގައި ކުޅުނު މިމެޗް އެޓީމް ކާމިޔާބުކުރީ 3-0 ލަނޑުނނެވެ. ލެސްޓަރގެ ފަރާތުން މޮޅުކުޅުމެއް ފެނިގެންދިޔަ މިމެޗްގައި އެޓީމްގެ ތިންލަނޑުވެސް ފެނިގެން ގޮސްފައިވަނީ މެޗްގެ ފުރަތަމަ ހާފްގައެެވެ. މިގޮތުން މެޗްގެ ފުރަތަމަ ލަނޑު މެޗްގެ 23 ވަނަ މިނެޓްގައި ޖަހާދީފައިވަނީ ލެސްޓަރގެ ތަޖްރިބާކާރު ފޯވަޑް ޖެމީ ވާޑީއެވެ. އަދި ދެވަނަ ލަނޑު އޭގެ ތިން މިނެޓްފަހުން ޖަހާދިނީ ޖޮނީ އިވާންސްއެވެ. އަދި ފަހު ލަނޑު މެޗްގެ 36 ވަނަ މިނެޓްގައި ޖަހާދިނީ ލެސްޓަރއަށް މިހާރު މޮޅު ކުޅުމެއް ދައްކަދީ މުހިންމު ލަނޑު ތަކެއް ކާމިޔާބުކޮށްދެމުންދާ ކެލޭޗީ އިއަނާޗިއޯއެވެ.

މިމެޗްގައި މީގެއިތުރުންވެސް ލަނޑު ޖަހާނެ ރަނގަޅު ފުރުސަތު ދެޓީމަށްވެސް ލިބިގެން ގޮސްފައިވާކަން ފާހަގަކޮށްލެވެއެެވެ. މިގޮތުން ދެޓީމްގެ ކުޅުންތެރިން ފޮނުވާލި ހަމަލާވެސް ވަނީ ގޯލްގެ ދަނޑިއަށް އަމާޒުވެފައެެވެ. ނަމަވެސް މިމެޗް ނިމިގެންދިޔައީ އިތުރު ލަނޑެއް ދެޓީމުން ކުރެ އެއްވެސް ޓީމަކަށް ކާމިޔާބު ނުކުރެވިއެެވެ.

ލެސްޓަރއަށް މިހާރުވަނީ ކުޅުނު 32 މެޗުން ލިބިފައިވާ 59 ޕޮއިންޓާއެކު ތާވަލްގެ ތިންވަނައިގާ ހަމަޖެހިލާފައެެވެ. އެއީ މިކާމިޔާބީއާއެކު ތާވަލްގެ ތިންވަނައިގާ ލެސްޓަރއަށް ވަނީ ހަތަރު ޕޮއިންޓްގެ ލީޑެއް ހަތަރުވަނައިގާއޮތް ޗެލްސީގެ މައްޗަށް ހޯދިފައެވެ. މިމެޗުން ބަލިވުމުން ވެސްޓް ބްރޮމްއިން ރެލިގޭޝަނުން ސަލާމަތް ވުމަށް ކުރަމުންދާ މަސައްކަތަށް މިވަނީ އިތުރު ހީނަރުކަމެއް އައިސްފައެެވެ.

މިގޮތުން މިހާރު 32 މެޗް ކުޅެފައިވާއިރު ލިބިފައިވާ 24 ޕޮއިންޓާއެކު އެޓީމް އުޅެނީ ތާވަލްގެ 19 ވަނައިގައެެވެ. އަދި ރެލިގޭޝަނުން ސަމާމަތްވާން ބޭނުންނަމަ ބާކީ އޮތް ހަ މެޗްގެ ތެރެއިން ފަސް މެޗުން އެޓީމް މޮޅުވާން ޖެހޭނެއެެވެ.