ބާސާ ދެވަނައަށް އެރުމުގެ އުންމީދުގައި

ސްޕެނިޝް ލަލީގގައި ގަޓާފޭ ބަލިކޮށް ބާސެލޯނާ އިން ތާވަލުގެ ދެވަނަ އަށް އެރުމުގެ އުންމީދު ބާސާ އިން އާކޮށްފިއެވެ.

ބާސާގެ ދަނޑުގައި ކުޅުނު މިމެޗް އެޓީމް ކާމިޔާބުކުރީ 5-2 ލަނޑުންނެވެ. ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ބާރސާއިންނެވެ. މިމެޗްގައި ބާސާގެ ފުރަތަމަ ލަނޑު މެޗްގެ 8 ވަނަ މިނެޓްގައި ޖަހާދިނީ އެޓީމްގެ ތަޖްރިބާކާރު ކެޕްޓަން ލިއޮނެލް މެސީއެެވެ.

ނަމަވެސް މިލަނޑު ބާރސާއިން ޖެހިތާ 4 މިނެޓްފަހުން ބާރސާގެ ކްލެމޮން ލެންގްލޭ އަތުން ބައިކޮޅަށް ވަން ލަނޑާއެކު ގެޓާފޭއިން މެޗްގެ ނަތީޖާ ހަމަހަމަކުރިއެވެ. މިމެޗްގައި ބާސާއިން ދެވަނަ ފަހަރަށް ލީޑު ނެގި ލަނޑަކީ މެޗްގެ 28 ވަނަ މިނެޓްގައި ގެޓާފޭގެ ސޮފިއާން ޗަކްލާ އަތުން ބައިކޮޅަށް ވަން ލަނޑެކެވެ.

މި ލަނޑު ވަންތާ 5 މިނެޓްފަހުން ބާރސާގެ ތިންވަނަ ލަނޑު ވަނީ ފުރަތަމަ ލަނޑުވެސް ޖަހަދިން މެސީ ކާމިޔާބުކޮށްދީފައެެވެ. މިމެޗްގެ 69 ވަނަ މިނެޓްގައި ގެޓާފޭގެ އެނެސް ޔުނާލް ކާމިޔާބުކޮށްދިން ޕެނަލްޓީއާއެކު އެޓީމަށް މިމެޗުން ކޮންމެވެސް ނަތީޖާއެއް ނެރެވިދާނެކަމުގެ ކުޑަ އުންމީދެއް ލިބުނު ނަމަވެސް މެޗްގެ 87 ވަނަ މިނެޓްގައި ބާރސާގެ ރޮނާލްޑް އަރައުހޯވަނީ ލަނޑެއް ޖަހާ ބާރސާއަށް ދެލަނޑުގެ ލީޑު އަލުން ނަގާދީފައެވެ. އަދި މިމެޗްގައި ބާސާގެ ފަހު ލަނޑު މެޗްގެ އިތުރު ވަގުތުގައި ލިބުނު ޕެނަލްޓީއަކުން ކާމިޔާބުކޮށްދިނީ އެންޓޮއިން ގްރިޒްމަންއެވެ.

މި މޮޅާއެކު ބާސާއަށް މިހާރުވަނީ ކުޅުނު 31 މެޗުން ލިބިފައިވާ 68 ޕޮއިންޓާއެކު ތާވަލްގެ ތިންވަނައަށް ކުރިއަށް ޖެހިލާފައެވެ. އަދި ބާކީ އެއްމެޗް ނުކުޅެ އޮތުމާއެކު ތާވަލްގެ ދެވަނައަށް ކުރިއަށް ޖެހުމުގެ ފުރުސަތު ބާރސާއަށް އެބައޮތެވެ. މިވަގުތު ޕޮއިންޓް ތާވަލްގެ އެއްވަނައިގާ އެޓްލެޓިކޯ މެޑްރިޑް ކުޅޭއިރު ދެވަނައިގާއޮތީ އެންމެފަހުގެ ޗެމްޕިއަން ރެއާލް މެޑްރިޑެވެ. މިމެޗުން ބަލިވުމުން ގެޓާފޭ އުޅެނީ 32 މެޗުން ލިބިފައިވާ31 ޕޮއިންޓާއެކު ތާވަލްގެ 15 ވަނައިގައެެވެ.