އޮއްސެމުން ދިޔަ އިރުގެ ރަންދަޅައިގެ ތެރޭގައި، ދަރުމަވަންތަ ހޮސްޕިޓަލް ވިދާ ބަބުޅަމުން ދިޔައީ، ސަހަރާއެއްގެ ތެރޭގައި އޮތް އަލި މަހެއް ފަދައިންނެވެ. ކޮންކުރީޓް ޖަންގަލީގެ ނަމުން މަޝްހޫރުވެފައިވާ މާލޭގެ ހުޅަނގު ފަރާތު މަލަމަތި ބަދަލުކޮށްލާފައިވަނީ އެހޮސްޕިޓަލުގެ ފުރިހަމަކަމުންނެވެ. އޮއްސެމުން ދިޔަ އިރުގެ ރަންދަޅަތައް އެހޮސްޕިޓަލްގެ ބިއްލޫރިތަކަަށް އެޅިފައިވާއރު، އެމަންޒަރަކީ ދެކޭ ކޮންމެ މީހެއްގެ ހިތަށް އުފާވެރިކަން ގެނެސްދޭނެ މަންޒަރެކެވެ. އެމަންޒަރު އެންމެ ރީތިކޮށް ފެންނާނީ ވިލިގިލީގެ އިރުމަތީ ފަރާތުގެ ގޮނދު ދޮށުގައި ތިބޭ މީހުންނަށެވެ. ވިލިމާލެއިން ނުވަތަ ތިލަފުށިން ނުވަތަ ގުޅިފަޅު ފެރީން މާލެ އަންނަ މީހަކަށެވެ. ޑރ ނިހާމާއަކީ އެމީހުންގެ ތެރެއިން އެކެކެވެ.

ވިލިމާލެ ފެރީގައި އިށީނދެ އިންއިރު މާލޭގެ މަލަމަތިން ޑރ ނިހާމާއަށް އަދި އެހެން މީހުންނަށްވެސް އެންމެ ފާހަގަވާތަނަކީ ދަރުމަވަންތަ ހޮސްޕިޓަލެވެ. ޑރ ނިހާމާއަށް އެހޮސްޕިޓަލް ޚާއްސަވީ ހަމައެކަނި އެހޮސްޕިޓަލްގެ ރީތިކަމާއި ފުރިހަމަކަމަކުން ނޫނެވެ. އޭނާ މަސައްކަތްކުރާ ހޮސްޕިޓަލަކީވެސް އެއީ ކަމަށް ވާތީއެވެ.

ފެރީން ފައިބައިގެން ހިނގާފައި ގޮސް ޑރ ނިހާމާ ޕޯޓިކޯއަށް ވަތްއިރު، ކުލިނިކަލް އެސިސްޓެންޓް ނޫރާވެސް އައިސް ހޮސްޕިޓަލަށް ވަންނަނީއެވެ. އޭނާހުރީ ލަސްވެގެން ތަންކޮޅެއް އަވަސް އަރައިގަނެފައެވެ. ޑރ ނިހާމާއަށް އޭނާގެ ސަމާލުކަން ނެތީ އެހެންވެއެވެ.

ދަރުމަވަންތަ ހޮސްޕިޓަލްގެ 14 ވަނަ ފަންގިފިލާގައި ޑރ ނިހާމާއަށް ޚާއްސަކުރެވިފައިވާ، އޯޕީޑީ ރޫމަށް ވަތްއިރު، ނޫރާ އުޅެނީ ކަންކަން ހަމައަކަށް އެޅުވުމުގައި އަވަދިނެތިއެވެ.
"ހާދަ އަވަސް އަރައިގެން ތިއުޅެނީ." ނޫރާގެ އަމަލުތައް ހުރި ގޮތުން ޑރ ނިހާމާ ހިނިތުންވެފައި ބުންޏެވެ.

"މިރޭ މާފުއްޓަށް ދާން އެބައޮތެއް ނޫންތޯ؟ ގޭގެ ކަންކަމާއި އެހެން ކަންކަމާއި ހެދި ހަމަ ހައްޓަށް ނޭވާ ނުފެތިގެން" ގޮނޑިދަމާލާފައި އިށީންނަމުން ނޫރާ ބުންޏެވެ. އެދަތުރުގައި ޑރ ނިހާމާވެސް ދާންޖެހެއެވެ.
ދެން ދިޔައީ ހިމޭންކަމުގެ ވަގުތުކޮޅެކެވެ. އެއަށްފަހު ބޭރުގައި ކިއޫގައި ތިބި ބަލި މީހުންނަށް ގޮވަން ފަށައިފިއެވެ.

ޑރ ނިހާމާއަށް ބަލި މީހުންގެ ކަންކަން ނިންމާލެވުނު ރޭގަނޑު 8:30 ވަނީއެވެ. މާފުއްޓަށްދާން ފުރަން އޮތީ 10:00 ގައި ކަމަށްވާތީ، ނޫރާ އާއި ޑރ ނިހާމާ ދިޔައީ، ހޮސްޕިޓަލްގެ ކެންޓީނަށް ރޭގަނޑުގެ ކެއުމަށް އިންސާފު ކުރާށެވެ. ޑރ ނިހާމާގެ ކްލިނިކަލް އެސިސްޓެންޓަކަށް ނޫރާ ހަމަ ޖެހުނުތާ މިވީ އަދި ހަމަ ދެތިން ހަފްތާއެވެ. އެކަމަކު ނޫރާއަކީ، ވަރަށް ވާހަކަ ގިނަ އަނގަތަޅުވާކުއްޖަކަށް ވާތީ، ޑރ ނިހާމާގެ ފޫހި ފިލައެވެ. ޚިޔާލުތަކާއި ވިސްނުންތަކާއި ދުރުވެ ހުރެވެއެވެ. ޑރ ނިހާމާއަކީ މާގިނައިން ވާހަކަ ދައްކައި އުޅޭ މީހަކަށް ނުވިޔަސް އެހެން މީހުން ދައްކާ ވާހަކަ ޝައުޤުވެރިކަމާއި އެކު އަޑު އެހުމަކީ އޭނާ ކުރާ ހިއްވާކަމެކެވެ. އަދި އެހެން މީހުންގެ ހަޔާތުގެ ވާހަތައް އަޑުއެހުމާއި މަޝްވަރާ ދިނުމަކީވެސް ކުރާ ހިތްވާ ކަމެކެވެ.

"އަސްލު ބޭނުމެއް ނޫނޭ ޖަލަށް ދާކަށް!" ނޫރާ ބުންޏެވެ.
" ޖަލަށް ލާވަރުގެ ކަމެއް ކުރީތަ؟ ހެހެހެ" ޑރ ނިހާމާ ހިނިގަނޑެއް ޖަހާލިއެވެ. ނޫރާ ބަލައިލީ ޑރ ނިހާމާގެ މޫނަށެވެ. ނޫރާ އާއި ޑރ ނިހާމާއަކީ ހަމަ އެއް އުމުރެއްގެ ދެމީހުންނެވެ. އެހެންވީމާ މިޒާޖާއި ވިސްނުމުގައި އެކަކު އަނެކަކަށް އިހްތިރާމް ކުރުމުގެ ސިފަ އެބަހުއްޓެވެ. ނޫރާ ޗޮކެއް ޖަހަައިލިއެވެ.

މަޑުމަޑުން ތިބެ ދެމީހުން ރޭގަނޑުގެ ކެއުމަށް އިންސާފު ކުރަމުން ދިޔައެވެ. އެކި މައުލޫގައި އެކި ވާހަކަ ދައްކަމުންނެވެ. ބައެއް ފަހަރު ހޮސްޕިޓަލްގެ ވާހަކައެވެ. ބައެއް ފަހަރު ދުނިޔަވީ ކޮންމެވެސް އެހެން ކަމެއްގެ ވާހަކައެވެ. އެކަމަކު އެކަކުވެސް އެމީހެއްގެ އަމިއްލަ ޒާތީ ދިރިއުޅުމުގެ އެއްވެސް ވާހަކައެއް ނުދައްކައެވެ.

ޑރ ނިހާމާވެސް ކޮންމެހެން މިދަތުރުގައި ދާކަށް ބޭނުމެއް ނޫނެވެ. އެކަމަކު އޭނާއަކީ އެެތެރެހަށީގެ ޑޮކްޓަރަކަށްވީ، ޖަލުތަކާއި ރިހެބިލިޓޭޝަން ސެންޓަރުތަކަށް ޑޮކްޓަރުން ފޮނުވުމަށް އޮންނަ ތާވަލުގެ ތެރެއިން މިފަހަރު އޭނާއަށްވެސް ލައްވާލިއެވެ. މީގެ ކުރިން ފަހަރު ފަހަރުވެސް އޭނާ އެދަތުރު ނުދާންވެގެން އުޒުރެއް ދައްކާފައި އެހެން ޑޮކްޓަރަކަށް ބަދަލު ކުރީއެވެ. އެކަމަކު އަބަދަކު އެހެނެއް ނުހެދޭނެއެވެ. ހަޤީޤަތާއި ކުރިމަތިލާން އެބަޖެހެއެވެ. ބައެއް ފަހަރު ޑޮކްޓަރަކަށް ނުވެވުނު ނަމައޭވެސް ޑރ ނިހާމާ ހިތާ ހިތާބުނެލައެވެ.

ޑރ ނިހާމާގެ ހަޔާތުގެ އެލައްގަނޑަކީ އޭނާ ހަނދާންނައްތާލަން ބޭނުންވާ ކަމެކެވެ. އެއީ އޭނާއަށް އެތައް ނަފްސާނީ އުނދަގޫތަކަކާއި ތުރާލެއް ދޭން ބޭނުންވާ ކަމެކެވެ. އެކަމަކު އެކަމުގައި އަމަލުކުރާންވީ ގޮތެއް އޭނާއަކަށް ނުވިސްނެއެވެ. ހެދުނު ގޮސް ރަނގަޅު ކުރާނެ ގޮތެއް އޭނާއަކަށް ނޭނގެއެވެ. ކަންބޮޑުވެ ނުތަނަވަސް ވަނީ އެހެން ވެގެންނެވެ. ހާސްވެ ބިރުގަންނަނީ އެހެންވެގެންނެވެ.

ފެރީލޯންޗުގައި ސާޅީހަކަށް މިނިޓުން މާފުއްޓަށް ދެވިއްޖެއެވެ. ޑރ ނިހާމާ އާއި ނޫރާ ލޯންޗުން ފޭބި އިރު، ކަރެކްޝަންސްގެ ވެހިކަލެއް އެމީހުން ބަލައި އައިސްއޮތެވެ. އެވެހިކަލުގައި އެމީހުން ބަަލައި އައިސްއިނީ ނޫރާވެސް ދަންނަ ކަރެކްޝަންސް އޮފިސަރެކެވެ. މިވީ ގިނަ އަހަރުތަކުގެ ތެރޭގައި ޖަލަށް އެއްޗެހި ފޮނުވުމުގައި އުޅެ އުޅެ ނޫރާ ދަންނަ އޮފިސަރުން ގިނައެވެ.

"އަނ މިކޮތަޅު ބައްޕައަށް ގެންގޮސްދޭތި! މަންމަ ދިން އެއްޗެއް!" އޮފިސަރާއި ނޫރާ ވާހަކަ ދެއްކީ ވަރަށް ގާތް ރައްޓެއްސަކާއި ވާހަކަ ދައްކާގޮތަށެވެ. އެހެންވެ ޑރ ނިހާމާ ހިސާބަކަށް ހައިރާންވެސް ވިއެވެ.
"އެއީ ދަންނަ މީހެއް؟." ވެހިކަލް ގެސްޓް ހައުސްއަށް މަޑުކޮށް އެމީހުން ބާލާފައި ދިޔުމުން ޑރ ނިހާމާ ނޫރާއާއި ސުވާލުކުރިއެވެ. ޖަވާބުގައި ނޫރާ ހީލިއެވެ. ބުނީ އެއީ ފިރިމީހާ ކަމަށެވެ. ނޫރާގެ ފިރިމީހާ މަސައްކަތް ކުރަނީ މާފުށީ ޖަލުގެ އިދާރީ ބައިގައެެވެ. ޑިއުޓީގައި އޭނާ އުޅޭނީ މާފުށީގައެވެ. އެކަމަކު އޮފް ދުވަސްތަކުގައި އާއިލާކައިރިއަށް މާލެއަށް އަންނާނެއެވެ ނޫރާވެސް މާފުއްޓަށް އައިސް އައިސް ހުރީ ރަށަށް ވަރަށް ފަރިތަވެފައެވެ.

" ދެން ބައްޕަ އުޅެނީ ކޮންތާކު؟" ޑރ ނިހާމާއަށް އެހެން އަހާލެވުނީ މާބޮޑު އެއްޗެއް ހިތުގައި އޮވެގެނެއް ނޫނެވެ.

"ޖަލަށްލާފަ. ކުޑަ ކުދިންތަކަކާއި ބެހިގެން. މިހާރު 16 އަހަރުވެއްޖެ" މޫނަށް ރޫ އަރުވާލަމުން ނޫރާ ބުންޏެވެ. ހަމައެކަނި އޭނާ އެހެން ބުނި ރާގުންވެސް ބައްޕަ އާއި މެދު ނޫރާގެ ހިތުގައި އޮތް ނަފުރަތު ޑރ ނިހާމާއަށް ދެނެގަނެވުނެވެ. އެއާއިއެކު ޑރ ނިހާމާގެ ހިތް ނުތަނަވަސް ވިއެވެ. ހީވީ މީހަކު ހިތުގައި ވިކައިގަތް ހެންނެވެ. މާޒީގެ ހިތިހަނދާންތައް އޭނާ ވަށާލިއެވެ. އެހެންވެ އިތުރު އެއްޗެކޭ ނުބުނެ ޑރ ނިހާމާވެސް ވަނީ އޭނާއަށް ޚާއްސަކޮށްފައިވާ ކޮޓަރިއަށެވެ.

މާލެއިން އައީ ކައިގެން ކަމަށްވާތީ، ދެން އިތުރަށް ބޭރަށްދާ ޚިޔާލެއް ޑރ ނިހާމާގެ ނެތެވެ. ބޭނުންވީ އަވަހަށް އޮށޯވެ ނިދައިލާށެވެ. އެކަމަކު ނިދޭ ގޮތެއް ނުވިއެވެ. ހަނދާން ނައްތާލަން ބޭނުން އެދުވަސްތައް އޭނާ ހަނދާނެއް ނުނެތުނެވެ. ޑރ ނިހާމާއަކީ، މެޑިކަލް ޑޮކްޓަރަކަށް ވިނަމަވެސް އޭނާވެސް ޑިޕްރެޝަނާއި އެންޒައިޓީގައި އެތައް އަހަރެއް ހޭދަކުރަން ޖެހުނީ ހަޔާތުގައި ކުރެވުނު އެކުށުގެ ސަބަބުންނެވެ. އޭނާގެ ފުށުން މީހަކަށް ދެވުނު ބޮޑު އަނިޔާގެ ސަބަބުންނެވެ. މިއަދުވެސް އޭނާހުރީ ހަނެވެ.

ފަތިސްވާންދެން ޑރ ނިހާމާ ނުނިދިގެން އެނދުގައި ފުރޮޅިިފުރޮޅި އޮތީއެވެ. މާދަމާ ވާނެ ގޮތެއް ނޭނގޭ ހާލުގައެވެ. އަފީފު އޮތީ މާފުށީ ޖަލުގައިކަން ޑރ ނިހާމާއަށް އެނގެެއެވެ. އެހެންކަމުން އޭނާއާއި ބައްދަލު ވެދާނެތީވެސް ނިހާމާ ބިރުގަނެއެވެ.
ޑރ ނިހާމާއަށް ނިދުނީ ފަތިސްވީ ފަހުންނެވެ. އެކަމަކު ހަތެއްވެސް ނުޖަހަނީސް އޭނާއަށް ހޭލަން މަޖުބޫރުވީ ކުއްލިއަކަށް ޖަލުގައި އޮތް މީހެއްގެ ހާލު ބޮޑުވެގެން ޖަލުގައި ހުރި މެޑިކަލް އޮފިސަރު ޑރ ނިހާމާއަށް ގުޅީމައެވެ. އޭނާ އެދުނީ ވީއެންމެ އަވަހަކަށް ޖަލުގެ މެޑިކަލް ރޫމަށް އައިސް ދިނުމަށެވެ. ވެހިކަލް އެބަ ފޮނުވާ ކަމަށެވެ.

އަވަސްކޮށްލައިގެން ނުކުތްއިރު ގެސްޓް ހައުސްގެ ދޮރުމަތީގައި ވެހިކަލް އޮތެވެ. އޭގައި އިނީ ރޭގައި އެމީހުން ބަލައި އައި އޮފިސަރެވެ. ނޫރާގެ ފިރިމީހާއެވެ. ޑރ ނިހާމާ ވެހިކަލަށް އަރައި ދޮރުލައްޕާލަން އުޅެނިކޮށް، ނޫރާވެސް ތެޅެމުން ފޮޅެމުން އައިސް ވެހިކަލުގެ ދޮރުގައި ހިފައިފިއެވެ. ޑރ ނިހާމާ ނޫރާއަށް ތަންދެއްކުމުން ނޫރާވެސް ވެހިކަލަށް އަރައި އިށީނެވެ. އޭނާވެސް ހުރީ ހާސްވެ ކަންބޮޑުވެފައެވެ.

ހަލުވި ދުވެލީގަިއ ދިޔަ ވޭން، މާފުށީޖަލުގެ މައިގޭޓުން ވަނުމާއިއެކު ޑރ ނިހާމާގެ އަތްފައި ދިޔައީ ފިނިވެގެންނެވެ. އޭނާއަށް އިހްސާސްވީ ހުކުމެއްކޮށް އޭނާ ޖަލަށް ގެނެވުނީހެންނެވެ. ޖަލުގެ މެޑިކަލްބައިގައި ކައިރިއަށް ވޭން މަޑުކޮށްލުމާއި އެކު، ފުރަތަމަ ފޭބީ ނޫރާއެވެ. ފަހަތުން ޑޮކްޓަރ ނިހާމާ ފޭބިއިރު އޭނާ ހުރީ ފިނިވެގެން ތުރުތުރުއަޅައެވެ. ހާސްވެ ކަންބޮޑުވެފައިވާ ވަރުންނެވެ.

ހިއްވަރުކޮށްފައި ގޮސް ޑޮކްޓަރ ނިހާމާ ބަލިމީހާ އޮތް ތަނަށް ވަނެވެ. އޭނާގެ ފަހަތުން އައި ނޫރާއަށް އަތުން އިޝާރާތްކޮށް މަޑުކޮށްލަން ބުނުމުން ނޫރާ ނުވަދެ ހުރީ ބޭރުގައެވެ. ބަލިމީހާ އޮތް އެނދާއި ކައިރިވެފައި ބަލިމީހާ ފެނުމުން ޑރ ނިހާމާއަށް ހަޅޭލަވައި ނުގަނެވުނީ ކިރިޔާއެވެ. އެއީ އަފީފެވެ. ޑރ ނިހާމާ އާއި އޭނާގެ ކޮއްކޮ އާއި ބެހުނު މީހާއެވެ. އެމީހެއްގެ ކުރިމަށްޗަށް އެރުމަށް ޑރ ނިހާމާ އެންމެ ބިރުގަންނަ މީހާއެވެ. ދުއްވައިގެންފާނަމޭވެސް އޭނާގެ ހިތަށް އެރިއެވެ. އެކަމަކު ދެވަނަ ސިކުންތުގައި އޭނާ ހަށިގަނޑަށް ހިއްވަރު ގެނައެވެ. ނިއްކުރިމަތިން ދާފުހެލިއެވެ.

މަޑުމަޑުން ގާތްވެ ގޮވާލިއެވެ. އޭނާގެ އެއްވެސް ހަރަކާތެއް ނެތެވެ. ޒުވާންކަމާއި ރީތި ބުރުސޫރަވެސް ނެތެވެ. ހިކިއަނަރޫފަ ވެފައިވާ ހަށިގަނޑާއި ވަޅުވަދެފައިވާ ހިނދިފައިވާ ދެކޮލާއި ވަޅުވަދެފައިވާ ދެލޮލުން އޭނާގެ ނިކަމެތި ހާލު ކިތަންމެ ރަނގަޅަކަށްވެސް ބަޔާންކޮށްދެއެވެ. ނިހާމާއަށް ގިސްލެވުނެވެ. ހަރަކާތެއްނެތް އެހަށިގަނޑުގައި ކަށިގަނޑުއަޅަމުން ދިޔައިރު އޭނާގެ ހިތް ގިސްލަމުން ލޮލުން ކަރުނަ ފޭދެމުން ދިޔައެވެ. ލަސްވަމުން ލަސްވަމުން ދިޔަ އަފީފުގެ ވިންދުގެއަޑު ނިހާމާގެ ކަންފަތަށް އިވެމުން ދިޔައީ ހިތާމަ އާއި ވޭނުގެ ތަރާނާއެއްގެ ގޮތުގައެވެ. ކީއްވެހެއްޔެވެ؟ ނިހާމާ އާއި ނިހާމާގެ ކޮއްކޮއަށް ޖިންސީގޯނާކުރި މީހަަކަށް، އަދި އެކުށުގައި 30 އަހަރަށް ޖަލަށް ލެވިފައިވާ މީހެއްގެ މައްޗަށް ނިހާމާގެ ހިތުގައި އުފެދެންވީ ކޮން ހަމްދަރުދީއެއް ހެއްޔެވެ؟ ޑރ ނިހާމާ ބޭނުންވީ މަޢާފަށް އެދޭށެވެ. އެކަމަކު އެއީ ކީއްވެ ހެއްޔެވެ؟

ދެފަހަރަކު އަފީފުގެ ކޯތާފަތުގައި މަޑުމަޑުން ޖަހާލައި ޑރ ނިހާމާ އަފީފުގެ ނަމުން ގޮވާލިއެވެ. އެކަމަކު އޭނާ ލޯދިލުވައެއް ނުލިއެވެ.

"ޑޮކްޓަރު ދަންނަންތަ އަފީފް." ކޮޓަރީތެރޭގައި ހުރި މެޑިކަލް އޮފިސަރ ޑރ ނިހާމާގާތުގައި އަހާލިއެވެ. ނިހާމާއަށް ތެޅިގަނެވުނެވެ. މިކުރެވުނީ ކީއްހޭ ހިތައް އެރިއެވެ. 20 އަހަރު ޖަލުގައި އޮތް މީހެއްގެ ނަން ފުރަތަމަ ބައްދަލުވުމުންވެސް ޑރ ނިހާމާއަށް އެނގޭނީ އެއީ އޭނާއާއި ކޮންމެވެސް ގާތްގުޅުމެއް އޮތް މީހަކަށް ވާތީކަން ދެކޭ ކޮންމެ މީހަކަށްވެސް އެނގޭނެއެވެ.

"މި މީހާ މިހާ ހާލުބޮޑު އިރުވެސް ހޮސްޕިޓަލަށް ނުގެންގޮސް އާއިލާ ގާތަށް ނުގެންގޮސް މިއޮތީ ކީއްވެ؟" ޑރ ނިހާމާ ސުވާލު ކުރީ ގާތުގައި ހުރި އޮފިސަރާއެވެ.

"އޭނާގެ އާއިލާއިން އޭނާ އާއި ހަވާލެއް ނުވި. އޭނާގެ ޖަލުޙުކުމުން 10 އަހަރު އަދި ބާކީ އެބައޮތް" އޮފިސަރު ތަފްސީލްކޮށްދިނެވެ.

"އެކަމަކު ހަމަ މިހާރު، ހަމަ މިހާރު އޭނާ މާލެ ފޮނުވާ! މިތާނގައި ބާއްވައިގެން ފަރުވާއެއް ނުދެވޭނެ!" ޑރ ނިހާމާ ބުންޏެވެ.

"އަސްލު ތެދެއް ބުނަން. ތިޔައީ ކުޑަ ދެކުދިންނާއި ބެހިގެން ޖަލަށްލި މީހެއް. ޖަލަށް ލީފަހުން އޭނާ ވަރަށް ރަނގަޅު، ސްޓްރޯކްޖެހި ވެއްޓުމާއި ހަމައަށް އޭނާ، ހަމަ ބަރާބަރަށް ނަމާދުކޮށް ޤުރުއާން ކިޔަވައިހަދާ. ހީވޭ މުޅި ޤުރުއާން ހިތުދަސްކޮށްފައިވާހެންވެސް." އޮފިސަރު ބުންޏެވެ.

ޖަލުގެ އިސް އޮފިސަރެއް އެވަގުތު އެތަނަށް އައިސް ވަނެވެ. ބަލިމީހާ މާލެ ގެންދަން ޖެހޭކަމުގައި ޑޮކްޓަރު ބުނިވާހަކަ އެ އޮފިސަރު ގާތުގައި ބުނުމުން އޭނާދިން ޖަވާބުން ޑރ ނިހާމާގެ ހިތްފަޅައިގެން ނުދިޔައީ ކިރިޔާއެވެ. އޭނާ ބުނީ ގަދަވާނެ ކަމުގެ އުންމީދެއް ނެތް މީހަކު އާއިލާއިން ހަވާލުވާން ބޭނުން ނުވާ މީހަކު ދެން މަރުވާންދެން އެތަނުގައި ބޭއްވުމަށެވެ. އެޖުމުލަތައް އަހާފައި ޑރ ނިހާމާއަށް ބަލައިލެވުނީ، އަފީފަށެވެ. އޭނާގެ ލޮލުގެ ކޮޅުން ފޭބި ކަރުނަ ތިކިތައް ހެކިދެނީ އެތަނުގައި ދެކެވޭ ވާހަކަތައް އޭނާއަށް އިވޭކަމެވެ. އެމަންޒަރުން ޑރ ނިހާމާގެ ހިތަށް އަދި މާބޮޑަށް ދަތިވެއްްޖެއެވެ. ކުއްވެރިއެއް ކަމުގެ އިހްސާސް މާބޮޑަށް ވެއްޖެއެވެ. އަފީފަކީ ކުށެއް ނެތް މީހެއްކަން އެނގެނީ ނިހާމާ އާއި ނިހާމާގެ ކޮއްކޮއަށެވެ. ދުނިޔޭގެ އެހެން އެންމެން ދެކެނީ އަފީފަކީ ކުޑަކުދިންނާއި ބެހޭ ވިޔާނުދާ މީހެއްކަމުގައެވެ.

ކިޔެވުމާއި މެދު މާބޮޑު ޝައުޤުވެރިކަމެއް ނެތް ނިހާމާ އާއި ނިހާމާގެ ކޮއްކޮ ތިބީ ޓިއުޝަންތަކުން ސަލާމަތްވާނެ ގޮތެއް ނޭނގިފައެވެ. ނިހާމާގެ މައިންބަފައިން ކޮންމެ މާއްދާއަކަށް ޓިއުޝަން ޓީޗަރަކު ގެއަށް އަންނައިރު އަފީފަކީ އޭގެތެރެެއިން އެއްޓީޗަރެވެ. ނިހާމާގެ އުމުރަކީ އޭރު 10 އަހަރެވެ. އޭނާގެ ކޮއްކޮގެ އުމުރަކީ 8 އަހަރެވެ. އެދުވަސް ވަރު މާލެ ތެރޭގައި ކުޑަކުއްޖަކާއި ޓީޗަރަކު ބެހުމުގެ ދެމައްސަލައެއް ފެންމަތިވިއެވެ. ނިހާމާ އާއި އޭނާގެ ކޮއްކޮއަށް ވިސްނުނީ، އެމީހުންނާއި ޓީޗަރު ބެހޭ ކަމުގައި މައިންބަފައިން ގާތުގައި ބުނުމުން ގެއަށް ޓިއުޝަަންޓީޗަރުން ގެނައުން ހުއްޓާލަފާނެ ކަމަށެވެ. މައިންބަފައިންގެ ގާތުގައި ހަދާލައިގެން ބޮޑު ދޮގެއް ހެދީ އެހެންވެއެވެ. ފަހަރެއްގައިވެސް އެކަމުގެ ސަބަބުން މީހެއްގެ މުޅި ދިރިއުޅުން ހަލާކުވެގެން ހިނގައިދާނެ ކަން ވިސްނައިގަނެވޭ ވަަރަށްވުރެ އެދެމީހުން ޅައެވެ. އަދި އެކަން އެމީހުންނަށް ވިސްނައިދޭނެ މީހަކުވެސް ނެތެވެ.

އަފީފު، ނިހާމާ އާއި ނިހާމާގެ ކޮއްކޮ އާއި ބެހުނު ކަމުގައި ހަމަ ބުނުމާއިއެކު ނިހާމާގެ މައިންބަފައިން އެމައްސަަލަ ހުށައެޅި ފުލުހަށެވެ. އެދުވަހުން ފެށިގެން މިއަދާއި ހަމައަށް އަފީފުގެ ދުނިޔެއަކީ ޖަލެވެ. ނިހާމާގެ އާއިލާއަކީ މުއްސަނދި ނުފޫޒުގަދަ އާއިލާއަކަށް ވުމާއިއެކު މައްސަލަ ހިނގައިގަތީ ހަވާ ފަޓާސްބަރިއެއް ހެނެވެ. އަފީފު އިންކާރު ކުރި ނަމަވެސް، އަދި މައްސަލަ ތަހުޤީޤުކުރި ފުލުހުންނަށް ކުދިންގެ ބަޔާންތަކުން ފުށުއެރުންތައް ފެނުނަސް ދަށުކޯޓުންވެސް މައްސަލަ ނިމުނީ ސާބިތުވެެގެންނެވެ. ހައިކޯޓުގެ މަރުހަލާގައި މައްސަލަ އޮއްވައި، ނިހާމާގެ މައިންބަފައިންނަށް، ނިހާމާ އާއި އޭނާގެ ކޮއްކޮ ހެދީ ދޮގެއްކަމާއި އަފީފަކީ ކުށެއް ނެތް މީހެއްކަން އެނގުނެވެ. ޚުދު ނިހާމާ އާއި އޭނާގެ ކޮއްކޮ އަފީފު އެމީހުންނާއި ނުބެހޭކަމާއި ދޮގުހެދީ އެމީހުންކަމުގައި މައިން ބަފައިން ކުރިމަތީގައި އެއްބަސްވެސް ވިއެވެ. އެކަމަކު ނިހާމާގެ އާއިލާއިން އަފީފު މިނިވަންކޮށްދިނުމުގެ ބަދަލުގައި ނިހާމާ އާއި ނިހާމާގެ ކޮއްކޮ ފޮނުވާލީ ރާއްޖެއިން ބޭރަށެެވެ.

ދެލޯ ފޮހެލަމުން ނިހާމާ، އެކޮޓަރިން ނުކުތް އިރު، ދޮރުކައިރީގައި ނޫރާ އާއި އޭނާގެ ފިރިމީހާ ތިއްބެވެ. އެތެރެއަށް ވަދެ ބަލާށޭ ނޫރާ ގާތުގައި ނޫރާގެ ފިރިމީހާ ބުނުމުން ނޫރާ ކުރީ އިންކާރެވެ.

"ވަދެ މޫނު ދެކެލަ ބަލަ، ކިތަންމެ ވިޔާ ނުދާ މީހަކަށްވިޔަސް އެއީ ނޫރާގެ ބައްޕައޭ" މަޑުމަޑުން އޭނާ ބުންޏެވެ.

"އެމީހާއަށް އަހަރެން ނޫޅެން ބައްޕަ ކިޔާކަށް. ޖަލަށް ނުލި ނަމަ މަށާވެސް ބެހުނީސް ކަންނޭގެ. ޗީޑި، ހިނގާ މިތަނުންދާން" އެ އޮފިސަރުގެ އަތު ހިފަމުން ނޫރާ ހިނގައިގަތް މަންޒަރު ބަލަން ހުއްޓުން އަރާފައި ޑރ ނިހާމާއަށް ހުރެވުނެވެ.

ނިހާމާގެ ޟަމީރު ނިހާމާއަށް ގޮވަމުން ދިޔައެވެ. މިޖަލުގައި މިއަދު ބަންދުވެފައި ހުންނަން ޖެހޭ މީހަކީ ނިހާމާ ކަމަށެވެ. އޭނާ ހެދި އެންމެ ދޮގަކުން އަދި އޭނާގެ އާއިލާއިން ހަޤީޤަތް އެނގުމުންވެސް ކަންކަން ސިއްރުކުރުމުން، އަފީފުގެ މުޅި ހަޔާތް ގެއްލުނީއެވެ. ހައްޤުނޫން ގޮތުގައި އޭނާ ނިމި އެދަނީ ޖަލުގައެވެ. އާއިލާ އާއި ދަރީންނާއި މުޅި މުޖުތަމައު އޭނާއަށް ކުރަނީ ނަފްރަތެވެ. ކުރަނީ މަލާމާތެވެ، ދެނީ ލަޢުނަތެވެ. އޭނާގެ ކުށެއް ނެތްކަން ހެއްދެވި ފަރާތުން ދެނެވޮޑިގެންވާނެއެވެ. މިފާއިތުވި 20 އަހަރު އޭނާ ހާދަ ކަރުނައެއް އަޅާނެއެވެ. ހާދަ ހިތާމައެއް ކުރާނެވެ. ޢަރްޝީގެ ވެރި އިލާހަށް އެތައް އިލްތިޖާއެއް ދަންނަވާނެއެވެ.

ނިހާމާއަކަށް ހަދާނެ ގޮތެއް ނޭނގެއެވެ. ކުރާނެ ކަމެއް ނޭނގެއެވެ. އެނބުރި އޭނާ އަފީފު އޮތް ކޮޓަރިއަށް ވަނެވެ. ނިހާމާއަށް ފެނުނީ މަރުގެ ސަކަރާތުގައި އަފީފުގެ އެއްފައި އަނެއްފަޔާއި އޮޅައި ލެވުނު ތަނެވެ. ދެލޯ ހުޅުވާލި ތަނެވެ. ދުވެފައި އައިސް ގާތަށް ހުއްޓުނު ނިހާމާއަށް އަފީފު ދިނީ ލުއި ހިނިތުންވުމެކެވެ. ބުނި ކަހަލައެވެ. ޝުކުރިއްޔާއެވެ. މަންޒަރު ހުއްޓުނީ އެހިސާބަށެވެ. އަފީފުގެ ހަޔާތުގެ ހުޅުކޮޅު ނިވުނީއެވެ.

އަފީފުގެ މޫނުގައި ފޮތިގަނޑު އެޅީ ޑރ ނިހާމާގެ އަތުންނެވެ. އޭރު ނިހާމާ ހުރީ ހިތާމައިން ހިތް ހަލާކުވެފައެވެ. ތެދު ހާމަކުރެވޭކަށް ނެތެވެ. އޭނާއަށް ހިތްހަމަޖެހުމެއް ނެތެވެ. ތާއަބަދަށް ކުރެވުނު ކުށުގެ ލަދުވެތިކަމުގެ އަލިފާނުގައި ނިހާމާޖެހޭނީ އަނދައަނދައި ހުންނާށެވެ. ދުނިޔެ އާއި އާޚިރަތުގައިވެސް އޭނާއަށް ހަމަޖެހުމެއް ނުލިބޭނެކަން ނިހާމާއަށް އެނގެއެވެ.

– ނިމުނީ –