ޔުނައިޓެޑްގެ ވައިސް ޗެއާމަން ކަމުން ވަކިވާން އެޑް ވުޑްވާޑް ނިންމައިފި

މި އަހަރު ނިމުމުން މެންޗެސްޓާ ޔުނައިޓެޑުގެ އެގްޒެކްޓިވް ވައިސް ޗެއާމަނުގެ މަގާމުން ވަކިވާން އެޑް ވުޑްވާޑް ނިންމައިފިއެވެ.

މިއަހަރު ނިމުމާއެކު ކުލަބް ހިންގުމުގެ މަސްއޫލިއްޔަތުން ދުރަށްދާން އެޑް ވުޑްވާޑް ނިންމާފައި މިވަނީ ޔޫރަޕިއަން ސުޕަ ލީގުގައި މެންޗެސްޓާ ޔުނައިޓެޑުން ބައިވެރިވެފައިވަނިކޮށް މުބާރާތަށް ގިނަ ބަޔެއްގެ ބޮޑެތި ފާޑުކިޔުންތަކެއް އަމާޒުވެފައިވާ ދަނޑިވަޅެއްގައެވެ.

ޔުނައިޓެޑުން ނެރުނު ބަޔާނެއްގައިވަނީ މި އަހަރު ނިމުމުން، ޔުނައިޓެޑުގެ މަގާމުން ވަކިވާން ވުޑްވާޑް ނިންމާފައިވާ ކަމަށް ބުނެފައެވެ. މަގާމުން ވަކިވާން ނިންމިކަން ހާމަކުރެއްވުމަށްފަހު ވުޑްވާޑް ވިދާޅުވީ މިދިޔަ 16 އަހަރު ޔުނައިޓެޑަށް ކޮށްދިން ޚިދުމަތާ ދޭތެރޭ ފަޚުރުވެރިވާ ކަމަށެވެ. އަދި ކުލަބު ދޫކޮށްލަން ނިންމި ނިންމުމަކީ ފަސޭހަ ނިންމުމެއް ނޫން ކަމަށްވެސް ވަނީ ވިދާޅުވެފައެވެ.

އުމުރުން 49 އަހަރުގެ ވުޑްވަޑް ޔުނައިޓެޑްގެ ވައިސް ޗެއާމަން ކަމުގެ މަގާމާ ހަވާލުވީ 2012 ވަނަ އަހަރު އެވެ.

ގިނަ އަހަރުތަކަކަށްފަހު ވުޑްވާޑް ޔުނައިޓެޑާ ދުރަށްދާއިރު، އެމެރިކާގެ މަހުޖަނު މެލްކަމް ގްލޭޒާއަށް ޔުނައިޓެޑް ގަތުމަށް 2005 ވަނަ އަހަރު ލަފާދިނީ ވުޑްވާޑެވެ. ގްލޭޒާގެ ފަރާތުން ޔުނައިޓެޑަށް އެންމެ ފުރަތަމަ ވުޑްވާޑް ޚިދުމަތްކުރަން ފެށީ މާލީ ގޮތުން ލަފާދޭ މީހެއްގެ ގޮތުގައެވެ. އެކަމަކު ފަހުން 2007 ވަނަ އަހަރު ޔުނައިޓެޑުގެ ކޮމާޝަލް އަދި މީޑިއާ ކަންތައްތަކުގެ އެންމެ އިސް ވެރިއެއްގެ ޒިންމާއާ ވުޑްވާޑް ވަނީ ހަވާލުވެފައެވެ. އަދި އޭގެ ފަހުން 2012 ވަނަ އަހަރު ޔުނައިޓެޑުގެ ސީއީއޯގެ މަގާމުގައި ހުރި ޑޭވިޑް ޖިލް ރިޓަޔާކުރުމުން، އެ މަގާމަށް ވުޑްވާޑް އައްޔަންކުރިއެވެ.