ކޮވިޑް-19 އާ ގުޅިގެން ކުޅިވަރުގެ ހުރިހާ ހަރަކާތްތަކެއް މެދުކަނޑާލިތާ އެއް އަހަރު ފަހުން، ކްރިކެޓް މުބާރާތްތައް މިއަދު އަލުން ފަށަން ތައްޔާރުވެއްޖެ އެވެ.
ކްރިކެޓްގެ އެންމެ ފޯރިގަދަ އިވެންޓަކީ ކޮންމެ އަހަރެއްގެ ވެސް ރޯދަ މަހު ބާއްވާ، ރަމަޟާން ކްރިކެޓް ކާނިވަލެވެ. ކޯވިޑާ ގުޅިގެން މިދިޔަ އަހަރު އެ މުބާރާތް ބާއްވައިފައެއް ނުވެ އެވެ. އެއީ 30 އަހަރުގެ ތެރޭ ކްރިކެޓް ކާނިވަލް ނުބޭއްވުނު ފުރަތަމަ ފަހަރެވެ. ރޯދަ މަހަށް ފައްތައިގެން ކުރިއަށް ގެންދާ ކްރިކެޓް ކާނިވަލްގެ ފުރަތަމަ މުބާރާތަކަށް އޮންނާނީ އޯޕަން މުބާރަތެވެ. އެއަށް ފަހު ސަރުކާރު އޮފީސްތަކުގެ މުބާރާތެވެ. އަދި އޭގެ ފަހުން ކުންފުނިތަކުގެ މުބާރާތެވެ.
ކްރިކެޓް ކާނިވަލަކީ ރަމަޟާން މަހުގައި ކުރިއަށްގެންދާ އެންމެ ބޮޑު އެއް ކުޅިވަރު ހަރަކާތެވެ. އެގޮތުން މި ކާނިވަލުގައި ތިން މުބާރާތެއް ކުޅެއެވެ. އެއީ އޯޕަން ޓޭޕްބޯލް ކްރިކެޓް މުބާރާތާއި، ކުންފުނިތަކަށް ހުޅުވާލައިގެން ބާއްވާ ކޮމްޕެނީ ޓޭޕްބޯލް ކްރިކެޓް މުބާރާތާއި، ސަރުކާރު އޮފީސްތަކުގެ މެދުގައި ބާއްވާ އޮފީސް ޓޭޕްބޯލް ކްރިކެޓް މުބާރާތެވެ.
މި އަހަރުގެ ކާނިވަލުގެ ގުރުލުން އާދީއްތަ ދުވަހު ބޭއްވިއިރު، އޯޕަން ޓޭޕްބޯލް ކްރިކެޓް މުބާރާތުގެ ކުޅުން މިއަދު ފަށާނެއެވެ. އަދި ކޮމްޕެނީ ޓޭޕްބޯލް ކްރިކެޓް މުބާރާތުގެ ކުޅުން އަންނަ ހަފުތާގެ އާދީއްތަ ދުވަހު ފަށާއިރު، އޮފީސް ޓޭޕްބޯލް ކްރިކެޓް މުބާރާތުގެ ކުޅުން ފަށާނީ މި މަހުގެ 29 ވަނަ ދުވަހުއެވެ.
ކޮންމެ އަހަރަކުވެސް ފޯރިއާއެކު ކުރިއަށްދާ ކްރިކެޓް ކާނިވަލުގައި މި އަހަރު ޖުމްލަ 19 ޓީމެއް ވަނީ ބައިވެރިވެފައެވެ.
