ބަދިގެ ތެރޭގައި ޝަފީޤާ އުޅުނީ ފިރިމީހާ ޒަރީރު އާއި ދަރިފުޅު ނައުހާ ސްކޫލު ނިމިގެން އަންނަން ވާއިރަށް ހުނިރޮއްޓެއް ފިހާށެވެ. އޭރު އަސުރުން ތިރިވެއްޖެއެވެ. ހެނދުނު ދިޔަ ގޮތަށް ދަރިފުޅު ނައުހާ އުޅެނީ ސްކޫލުގައެވެ. ގެންދިޔަ އިންޓަވަލްވެސް އޭނާ ބުއިކަމެއް ނޭނގެއެވެ.ނައުހާ އަކީ ސްކޫލުގެ ކަންކަމުގައި މަރުދޭ ކުއްޖެކެވެ.  ދިރިއުޅުމުގެ ހުރިހާ ކަމަކަށްވުރެވެސް އޭނާއަށް މުހިއްމު ވާނީ ކިޔެވުމާއި ސްކޫލުގެ އިތުރު ހަރަކާތްތަކެވެ. އެއާއި އެކު އޭނާގެ ނަތީޖާވެސް ރަނގަޅެވެ. މުޅި ގުރޭޑްގައި ހުރިހާ ޓީޗަރުންގެވެސް އަދި ޕްރިންސިޕަލްގެ އެންމެ މަޤުބޫލު ދަރިވަރަކީ ނައުހާއެވެ. ކުޅިވަރާއި އަދަބިއްޔާތުގައިވެސް ނައުހާ އުޅެނީ ކުރީގައެވެ. ސްކޫލު ތަމްސީލް ކުރަންޖެހޭ އެފަދަ ކޮންމެ ކަމެއްގައި ސްކޫލުން ގޮވައިލާނީ ނައުހާއަށެވެ.

ބަދިގެ ފަރާތުން ބެލްކަންޏަށް ޝަފީޤާ ނުކުތީ، ބެލްކަނީގައި ހުރި، ކާށި ގޯނިން ކާއްޓެއް ނަގާށެވެ. ބަދިގޭގައި ބެލްކަންޏަށް ހުޅުވެއް ހުރި ބޮޑު ދޮރު ކަހާލުމާއިއެކު، ވަދެގެން އައީ ބާރު ވައިރޯޅިއެކެވެ. އެއާއިއެކު ބަދިގެ ކަބަޑު މަތީގައި ހުރި ބައެއް ފެންހުސްކުރި ފުޅިތައް ވެރިއްޖެއެވެ.  ބިއްލޫރި ފުޅިއަށް ކަބަޑުމަތިން ފުރޮޅިގެން އައިސް ޓައިލްސްތައް މަތީ ޖެހި ތަޅައިގެން ދިޔައަޑުން މުޅިތަން ދިޔައީ ގުގުމައިގެންނެވެ. ޝަފީޤާ ދިޔައީ ސިއްސައިގެންނެވެ. ކާށި ގޯނިން ކާއްޓެއް ނެގުމަށްފަހު ޝަފީޤާއަށް ބަލާލެވުނީ މައްޗަށެވެ. އޭރު ދުނިޔެ ބައްދައި ކަޅު ކުރަމުން އައީ ބޯ ވިއްސާރަ ވިލާ ގަނޑެކެވެ.

ބަދިގެއަށް ވަދެ ތެޅިފައިވާ ފުޅި ނެގުމުގެ ކުރިން ޝަފީޤާ ގުޅާލީ ފިރިމީހާ ޒަރީރުއަށެވެ. ދަރިފުޅާއި ފިރިމީހައަށް ވިއްސާރަގަނޑުގެ ކުރިން ގެއާއި ހަމައަށް ފޯރާނެތޯ ބެލުމަށެވެ.

"ކޮބާ؟ ކިހާ ހިސާބަކު ތިޔަ ތިބީ. ވާރޭގަނޑު އޮއްސައި ގަތުމުގެ ކުރިން ގެއަށް އާދެވޭނެތަ؟" ފިރިމީހާ ފޯނު ނެގުމުން ހަލޯ އޭވެސް ނުބުނެ ޝަފިޤާ ވާހަކަ ފަށައިގަތީ ކަންބޮޑުވެފައި ހުރި ވަރުންނެވެ. ޒަރީރު ފޯނު ބޭއްވީ މިއަންނަނީ އޭ ބުނެފައެވެ.

ތެޅިފައިވާ ފުޅީގެ ބިއްލޫރިތައް ނަގައި ބޯކަރުދާސް ގަނޑެއްގައި ބަންދުކުރުމަށްފަހުގައި ޝަފީޤާ އެ ބިއްލޫރިތައް ކުނިއަޅާ ވަށިގަނޑަށް ލީ، އެއިން އެހެން މީހަކު ޒަޚަމްވިޔަ ނުދިނުމަށްޓަކައެވެ. ރެޔާއި ދުވާލު ކުނި އުކުމުގައި އުޅޭ ވެމްކޯގެ މުވައްޒަފުންނަށް ރައްކާތެރިކަން ލިބޭނެ ގޮތަށް މަސައްކަތްކޮށް ދިނުމަކީ، ޚިދުމަތް ހޯދާ މީހުންގެ މަސްއޫލިއްޔަތަކާއި ޒިންމާއަކަށް ވާތީއެވެ.

ކާށި ނަގައި ބިނުމަށްޓަކައި އަތަށް ދަގަނޑު ބުރި ހެޔޮވަރުކޮށްލިވަގުތު ބަދިގެ ތެރެއަށް ވަދެގެން އައީ މައިދައިތަ ޒަރީނާއެވެ. އެއްފަހަރުން ދެތިން ފަހަރު ޖަހައިގެންވެސް ކާށި ބިނދެވޭގޮތް ނުވުމުން ޝަފީޤާއަތުން ކާއްޓާއި ދަގަނޑު ބުރި އަތުލީ ޒަރީނާއެވެ. ޅީދަރިފުޅަށް އަދިވެސް ކާއްޓެއް ނުބިނދެވެއޭ ބުނެ ހީލާފައެވެ. ކާށި އަތަށް ހެޔޮވަރުކޮށްލާފައި ޒަރީނާ ޖެހީ އެންމެ އެތި ފަހަރެވެ. ކާށި ދެފަޅިވެގެން ދިޔައިރު، އަތުތެރެއިން ދޫވެގެން ދިޔަ ކާށިކިބަ ފުރޮޅިގެން ގޮސް ވެއްޓުނީ ޝަފީޤާގެ ފައިބުޑަށެވެ. ދެލޯ ބޮޑުކޮށްލާފައި ޒަރީރާނާއަށް ބުނެވުނީ "އަސްތާ" އެވެ.

ގުދުވެ ކާށި ކިބަ ނަގަމުން ޝަފީޤާ މައިދައިތަށް ބަލާލާފައި ހީލަމުން ބުނީ، އިހު މީހުންގެ ޚުރާފާތަކީ މިޒަމާނުގެ މީހުން ޤަބޫލު ކުރާ އެއްޗެއް ނޫންކަމަށެވެ. އެކަމަކު އޭނާގެ ހިތް ބިރުގެންފިކަން ފާހަގަވުމުން މައިދައިތަވެސް އިތުރަށް އެއްޗެކޭ ނުބުނީއެވެ.

" ހިތާމައިގެ ޚަބަރެއް ހިފައިގްނެ އަންނަނީ ކާކު ބާވައެވެ؟" ޝަފީޤާގެ ހިތަށް އެރިއެވެ. ކާއްޓެއް ބިންނަނިކޮށް އެއްކިބަ އަތުތެރެއިން ދޫވެގެން ވެއްޓިއްޖެނަމަ ކޮންމެވެސް ހިތާމަވެރި ޚަބަރެއް ހިފައިގެން ކޮންމެވެސް މީހަކު އަންނާނެކަމުގައި ބުނާ ބުނުމަކީ ބޯދާ ޤަބޫލު ކުރުމެކެވެ. ރާއްޖެ އިސްލާމްވިތާ 800 އަހަރު ވިއިރުވެސް ދިވެހިންގެ ތެރެއިން މުޅިން އުވި ގެއްލިގެން ނުދިޔަ ބޯދާ ޤަބޫލު ކުރުންތަކުގެ ތެރޭގައި ހިމެނޭ ކަމެކެވެ.

ހުނިގޮނޑިނަގައި ހުނިގާނަން އިންއިރުވެސް ޝަފީޤާގެ ހިޔާލުގައި އެކަން އެނބުރެމުން ދިޔައެވެ. ހުނިގާނައިގެން ޝަފީޤާ ތެދުވަނިކޮށް، ބޭރުން އިވުނު ގަދަ އަޑުފަށްގަނޑާއި އެކު، ތެޅެމުން ފޮޅެމުން ސިޓިންގ ރޫމުގެ ބެލްކަނީގައި ހުރެފައި އެތެރެއަށް ވަނީ ޒަރީރުގެ ކޮއްކޮ އަރީނެވެ. މަންމާއޭ ގޮވާ ރޮއެގެންފައި އޭނާ ހަޅޭލަވައިގަތްލެއް ބާރުކަމުން ސިހިގެން ގޮސް ޝަފީޤާގެ އަތުން ހުނިތަށި ދޫވެގެން ވެއްޓުނެވެ. ދޮންބެ އެކްސިޑެންޓް ވެއްޖެއޭ ބުނެފައި އަރީނު އެޕާޓްމަންޓްގެ ދޮރު ހުޅުވާލާފައި ދުއްވައިގަތީ ލިފްޓާއި ދިމާއަށެވެ. ލިފްޓު އަންނަންދެންވެސް މަޑުނުކޮށް އޭނާ ސިޑިން ތިރިއަށް ދުއްވައިގަތެވެ.

ޒަރީނާ ކީކޭހޭ ގޮވަމުން ބަދިގެތެރެއިން ސިޓިންގ ރޫމަށް ނުކުތް އިރު އަރީން ސިޑިން ފައިބަން ފަށައިފިއެވެ. ޝަފީޤާ ދުއްވައިގަތީ ސިޓިންގ ރޫމުގެ ބެލްކަންޏަށެވެ. ގަދަ ވަޔާއިއެކު ބޯ ވާރޭގެ ތިކިތައް އޮއްސައިގަތީ އެވަގުތުގައެވެ. ބެލްކަނީ ތެރޭގައި ހުރެ ދެލޯ ދިލުވާލެވޭ ވަރު ނުވިޔަސް ތިރިން މަގުމަތީގައި، މީހުންތައް ޖަމާވެފައި އޮތްތައް ޝަފީޤާއަށް ފެނުނެވެ. އަދި ކުރިމަތިން ހުރިގޭގެ ޓެރަހުގެ ފާރުބުރި މަތީގައި، ބޯގަންވިލާ ގަހެއް އިންދާފައި ހުރި ބޮޑު ސިމެންތި ގަސްމުށިގަނޑުވެސް މަގުމައްޗަށް ވެއްޓިފައި އޮތެވެ.

ޝަފީޤާވެސް ބެލްކަނީގައި ހުރެފައި އަވަހަށް ތިރިޔަށް ދާންވެގެން ގޭތެރެއަށް ވަނެވެ. އެކަމަކު ތަޤުދީރު އޭނާގެ ރިހޭފައިމައްޗަށް އަނެއްކާވެސް ވައްޓާލީ ފޮއެވެ. ވާރެޔާއިއެކު ބެލްކަނީގެ ދޮރު ކައިރިވެސް އޮތީ ތެމިފައި ކަމުން ޝަފީޤާއަށް ފައި އެޅުނުގޮތަކުން އޭނާ ކަހާލައިގެން ވެއްޓުނީއެވެ. ސިޓިންގ ރޫމުގެ ޓައިލްތަކުގެ މައްޗަށް އުއްޑުން ވެއްޓި ބޯޖެހުނުލެއް ބާރު ކަމުން އޭނާގެ ލޯމައްޗަށް ދިޔައީ އަނދިރިވެގެންނެވެ. ކަންފަތް ދިޔައީ ބޫންވެގެންނެވެ.

ޒަރީރު ސައިކަލްގައި އައިސް ގެ ކައިރިއަށް މަޑުކޮށްލި ވަގުތު، އައި ގަދަ ވައިރޯޅި އަކާއިއެކު، ޖެހިގެން ހުރި ގޭގެ ޓެރަހުގެ ފާރު ބުރި މަތީގައި ހުރި ބިޔަ ސިމެންތި ޕޮޓު ވެއްޓުނީއެވެ. އެ ވެއްޓުނީ ޒަރީރާއި ދަރިފުޅު ނައުހާ ތިބި ސައިކަލު މައްޗަށެވެ. އޭގެ އެއްކަން ޖެހުނީ ދަރިފުޅު ނައުހާގެ ބޮލުގައެވެ.  ސައިކަލަށް އެރި ލޮޅުމާއިއެކު ޒަރީރުވެސް ދިޔައީ ވިއްސައިގެންނެވެ. ބެލްކަނީގައި ހުރި އަރީނަށް އެ ހުރިހާ މަންޒަރެއް ވަރަށް ރީތިކޮށް ފެނުނެވެ. އޭނާ ތިރިޔަށް ދުއްވައިގަތީ އެހެންވެއެވެ.

ޒަރީނާ ލިފްޓާއި ހަމައަށް ދިޔައިރު، ލިފްޓް ހުޅުވެނީއެވެ. ޝަފީޤާއަށް މަޑު ކުރުމުގެ ބަދަލުގައި ޒަރީނާވެސް ބޭނުންވީ އަވަހަށް ތިރިޔަށްދާށެވެ. ޝަފީޤާވެސް އަންނާނޭ ކަން އެނގޭތީއެވެ. އެކަމަކު އޭރު ޝަފީޤާއޮތީ، ސިޓިންގ ރޫމުގެ ޓައިލްސްތައް މަތީގައި ވެއްޓި ހޭހުސްވެފަ އެވެ.

އަރީން ތިރިޔަށް ފޭބި އިރު ބައެއް މީހުން އެތަނަށް ޖަމާވެއްޖެއެވެ. އޭރު ހަމަ އެންމެ ބޯކޮށްވާރޭ ވެހެނީއެވެ. ދެ މީހަކުވެގެން ދޮންބެ އަތުލަފިކޮށް ނަގަމުން ދިޔައިރު، ތަންކޮޅެއް ދުރުގައި ނައުހާ ބިންމަތީގައި އެއްވެސް ހަރަކާތެއް ނެތި އޮތެވެ. އެއްވެސް މީހަކު އެކުއްޖާގެ ގައިގައި އަތެއް ނުލައެވެ. އޭރު ނައުހާގެ ގައިން ލޭގެ ކޯރު ދެމެމުން އައެވެ. އަރީނަށް ހީވީ އޭނާގެ ވަށައިގެން ދުނިޔެ އެނބުރެނީ ހެންނެވެ.

"އެކުއްޖާ އެއޮތީ މަރުވެފައި"

ކައިރިން އަސްކަންޏެއްގެ ދޮށުގައި ހުރި މީހަކު ބުނި އަޑު ޒަރީރަށާއި އަރީނަށް އިވުނެވެ. އަރީން ކޮއްކޮ އާއި ގާތްވެލިއެވެ. އޭނާއަށް ހީވީ އުޑު ބޮލަށް ވެއްޓުނީ ހެންނެވެ. ނައުހާގެ ބޮލުގެ ނާށިގަނޑު ފަޅައިގެން ގޮސް ސިކުނޑިވެސް އޮތީ ފެންނާށެވެ. އަރީނު ބާރަށް ހަޅޭލަވައިގަތެވެ. މީހެއްގެ އެހީގައި ކޮޅަށް ތެދުވި ޒަރީރުވެސް ހުރީ ގަނޑުވެ ހުއްޓިފައެވެ. އެތަނަށް ނުކުން ނައުހާގެ މާމަ ޒަރީނާ މޫނުގައި އަތް އަޅާފައި ރޮއެގަތްގޮތަށް ހޭހުސްވެގެން ވެއްޓުނީއެވެ.

ހިނދުކޮޅެއްގެ ތެރޭގައި އެމްބިއުލާންސް އަތުވެއްޖެއެވެ. އެއިން ފޭބި ނަރުސްކުއްޖާވެސް އަނބުރައިގަނެގެން ނުވެއްޓުނީ ކިރިޔާއެވެ. ނައުހާގެ އަތުގައި ހިފާފައި ވިންދު އެބަހުއްޓޭ އަވަހަށް އެމްބިއުލެންސްއަށް އަރުވާށޭ ގޮވާލިއެވެ. ފުލުހުން އަންނަންދެން މަޑެއް ނުކުރެވޭނެއޭ ގޮވާލިއެވެ. ނައުހާގެ ބޮލުގެ ނާށިގަނޑު ހުޅުވިފައިވާތަން ބަންދުކޮށް، ގޯޒް ފޮތިގަނޑެއް އޮޅައި އެމްބިއުލާންސްއަށް އަރުވަންވެސް އެންމެ ބޮޑު މަސައްކަތެއް ކުރީ ނަރުސްކުއްޖާއެވެ.

ފަހަތުން އަރީން އާއި ޒަރީރުވެސް އެމްބިއުލާންސަށް އެރިއެވެ. ހޭހުސްވެފައި އޮތް ޒަރީނާ ވެސް އެމްބިއުލާންސަށް އެރުވިއެވެ. ހާލަތުގެ ނާޒުކުކަމާއި، އެންމެގެވެސް ހާސްކަން ބޮޑުކަމުން އެކަކުވެސް ޝަފީޤާގެ މަތިން ހަނދާނެއް ނެތެވެ. ސައިރެންގައި ނައްޓާލި އެންބިއުލާންސްއަށް މައިމަގަށް ނުކުމެވުނު އިރު ފުލުހުންގެ ޖިޕްވެސް އެހިސާބަށް އަތުވެއްޖެއެވެ.

އީއާރަށް ދަރިފުޅު ނައުހާ އާއި ޒަރީރު ވެއްދީ އެކީގައެވެ. ޒަރީރު ވަކިން އެނދެއްގައި ބޭއްވުމަށްފަހު، ޑޮކްޓަރުންނާއި ނަރުހުންނާއި އެންމެން ގޮސް ނައުހާ ވަށާލިއެވެ. ނައުހާ ސަލާމަތް ކުރުމަށް އެމީހުންނަށް ކުރެވޭނެ ހުރިހާކަމެއް ކުރިއެވެ. އެކަމަކު ކާމިޔާބެއް ނުވިއެވެ.

ބައިގަޑިއެއްހާއިރު ފަހުން، ޒަރީރުގެ ގާތަށް އައިސް ޑޮކްޓަރު ދިނީ ނައުހާގެ މަރުގެ ޚަބަރެވެ. ނައުހާ މަރުވީ އެބަރު ގަސް މުށިގަނޑުން ޖެހި އޭނާގެ ބޮލަށް ލިބުނު ގެއްލުމުގެ ސަބަބުންނެވެ. އެވާހަކަ ޑޮކްޓަރު ބުނި ނަމަވެސް ޒަރީރުއަކަށް އަދިވެސް މިވީ ގޮތެއް ޤަބޫލެއް ނުކުރެވެއެވެ. އޭނާއަށް ހީވަނީ މިއީ ބިރުވެރި ހުވަފެނެއް ކަމަށެވެ. މިހާލަތަށް ކުރިމަތިލާކަށް އަދި އޭނާ ތައްޔާރެއް ނޫނެވެ.

ހަމަ ހޭވެރިކަން ލިބި ތެދުވެވޭ ވަރުވުމުން، ދަރިފުޅު އަރީންގެ އެހީގައި ޒަރީނާވެސް އެތަނަށް އައީ އެވަގުތުގައެވެ. މާމަ ދަރިފުޅު ނައުހާގެ މަރުގެ ޚަބަރު އިވިފައި ދެވަނަ ފަހަރަށް އޭނާ ހޭހުސްވެގެން ނުވެއްޓުނީ، ނައުހާ ސަލާމަތް ނުވާނެކަން ފެނުނު މަންޒަރުން ޒަރީނާއަށް މާކުރިން އެނގިފައި ވާތީއެވެ. އަރީން މަންމަގެ ގައިގައި ބާރަށް ހިފެހެއްޓިއެވެ. ވެއްޓިދާނެ ތީއެވެ.

"ޝަފީޤާ"

ނައުހާގެ މަރުގެ ޚަބަރާއިއެކު ޒަރީރުއަށް ކުއްލިއަކަށް ހަނދާނަށް އައީ ޝަފީޤާއެވެ. ދަރިފުޅުގެ ކުއްލި ވަކިވުން އޭނާއަށް ވިސްނައިދޭނީ ކިހިނެއްހެއްޔެވެ؟ އޭނާ އެތައް ބުރައަކާއި ވޭނެއް އުފުލި ދަރިފުޅު އެސްފިޔަވެސް ޖަހާލާ ވަގުތުކޮޅެކަށްވުރެ ކުޑަ ވަގުތުކޮޅެއްގެ ތެރޭގައި ވަކިވެގެން ހިނގައްޖެކަމުގައި ބުނެދޭނީ ކިހިނަކުންހެއްޔެވެ؟ ސްކޫލަށް ނުވަތަ އެނޫން ކަމެއްގައިވެސް ގެއިން ނުކުންނަ ނަމަ، ނުވަތަ މަންމަ އާއި ބައްދަލުވެ ވަކިވާ ކޮންމެ ފަހަރަކު، "ގުޑް ބާއީ" އޭ ބުނާ ދަރިފުޅު، ވަދާޢުގެ އެންމެ ލަފްޒެއްވެސް ނުބުނެ ދުނިޔެއިން ނުކުމެގެން ހިނގައެއްޖެކަމުގައި ބުނެދޭނީ ކިހިނެއްހެއްޔެވެ؟

ނައުހާއަކީ ޒަރީރާއި ޝަފީޤާގެ 25 އަހަރުވީ ކައިވެންނަށް ލިބުނު ހަމައެކަނި ދަރިފުޅެވެ. ކައިވެންޏަށް ދިހައަހަރުގައި އެދަރިފުޅު ލިބުނީ އެމީހުން އެތައް ބޭހެއްކޮށްގެންނެވެ. އެތައް ޑޮކްޓަރުންނަށް ދައްކައިގެންނެވެ. ދުވަހަކު ދަރިއަކު ނުލިބޭނެ ކަމުގެ ހިތި ޚަބަރުވެސް އެތައް ޑޮކްޓަރުންނެއް ދިނެވެ. އެކަމަކުވެސް އެމީހުން އުއްމީދު ކަނޑައެއް ނުލައެވެ. ޑޮކްޓަރީ ބޭހާއި، ކުރެވެމުން ދިޔަ ހެޔޮ ދުޢާތަކާއި އެކު އެމީހުންގެ ހަޔާތުގެ ހުރިހާކަމެއް ނައުހާ އާއިއެކު މާތް ރަސްކަނލާގެ ފުރިހަމަކޮށްދެއްވިއެވެ.

ނައުހާއަކީ އެއްވެސް އުނިކަމެއް ނެތް ތޫނުފިލި ކުއްޖެކެވެ. ގުރޭޑް 9ގައި އޭނާއަށް ވުރެ މޮޅު ދަރިވަރެއް ސްކޫލުގައި ނެތެވެ. ހުރިހާ މާއްދާއަކުން ހުރިހާ ޓެސްޓެއްގައިވެސް އޭ ފާސް ހޯދައެވެ. ސްކޫލުގެ ވައިސް ކެޕްޓަންކަމުގެ މަޤާމް ފުރަމުން އިތުރު ހަރަކާތްތަކުގައިވެސް ފުރިހަމައަށް ބައިވެރިވެއެވެ. ނައުހާއަކީ ވިދުން ގަދަ ތަރިއެކެވެ. މައިން ބަފައިންގެ އެކަންޏެއް  ނޫނެވެ. ސްކޫލާއި ކުޅިވަރު އެސޯސިއޭޝަންތަކުންވެސް ފަޚުރުވެރިވާ ފަދަ ދަރިވަރެކެވެ.

ޝަފީޤާ ކޮބައިތޯ ބެލުމަށްޓަކައި، ގުޅާލުމަށް ފޯނު ނެގިތަނުން އަރީންއަށް ފެނުނީ، އީއާރްގެ ތެރެއަށް ސްޓްރެޗާގައި އަންހެނަކު ގެނެސް ވައްދާތަނެވެ. އެމީހާގެ ލައިގެން ހުރި ހެދުމުން އެއީ ޝަފީޤާކަން ދެނެގަންނަން އަރީނަށް އުދަގުލެއް ނުވިއެވެ. ދެވަނަ ސިކުންތުގައި އަރީންއަށް ފެނުނީ، ސްޓެރެޗާގެ ފަހަތުން އޭނާގެ ލޯބިވެރިޔާ އާޒިފާ ވަތްތަނެވެ. އޭރު ކަންވެގެން އުޅޭ ގޮތެއް އާޒިފާއަކަށް ނޭނގެއެވެ. އޮފީސް ނިމިގެން ގެއަށް އައި މަގުމަތީގައި އަރީންމެންގެ ގޭ ދޮށުގައި ކަމެއް ހިނގައިގެން އުޅޭހެން ހީވުމުން އޭނާ އެގެއަށް ވަނީއެވެ. އެޕާޓްމެންޓްގެ ދޮރު ހުޅުވާފައި ހުރި އިރު، އާޒިފާއަށް ފެނުނީ ސިޓިންގ ރޫމުގެ ތެރޭގައި ޝަފީޤާ ވެއްޓިފައި އޮއްވައެވެ.

ޑޮކްޓަރުން ޝަފީޤާއަށް ފަރުވާ ދިނުމުގައި، އަވަސްވެގަތުމުން ވެގެން އުޅޭގޮތް އަރީން އާޒިފާއަށް ކިޔައިދީފިއެވެ. އެއާއިއެކު އޭނާއަށްވެސް ލިބުނީ ސިހުމެވެ. އެވާހަކަ ޤަބޫލެއް ނުކުރެވުނެވެ. ނައުހާގެ ހަށިގަނޑު އޮތް އެނދުގެ ކައިރިއަށް އާޒިފާވެސް ޖެހިލިއެވެ. އަދި މިއީ ބިރުވެރި ހުވަފެނެއްހޭ އަރީންގެ ގާތުގައި ބުންޏެވެ.

ޝަފީޤާ ގެނައުމާއިއެކު އީއާރްގެ އެހެން އެނދެއްގައި ބާއްވައިގެން އޭނާއަށް ފަރުވާދޭން ފަށައިފިއެވެ. ހާލަތު ގޯސްކަމަށް ޑޮކްޓަރުން ބުނުމުން ވަގުތު ނަގާނުލައި ޝަފީޤާ ގެންދިޔައީ އައިސީޔޫއަށެވެ. އެކަމަކު އެހުރިހާ މަންޒަރެއް ބަލަން ޒަރީރު އިނީ ހަމަ ގަނޑުފެނުގެ ބުދެއްހެން އެއްވެސް ހަރަކާތެއް ނެތިއެވެ. އޭނާގެ ލޮލަކުން ކަރުނައެއް ނުފައިބައެވެ. ދުލަކުން އިތުރަށް ބަހެއް ނުބުންޏެވެ. އިއާރްތެރޭގައި ހޭލަ މޭލަވާ މީހުންނާއި ކޮޅުކޮޅަށް ދުވަމުންދާ ނަރުހުން އޭނާއަކަށް ނުފެނެއެވެ. ވަށައިގެންވާ މާހައުލުގެ އަޑުތައް އޭނާގެ ކަންފަތަކަށް ނީވެއެވެ. އޭނާ ހުރީ މުޅިން ހުއްޓިފައެވެ. ގަބުވެފައެވެ.

ސާޅިސް ފަސްވަރަކަށް މިނިޓްފަހުން ޑޮކްޓަރު ގެނެސްދިނީ ހިތާމަވެރި އަނެއް ޚަބަރެވެ. ޝަފީގާގެ ސިކުނޑިއަށް ލޭއެޅިފައި ވާކަމަށެވެ. އޭނާގެ ހާލަތު ނާޒުކުކަމެވެ. ކޯމާގައި އޭނާ އެތައް ދުވަހަކު އޮވެދާނެއެވެ. ނުވަތަ މަރުވެދާނެއެވެ. ގަދަވިޔަސް ޝަފީޤާގެ މުޅިން ނޯމަލް ނުވާނެ ކަމަށާއި ސިކުނޑީގެ ފަހަތުން ބޮޑުބަޔަކަށް ލޭ އަރާފައިވާކަމުގައި ޑރ ބުންޏެވެ. އަދި ފަހަރުގައި އެއްވެސް ކަމެއް، ހަމަ އެއްވެސް ކަމެއް ހަނދާންވެސް ނުހުރެ ދާނެ ކަމުގައި ޑޮކްޓަރު ބުންޏެވެ.

"އެ ގަސްމުށިގަނޑު އެތާ ބެހެއްޓީ ކާކު؟" ޑޮކްޓަރުގެ ވާހަކަތައް އަޑު އަހާފައި އާޒިފާ ހަޅޭ ލަވައިގަތެވެ. އޭނާ ބޭނުންވީ ހަމަ އެވަގުތު އެގޭ ދޮށަށްދާށެވެ. މީހެއްގެ ފަރުވާ ކުޑަކަމުން އެހެން ބައެއްގެ މުޅި ދިރިއުޅުން ފަނާވީއެވެ. އަނބުރާ ލިބުމެއް ނެތް ގޮތުގައި އާއިލާއެއްގެ ހުރިހާ އުފަލެއް ވިއްސި ވިހާލި ވީއެވެ.

" ފުލުހުން އެކަން ބަލާނެ!" އަރީން އާޒިފާ ހުއްޓުވިއެވެ. އޭނާ ފެށީ ރޯށެވެ. އިންސާނިއްޔަތުކަން ހުރި ކޮންމެ މީހެއްގެ ހިތް ކުދިކުދި ވާނެއެވެ. ހަމްދަރުދީވާނެއެވެ. އެކަމަކު ވީކަމެއް ނުވާކަމަކަށް ދެނެއް ނުވާނެއެވެ. ދިރި ތިބީންގެ މައްޗަށް އޮތީ މައްޔިތާއަށް އަދާކުރަންޖެހޭ ހައްޤުތައް އަދާކުރުމެވެ. ޖަނާޒާ ބޭއްވުމެވެ. ދިރިއުޅުމާއިގެން ކުރިޔަށް ދެވޭތޯ މަސައްކަތް ކުރުމެވެ.

ނައުހާ މަރުވިތާ 40 ދުވަސްވީފަހުން، ޝަފީޤާވެސް ކޯމާގައި ހޭ ނާރައި އޮވެ މަރުވީއެވެ. ނައުހާއަށް ވީގޮތެއް އޭނާއަކަށް ނޭނގޭނެއެވެ. އޭނާއަށް ހަމައެކަނި އެނގުނީ ދެބަފައިން އެކްސިޑެންޓެއް ވިކަމެވެ. ޒަރީރުގެ ހިތާމަތަކެއް ލުޔެއް ނުވިއެވެ. އޭނާގެ ލޮލަކުން ކަރުނައެއް ނާދެއެވެ. ދުލަކުން ބަހެއް ނުބުނެއެވެ. ކަންފަތަކަށް އަޑެއް ނުއިވެއެވެ. މީހަކު ކުރުވި ހަރަކާތެއް މެނުވީ ނުކުރެއެވެ. ދުވަސްތައް މާޒީވަމުން ދިޔައީ އެގޮތުގައެވެ.

– ނިމުނީ –