ޤާޟީ ހުކުމް އިއްވުމާއި އެކު ރާޒީއަކަށް ނުހިފެހެއްޓުނެވެ. އަޑުން އަޑުނަގައި ރޮއެގެންފިއެވެ. އޭނާގެ ހިތް ކުދިކުދިވީއެވެ. އުއްމީދުތައް ވިއްސި ވިހާލިވީއެވެ. ހަޔާތުގެ އެންމެ ފަހު އުއްމީދު ގެއްލުނީއެވެ. ދިރިހުރުމަށް ދިއްލި ހުޅުކޮޅު ނިވުނީއެވެ.

"ނޫނެކެވެ! ތިއީ ނިޔާއެއް ނޫނެވެ. އަނިޔާއެކެވެ." ޤާޟީގެ އަޑު ނުކެނޑެނީސް ރޮއެގެންފައި ރާޒީ ހަޅޭއްލަވައިގަތް އަޑުން ކޯޓު ރޫމް ދިޔައީ ގުގުމައިގެންނެވެ. އެއާއިއެކު ގާޟީ އަމުރު ކުރީ ރާޒީއަށް ހިމޭން ވާށެވެ. ނޫންނަމަ ކޯޓު ހުރުމަތް ކެނޑުމުގެ ކުށުގައި ޖަލަށްދާން ޖެހިދާނެ ކަމަށެވެ.

"ޖަލަށް ކީއްކުރަންތޯއެވެ. ދަންޖައްސާ މަރާލަން ހުކުމް އިއްވި ނަމަވެސް ތިޔައިއްވި ނިޔާއިން އެޅި ވޭނެއް މިހިތަކު ނާޅާނެއެވެ." ރާޒީވެސް ޤާޟީއަށް ރައްދު ދިނެވެ.

ދެން އައީ ދެވަނަ ހުކުމުގެ ހިނދުކޮޅެވެ. ކޯޓު ޙުރުމަތް ކެނޑުމުގެ ކުށުގައި 10 ދުވަހުގެ ޖަލު ހުކުމެއް ރާޒީގެ މައްޗަށް އިއްވީއެވެ. ކޯޓު ރޫމުގައި ތިބި ފުލުހުންގެ އޮފިސަރުން އައިސް ރާޒީ ވަށާލިއެވެ. އާއިލާގެ މީހުންގެ ތެރެއިން ކޯޓު ރޫމުގައި ތިބި ރާޒީގެ މަންމަ އާއި ބައްޕަ އަދި ދައްތަމެން ތިބީ ރޮވިފައެވެ. ހިތާމައިގެ މައްޗަށް ހިތާމައެވެ.

އޮފިސަރުންގެ ބެލުމުގެ ދަށުން ރާޒީ ކޯޓު ރޫމުން ނެރުނު އިރު، މަލާމާތުގެ ހިނިތުންވުމަކުން މައިދަތަ ހުރީ ރާޒީއަށް ބަލަހައްޓައިގެންނެވެ. ބަފައިބެ އާއި އެއާއިލާގެ އެހެން މީހުންވެސް ތިއްބެވެ. އެމީހުން ތިބީ އުފަލުންނެވެ. އެމީހުން ބޭނުންވާ ގޮތަށް މައްސަލަ ނިމުނީއެވެ.

ފެމިލީ ކޯޓުގައި އެނިމުނީ ހަޟާނާތުގެ މައްސަލައެކެވެ. ވިހޭ ގޭތެރޭ މަންމަ މަރުވުމުން، މަންމަގެ މަންމަ، ދަރިފުޅުގެ މާމަ، ދަރިފުޅު ހޯދުމަށް ކޯޓުގައި ދައުވާކުރީއެވެ. އިސްލާމީ ޝަރީއަތާއި އަމަލު ކުރެވެމުން އަންނަ ހަޟާނާތުގެ މައްސަލަތަކުގައި، ދަރިފުޅު ހަވާލުކުރާނެ އެންމެ އިސްމީހަކީ މަންމަގެ މަންމައެވެ. ދަރިފުޅުގެ މަންމަ ފަރާތުގެ މާމައެވެ. ރާޒީގެ މައިދައިތައަށް އެކަން އެނގެއެވެ. އަދި ކޯޓަށް ގޮސްފިނަމަ މައްސަލަ ނިމޭނީ އޭނާގެ ކޮޅަށްކަންވެސް އެނގެއެވެ.

ރާޒީގެ ހިއްވަރެއް ނެތެވެ. ދެފައިން ވާގި ދޫވެއްޖެއެވެ. އޭނާ ވެއްޓެން ދިޔަ ވަގުތު ހިފެހެއްޓީ ފުލުހުންނެވެ. އެމީހުން ރާޒީ އަތުލަފިކޮށްގެން ގެންގޮސް އެރުވީ އެމްބިއުލާންސަކަށް ނޫނެވެ. ޖިޕަށެވެ. ގެންދިޔައީ ހޮސްޕިޓަލަކަށް ނޫނެވެ. ޖަލަށެވެ.

އެއީ ރާޒީގެ މައިދައިތަ އާއި ބަފައިބެގެ ރޭވުމުގައި އޮތް ގޮތެވެ. ކޯޓު ހުރުމަތް ކެނޑުމުގެ ހުކުމެއްގައި ރާޒީ ޖަލަށް ލުމެވެ. ދެން އޮތީ ރާޒީ ޖަލުން ދޫކޮށްލުމުގެ ކުރިން ދަރިފުޅު އޭނާއަށް ދުވަހަކު ލޮލުން ނުފެންނާނެ ހިސާބަށް ދުރަށް ގެންދިޔުމެވެ. ރާޒީގެ ޙަޔާތުން ދަރިފުޅު މުޅިން ވަކިކޮށްލުމެވެ.

ރާޒީ އާއި ނާޝް ދިމާވީ ރިސޯޓުންނެވެ. ރާޒީއަކީ، ރިޒޯޓުގެ މެއިން ރެސްޓޯރެންޓްގެ ވޭޓަރެކެވެ. ރާއްޖެ ތެރޭގެ އާދައިގެ އާއިލާއަކަށް އުފަން އާދައިގެ ވަޒީފާއެއްގައި ހުރި މީހެއް ނަމަވެސް، އޭނާ ގެ ބުރު ސޫރައާއި ރީތި ކަމަކީ، ދެކޭ މީހުންގެ ހިތްތައް އޭނާގެ މައްޗަށް ލަންބުވާލާނެ ކަމެކެވެ. ނާޝްއަށްވެސް ވީ އެހެންނެވެ. ފުރަތަމަ ނަޒަރުން ރާޒީދެކެ ލޯބި ވެވުނީއެވެ. ދެމީހުންގެ ދެމެދުގައިވާ ފަރަޤާއި އާއިލީ ހައިސިއްޔަތާއި، މައިން ބަފައިންނާއި މުޖުތަމައު ދެކޭ ގޮތަށް ލޯމަރާލީއެވެ.

ރާޒީއަށް އެތައް އަންހެންކުދިންނެއްގެ ހުށައެޅުންތައް ލިބެއެވެ. ދިވެހިންނާއި ބިދޭސީންގެ ފަރާތުންވެސް މެއެވެ. އޭގެ ތެރޭގައި މުއްސަނދި އެތައް އާއިލާއެއްގެ ކުދިން ތިއްބެވެ. އެމީހުންގެ އަދާތަކާއި ހުށައެޅުންތަކުން ރާޒީގެ ހިތެއް ނުލެނބުނެވެ. އެއަށްވުރެ ބޮޑަށް އޭނާގެ ހިތް އޮތީ ޒަޚަމްވެފައެވެ.

ރާޒީގެ ފުރަތަމަ ލޯބިވެރިޔަކީ، އަސްމާއެވެ. އެއީ ޅަދުވަހުގެ ރަހުމަތްތެރިއެކެވެ. އެދުރުދައިތަގެއާއި ސްކޫލުގައި، ރަށުގެ ހޭޅިފަށާއި ފުއްޓަރުގައި، ދަނޑުމައްޗާއި، ތުނޑީގައި ދެމީހުން ދުވަސްތައް ހޭދަކުރީ އެކީގައެވެ. ޅަދުވަހުގެ އެކުވެރިކަންވެސް ޒުވާން ވަމުން އައި ލޭގެ ހޫނާއި އެކު އިޝްޤީ ލޯތްބަށް އޮތީ ބަދަލުވެފައެވެ. ސްކޫލު ނިމުނު އިރު ދެމީހުންވެފައި ތިބީ އެކަކު އަނެކަކާއި ވަކިން ދިރިނޫޅެވޭނެ ދެލޯބިވެރިންނަށެވެ.

ކުޑައިރުއްސުރެ އެކުގައި އުޅެ ބޮޑުވި ރާޒީ އާއި އަސްމާގެ ގުޅުމާއި މެދު ދެފަރާތުގެ އާއިލާވެސް ތިބީ ރުހިގެންނެވެ. އެހެންކަމުން ބައްދަލުވެ އުޅުމަކަށް އެކުގައި ތަންތަނަށް ގޮސް ހެދުމަކަށް އެދެމީހުންނަކަސް ހުރަހެއް ނެތެވެ. ރާޒީ އާއި އަސްމާގެ ގުޅުން ރަށުގެ އެންމެން ދަނެއެވެ. އެކަމާއި މެދު ނަފުރަތުވާ ނުވަތަ ހަސަދަވެރިވާ މީހަކު ނެތެވެ. ރަށު ސްކޫލުން އެންމެ މަތީ ވަނައިގައި ފާސްވަމުން އައި ދެކުދިން އޯލެވެލް ނިންމާލީވެސް އެންމެ ގަދަ ދިހަ ކުދިންގެ ތެރޭގައި ހިމެނިގެންނެވެ.

ރާޒީ އާއި އަސްމާ ނިންމައިގެން ތިބީ އޭލެވެލް ނިމުމުން އަވަހަށް ކައިވެނިކުރާށެވެ. އޭގެ ފަހުން ދެމީހުން އެކުގައި ރާއްޖެއިން ބޭރަށް ކިޔަވަން ދާށެވެ. އެކަމަކު އެމީހުންގެ ޕްލޭނާއި ތަޤުދީރު ދެކޮޅު ހެދީއެވެ. އާއިލާގެ މީހުންނާއި އެކު ފަޅުރަށަށް ދަތުރުގޮސް އުޅެނިކޮށް އަސްމާ ގެނބުނީއެވެ. އޭނާ ގެނބުނީ ފުންވިލުގެ ތެރެއަށް އޮޔާ ގެންދިޔަ އާއިލާގެ ކުޑަކުއްޖަކު ސަލާމަތްކޮށްދޭން އުޅުމުގެ ތެރޭގައެވެ. އެކުއްޖާ ސަލާމަތްވިއެވެ. ގެއްލުނީ އަސްމާގެ ފުރާނައެވެ.

އަސްމާ ގެނބުނު ޚަބަރު ރާޒީއަށް ލިބުނީ އަސްމާގެ އާއިލާގެ އެހެން ފިރިހެނުންނާއި އެކު މަސްހިފަން ފަޅުތެރޭގައި އުޅެނިކޮށެވެ. ރާޒީ އާއި އަސްމާގެ ބޭބެމެންނަށް އާދެވުނު އިރު، އަސްމާ އޮތީ ވިލުގެ އަޑީގައެވެ. ވިލަށް ފުންމާލައި އަސްމާ ނެގީވެސް ރާޒީއެވެ. އެއްގަމަށް އަރުވައި ސީޕީއާރްދީ ހެދީވެސް ރާޒީއެވެ. އެކަމަކު ވިންދު ހުސްވަމުން ހުސްވަމުން ދިޔަ އަސްމާ ލޯހުޅުވައެއް ނުލިއެވެ. ރާޒީގެ އަތުން އަސްމާ ބީވީއެވެ.

އެހިތާމައިގައި ރާޒީގެ ހަޔާތް ބަނަވީއެވެ. އުއްމީދުތައް ގެއްލުނީއެވެ. އާއިލާ އާއި ރަށްދޫކޮށްލައި، ރިޒޯޓެއްގެ އާދައިގެ ވަޒީފާއަކަށް އޭނާ އައީ އެހެންވެއެވެ.

ރިޒޯޓުގައި ރާޒީ އުޅެމުން އައީވެސް އެކަހެރި އެކަނިވެރި ދިރިއުޅުމެކެވެ. ވަޒީފާގައި އޭނާ ކުރަންޖެހޭ ކަމެއް ނޫނީ ނުކުރެއެވެ. ކޮންމެހެން ވާހަކަ ދައްކަންޖެހޭ މީހަކާއި ނޫނީ ވާހަކައެއް ނުދައްކައެވެ. އޭނާގެ ބަސްމަދުވެފައި ހިމޭނެވެ. މަޑުމައިތިރިވެފައި ކިޔަމަނެވެ. ރިޒޯޓުގެ މެނޭޖްމެންޓުގެ ހުރިހާ ސްޓާފުންވެސް އަދި ފަތުރުވެރިންނަށްވެސް ރާޒީ ކަމުދެއެވެ. އެ އެންމެންގެވެސް އޮންނަނީ އެއް ޝަކުވާއެކެވެ. ރާޒީއަކީ، ވާހަކަ ދައްކައި ހީ ސަމާސާކޮށް އުޅޭ މީހެއް ނޫންވީމައެވެ. ރާޒީގެ ހަޔާތުގެ އުފާތަކާއި ހިނިތުންވެސް މަރުވެ ވަޅުލެވިއްޖެ ކަމެއް އެހެން މީހުންނަކަށް ނޭނގެއެވެ. ރާޒީ އޭނާގެ އަމިއްލަ ހަޔާތުގެ އެއްވެސް ވާހަކައެއް އެއްވެސް މީހަކާއި ހިއްސާ ނުކުރާތީ އެކަކަށްވެސް ރާޒީގެ މާޒީއެއް ނޭނގެއެވެ. އޭނާގެ ހަޔާތުގެ ހިމޭންކަމާއި ފަޅުކަމުގެ ސަބަބެއް ނުވިސްނެއެވެ. އޭނާ ހިނިތުން ނުވަނީ ކީއްވެ ކަމެއް ނޭނގެއެވެ.

ނާޝްއަށް ރާޒީ ފުރަތަމަ ފެނުނީ، ރިޒޯޓުގެ މުވައްޒަފުންނަށް ހާއްސަ ސަރަހައްދުގައި އޭނާ ފެންވަރަށް ހުއްޓައެވެ. މުވައްޒަފުން މޫދަށް އެރިފައި އައިސް ފެންވެރުމަށް، ހާމައަށް ހުންނަ އެ ފެންމާގެ ކައިރީގައި ރާޒީ ހުއްޓައި ފެނުނު ފުރަތަމަ ވަގުތުވެސް އޭނާގެ ހިތް ދޫވެއްޖެއެވެ. ކަޅިޖަހާ ނުލައި އެތައް އިރަކު ދުރުގައި ބަލަން ހުއްޓެވެ. ހީވަނީ އެހާ ރީތި މީހަކު ދުވަހަކުވެސް އޭނާ ނުދެކޭ ހެންނެވެ.

ރާޒީއަށް ފުރަތަމަ ނާޝް އާއި ބައްދަލުވީ ރިސޯޓުގެ މެއިން ރެސްޓޯރެންޓުންނެވެ. އޯޑަރު ނަގަން ނާޝްގެ މޭޒުކައިރީގައި ހުރި އިރު، ނާޝްގެ ހަރަކާތާއި ބަސް މަގު ހުރި ގޮތުން ރާޒީ ރުންކުރުވިއެވެ. ނާޝް ރާޒީއަށް ބަލާ ނަޒަރުގެ ފަހަތުގައި ކޮންމެވެސް އެހެން ބޭނުމެއް އޮތްކަން ދެނެގަނެވުނެވެ. އެއާއެކު ރާޒީ ދިޔައީ ދުރަށެވެ. އޯޑަރު ނަގާފައި އެޓޭބަލް ހަވާލު ކުރީ އެހެން ވޭޓަރަކަށެވެ.

ރާޒީގެ ސަމާލުކަން ނުލިބުމުން ނާޝް ދިޔައީ އޭނާގެ ރޫމަށެވެ. އެއީ ރިޒޯޓުގެ އެންމެ މަތީ ފަންތީގެ މުވައްޒަފުންނަށް ޚާއްސަ އެޕާޓްމަންޓެކެވެ. ނާޝް ކާތަކެއްޗަށް އޯޑަރުކޮށް، ވޭޓަރަކަށް ރާޒީ ފޮނުވައިދޭން މެނޭޖަރުގެ ކައިރީގައި އެދުނެވެ. ނާޝްއަކީ ރިޒޯޓުގެ އޯނަރު ފިރާޤުގެ ހުރި ހަމަ އެކަނި އަންހެންދަރިފުޅަށް ވުމުން އޭނާ ބުނާގޮތަކަށް ބުނާ ކަމެއް ވެއެވެ.

ކާތަކެތި ތަބަކުގައި އަތުރައިގެން ރާޒީ އެރޫމަށް ދިޔައިރު އެއީ ނާޝްގެ ރޫމު ކަމެއް އޭނާއަކަށް ނޭނގެއެވެ. ދޮރުގައި ޓަކި ދިނުމުން ނާޝް އައިސް ދޮރު ހުޅުވާލުމުން ރާޒީގެ މޫނު ދިޔައީ ބަނަ ވެގެނެވެ. އެކަމަކު އެކަން ނުދައްކައި ވޭތޯ އޭނާ ބެލިއެވެ. ތަށިތައް މޭޒުމަތީގައި ބަހައްޓާފައި ހިނގައިގަތް ވަގުތު ރާޒީއަތުގައި ހިފެހެއްޓީ ނާޝް އެވެ. ރާޒީއަށް ހީވީ ކަރަންޓުގައި ޖެހުނީހެންނެވެ. ތެޅިގެންފައި އޭނާ އަތްފޮޅުވާލިއެވެ.

ދެވަނަ ފަހަރަށް ކުރިމައްޗަށް ނާޝް ރާޒީގެ ކުރި ބެއްދިއެވެ. އަދި ރާޒީގެ ގައިގައި ބާރަށް ބައްދައިގަތެވެ. ރާޒީއަށް ހަދާނެ ގޮތް ހުސްވެ ކަންބޮޑުވިއެވެ. ހަމައެކަނި ރާޒީއަށް ބުނެވުނީ ދޫކޮށްލާށޭއެވެ. އެތައް އިރަކު ރާޒީގެ ގައިގައި ބައްދައިގެން ނާޝް ހުއްޓެވެ. ޖެހި ބުދެއްހެން ރާޒީ ހިމޭނުން ހުއްޓެވެ.

އެތައް އިރަކު އެހެން ހުރުމަށް ފަހު، ނާޝް ރާޒީގައި ދޫކޮށްލުމަށްފަހު އަތުގައި ހިފައިގެން ގެނެސް، އެނދުމަތީގައި ބޭންދިއެވެ. ބަސް އަހާ ކުޑަކުއްޖެއް ފަދައިން ރާޒީ އިނީ އިސްޖަހައިގެންނެވެ.

ވާހަކަފެށީ ނާޝްއެވެ. އޭނާއަށް ރާޒީ ދެކެ ލޯބި ވެވިއްޖެ ކަމެވެ. އެކުގައި އުޅެން ބޭނުންވާ ކަމެވެ. އޭނާގެ ހަޔާތުގެ ފަޅުކަން ފޫބައްދައިދޭނެ ބައިވެރިއަކަށް ރާޒީ ހަދަން ބޭނުންވާކަމެވެ.  އެކަމަކު ނާޝްއަކީ ކިހާ ފެންވަރެއްގެ ކާކުކަމެއް ރާޒީގާތުގައި ނާޝްއެއް ނުބުނެއެވެ.

އެދުވަހަށް ފަހު ނާޝް އާއި ރާޒީގެ ގުޅުން މަޑުމަޑުން ބަދަހިވަމުން އައެވެ. އެކަމަކު އެއީ އެއްފަރާތުން ދެވޭ ލޯތްބަކުންނެވެ. ނާޝްގެ ކޮޓަރިއަށް ރާޒީ އަންނަނީ މުވައްޒަފެއްގެ ގޮތުގައެވެ. ލޯބިވެރިއެއްގެ ގޮތުގައެއް ނޫނެވެ. ނާޝްގެ ހީލުމަށް ރައްދު ހީލުމެއްވެސް ރާޒީ ދޭންފެށީ މަސް ދުވަސް ވީފަހުންނެވެ. އަނގައިން ބުނަންވެސް 2 މަސް ހޭދަވިއެވެ. ނާޝް ވާހަކަ ދައްކާ ހުރިހާ ވާހަކައެއް ދައްކައި ނިމެންދެން ރާޒީ ހުރެއެވެ. އެކަމަކު ޖަވާބުގައި އެންމެ ލަފުޒެއްވެސް އޭނާ ބުނުމަށް 2 މަސް ދުވަސް ހޭދަވިއެވެ.

ނާޝްއަކީ ރިޒޯޓުގެ އޯނަރުގެ ދަރިފުޅުކަން، ރާޒީއަށް އެނގުނީ، ނާޝް ކައިވެނީގެ ވާހަކަ ދެއްކި ދުވަހުއެވެ. އެދުވަހު ރާޒީ ކައިވެންޏާއި ދެކޮޅު ހެދީ ދެމީހުންގެ ދެމެދުގައި ހުރި ފަރަޤު ބޮޑުކަން އިހްސާސް ވުމުންނެވެ. ނާޝް އޭނާގެ ހަޤީޤަތް ސިއްރުކޮށްފައި އޮތުމުންނެވެ.

ޖެހިގެން އައި ދުވަހު އޮފް ޗުއްޓީ ނަގައިގެން ނާޝްއަށް އަންގާވެސް ނުލައި، ރާޒީ އައީ އޭނާގެ ރަށަށެވެ. އޭގެ އަނެއް ދުވަހު އޭނާ ވަޒިފާއިން ވަކިވާން ސިޓީ ފޮނުވިއެވެ. އަދި ފޯނުގެ ސިމްވެސް ބަދަލުކުރިއެވެ.

ހަޔާތުގެ ފަޅުކަން ރާޒީއަށް އިހްސާސްކުރެވެން ފެށީ، ރަށަށް އައުމުންނެވެ. އޭނާގެ ހިތުގައިވެސް ނާޝްއަށް ޖާގައެއް އެބައޮތްކަން އިހްސާސްވީ ނާޝް އާއި ދުރަށް އައުމުންނެވެ. އޭނާގެ ހިތް އޭނާގެ އިޚްތިޔާރުގައި ނެތްކަން އެނގުނީ ނާޝް ނުފެނި ދުވަސްތައް ވޭތުވާން ފެށުމުންނެވެ.

ރަށަށް އައިސް މަހެއް ވީފަހުން، ރާޒީ އެހެން ރިޒޯޓަކަށް ވަޒީފާއަށްދާން ތައްޔާރުވިއެވެ. ރާޒީގެ މައިން ބަފައިންވެސް ހީކޮށްގެން ތިބީ ރާޒީ ރަށަށް އައީ ޗުއްޓީގައި ކަމަށެވެ. އެހެންކަމުން އެމީހުންވެސް ރާޒީ އާއި އެއްވެސް ސުވާލެއް ނުކުރެއެވެ. އަސްމާގެ ވަކިވެ ދިޔުމަށްފަހު ރާޒީގެ މަންމަވެސް އޭނާގެ ގާތުގައި ކައިވެނީގެ ވާހަކައެއް ނުދައްކައެވެ. އެވާހަކަ ދައްކާނެ ނުވަތަ ފަށާނެ ގޮތެއްވެސް ނޭނގެނީއެވެ. އެކަމަކު ކޮންމެވެސް އެއް ދުވަހަކުން ރާޒީވެސް ޒަވާޖީ ހަޔާތެއް ފަށައި އުފަލުގައި އުޅޭތަން ދެކެން ރާޒީގެ މަންމަވެސް ބޭނުންވެއެވެ.

އަލަށް ވަޒިފާ ހަމަޖެހުނު ރިޒޯޓަށް ރާޒީ ފުރަން އޮތް ދުވަހު، ކުއްލިއަކަށް ރާޒީގެ ރަށަށް އައީ ނާޝްގެ ބައްޕަ އާއި ތިމާގެ އެހެން ފިރިހެނެކެވެ. އެމީހުން އައީ ރާޒީ ބަލައެވެ. ސަބަބެއް ނުބުނެއެވެ. އެކަމަކު ކޮންމެވެސް ކަމެއް ގޯސްވީކަން ރާޒީއަށް އެނގުނެވެ. އެމީހުން އެދުނީ ރާޒީ އެމީހުންނާއި އެކު މާލެ ދިޔުމަށެވެ. އެކަމަކު ރާޒީ ކުރީ އިންކާރެވެ. ފާޅުގައި ހެދީ ދެކޮޅެވެ.

އެންމެ ފަހުން ނާޝްގެ ބައްޕަ ނާޝްގެ ހާލަތު ކިޔައި ދިނެވެ. ރާޒީގެ ވަކިވުމުން އޭނާއަށް ކޮށްފައިވާ ފުން އަސަރުތައް ބުނެދިނެވެ. އަދި ނާޝްއަކީ ޝޮކް ޖެހޭ ކުއްޖަކަށް ވާތީ އަބަދުވެސް އޭނާ އުފަލުގައި ބަހައްޓަން ޑޮކްޓަރުން އިރުޝާދު ދީފައިވާ ކަމަށް ބުންޏެވެ. ނާޝްގެ ފަރުވާއަކީ ރާޒީ ކަމާއި އެނޫން އެއްވެސް ގޮތެއް ނެތްކަމުގައި ބުންޏެވެ.

އެކަމަކުވެސް ރާޒީ ދާކަށް ޤަބޫލެއް ނުވެވުނެވެ. އެއީ ރަނގަޅުގޮތެއް ކަމުގައި ނުދެކެވުނެވެ. އެކަމަކު ރާޒީގެ ނިންމުން ބަދަލު ކުރީ މަންމަ ކުރި އާދޭހަށެވެ.

މާލެ އައި ގޮތަށް ނާޝްގެ ބައްޕަ އާއި ބޭބެ ރާޒީ ގޮވައިގެން ފުރީ ސިންގަޕޫރަށެވެ. އޭރު ނާޝް އޮތީ ސިންގަޕޫރުގެ ހޮސްޕިޓަލެއްގައި އެޑްމިޓްކޮށްފައެވެ. ނާޝް އޮތް ޕްރައިވެޓް ރޫމަށް ނާޝްގެ ބޭބެ އާއިއެކު ގޮސް ވަތް ފުރަތަމަ ދުވަހުވެސް ރާޒީގެ ހިތް ނުހުއްޓުނީ ކިރިޔާއެވެ. އޮކްސިޖަނާއި މެޝިންތަކުގެ އެހީގައި ކިރިޔާ ދިރިއޮތް ނާޝް ފެނިފައެވެ. ރާޒީގެ ކުއްލި ވަކިވުމުން ނާޝްއަށް ތަހައްމަލް ނުކުރެވުނީއެވެ.

ރާޒީގެ ހުރިހާ ވަގުތެއް ހޭދަކުރަމުން އައީ ނާޝް ގާތުގައި ހޮސްޕިޓަލުގައެވެ. ރާޒީ ނާޝް އާއި ވާހަކަ ނުދެއްކި ނަމަވެސް، ރާޒީގެ  ހަށިގަނޑުގެ ވަހާއި ފިރުމުންތަކުން ނާޝްގެ ހަށިގަނޑަށް އައީ އަލުން ދިރުން ލިބެމުންނެވެ. މަޑުމަޑުން ނާޝްގެ ހާލަތު ރަނގަޅުވަމުން އައިސް މުޅިން ރަނގަޅުވާން ހަތަރު މަސް ދުވަސް ހޭދަވިއެވެ.

ނާޝް ހޮސްޕިޓަލުން ދޫކޮށްލުމާއި އެކު އޭނާ ބޭނުންވީ ކައިވެނި ކުރާށެވެ. އެހެންވެ ނާޝް އާއި ރާޒީގެ ކައިވެނި ކުރެވުނީ ވަރަށް އާދައިގެ ގޮތެއްގައި ސިންގަޕޫރުގައެވެ.

ރާޒީ އާއި ނާޝްގެ ކައިވެންޏަކީ ރާޒީއަށް މަޖުބޫރެކެވެ. ލޯތްބެއް އުފަލެއް ނެތް ކައިވެންޏެއް ކަމުގައި ރާޒީ ހީކުރިއެވެ. އެކަމަކު، އޭގެ ކުރިން ދުވަހަކުވެސް އިހްސާސް ވެފައި ނުވާ ފިރުމުންތަކާއި ބީހުންތަކުން، ރާޒީގެ ހިތް ނާޝްގެ މައްޗަށް ލެނބޭކަށް ގިނަ ދުވަހެއް ނުވިއެވެ. ނޭގި ހުއްޓައި ރާޒީއަށްވެސް ލޯބި ވެވުނީއެވެ.

ނާޝް ބަލިވެ އިނުމަކީ އޭނާގެ ފުރާނައަށް ނުރައްކާވެދާނެ ކަމެއްކަން، ރާޒީއަށް އެނގުނީ ކައިވެންޏަށް ހަތަރު މަހުގައި ނާޝް ބަނޑުބޮޑުކަން އެނގުނު ފަހުންނެވެ. އެވާހަކަ ނާޝްގެ މަންމަވެސް ބައްޕަވެސް ޚުދު ނާޝްވެސް ރާޒީގެ ގާތަކު ނުބުނެއެވެ. އެކަމަކު ނާޝް ބަނޑު ބޮޑުކަން އެނގުމުން އާއިލާގެ ތެރެއަށް އުފާވެރިކަމެއް އައުމުގެ ބަދަލުގައި މެދުވެރިވީ ނުތަނަވަސް ކަމެވެ. ރާޒީ އާއި މެދު މައިދައިތަ އާއި ބަފައިބެވެސް ދެކޭ ގޮތް ކުއްލިއަކަށް ބަދަލުވީއެވެ. ނުރުހުމުގެ ބަހެއް ނުބުންޏަސް އެމީހުންގެ އަމަލުތަކުން ރާޒީ އާއި މެދު ނުރުހޭކަން އައީ ފާހަގަ ވަމުންނެވެ.

އެކަމަކު ނާޝް ހުރީ އުފަލުންނެވެ . އޭނާ ރާޒީއަށް ވިސްނައި ދެމުން އައީ ހުރިހާކަމެއް ރަނގަޅުވާނެ ކަމަށެވެ. އެކަމަކު ކަންތައްވީ ޑޮކްޓަރުން އިންޒާރު ކުރި ގޮތަށެވެ. ވިހެއުމުގެ ތެރޭގައި ލޭ މަނާނުވެ، ނާޝް ނިޔާވީއެވެ. ނާޝް ނިޔާވުމުން، ރާޒީ ދަރިފުޅު ގޮވައިގެން ރާއްޖެ އައިސް އޭނާގެ ރަށަށް ދިޔައީ، މައިދަތަ އާއި ބަފައިބެގެ ނުޤަބޫލުގައެވެ. އެމީހުން ބޭނުންވީ ދަރިފުޅު ދީފައި ރާޒީ އެމީހުންގެ އާއިލާ އާއި ވަކިވެގެން ދާށެވެ.

ކޯޓު ހުރުމަތް ކެނޑުމުގެ ހުކުމުގެ މުއްދަތު ހަމަވެ، ރާޒީ ޖަލުން މިނިވަން ވި އިރު، މައިދައިތަ އާއި ބަފައިބެ ދަރިފުޅު ގޮވައިގެން ރާއްޖެދޫކޮށް ހިނގައްޖެއެވެ. ލޯބިވެރިޔާވެސް ލޯބިވީ އަނބިމހާވެސް، އަދި ދަރިފުޅުވެސް ބީވެ ރާޒީ އެކަނިވީއެވެ. އެހިތާމައިގައި ރާޒީ އޭގެ ފަހުން ދިރިއުޅެމުން ދިޔައީ ކުރިއަށް ވުރެވެސް މާ އެކަނިވެރި ހިމޭން ދިރިއުޅުމެވެ.

— ނިމުނީ —