އިދިކޮޅުގައި އިސްކޮށް ހަރަކާތްތެރިވާ 8 ބޭފުޅެއްގެ ކޮރަޕްޝަން މައްސަލަތަކެއް މިހާރުވެސް ތަހުގީގް ކުރަމުންދާކަމަށް އެމްޑީޕީގެ ޕާލިމަންޓްރީ ގްރޫޕްގެ ލީޑަރު އަލީ އާޒިމް ވިދާޅުވެއްޖެއެވެ.
އެމްޑީޕީން ނެރެމުންދާ "ޚަބަރު ސިޓީ"ގެ އަށްވަނަ އަދަދުގައި އާޒިމް ލިޔުއްވާފައިވާ ލިޔުމުގައިވަނީ ސިޔާސީ މަސްރަހުގައި މިހާރު ހުރި ގިނަ މައްސަކަތަކަށް އިޝާރާތްކޮށް ވާހަކަ ދައްކަވާފައެވެ. މީގެ ތެރެއިންވެސް އިދިކޮޅު ފަރާތްތަކުން "އިންޑިޔާ އައުޓް"ގެ ނަމުގައި ކުރަމުންދާ ކެންޕެއިނަށް އިޝާރާތް ކުރައްވަމުން އާޒިމް ވިދާޅުވީ މިކެމްޕެއިންނަކީ މިކަމުގައި އިސްކޮށް ހަރަކާތްތެރިވާ ބޭފުޅުންގެ ބޮޑެތި ކޮރަޕްޝަންގެ މައްސަލަތަކެއް ބަލަމުންދާތީ އެކަމާއި ދެކޮޅަށް ކުރަމުންދާ ކެންޕެއިނެއްކަމަށެވެ.
ދައުލަތުގެ އެއްވެސް މުއައްސަސާއަކުން އަދި ތަޙުޤީޤީ އިންދާރާއަކުންވެސް ކޮރަޕްޝަންގެ މައްސަލަތަކެއް ބަލަމުންދާކަމަށް ހާމަކޮށްފައިނުވާ އަށް ބޭފުޅުންގެ ނަން އާޒިމްވަނީ ހާމަކޮށްފައެވެ.
އިންޑިޔާ އައުޓް" ގޮވައި ކުރީސަފުގައި އެތުރިފައިތިބި މީހުންނަށް ވިސްނާއިރު މީގެތެރެއިން ގިނަ މީހުންގެ ކޮރަޕްޝަންގެ ތުހުމަތު ކުރެވޭ ބޮޑެތި މައްސަލަތަކެއް މިހާރުވެސް ދަނީ ބެލެވެމުން. އަދުރޭ، ސައީދު، ޢައްސާން، މުންދު، ޝިޔާމް، ނިހާން، ރިޔާޒް ރަޝީދު އަދި އަލީ އާރިފް މެންފަދަ މީހުނާއި ގުޅޭ ތަހުޤީޤު ކަމާއިބެހޭ އިދާރާތަކުން ދަނީ ކުރަމުން.
– އަލީ އާޒިމް
އާޒިމްގެ މިފަދަ ބޮޑު ތުހުމަތުތަކެއް ބައެއް ބޭފުޅުންގެ ބޮލުގައި އަޅުވާފައިވާއިރު، މި 8 ބޭފުޅުންނާއި ގުޅުންހުރި މައްސަލަތަކެއް ބަލާކަމެއް އެއްވެސް އިދާރާއަކުން މިހާތަނަށް ހާމަކޮށްފައި ނުވެއެވެ. އާޒިމްގެ މިވާހަތަކަށް އިދިކޮޅު ޕީއެންސީގެ ނައިބް ރައީސް އިބްރާހިމް ޝުޖާއުވަނީ ރައްދު ދެއްވާފައެވެ. އޭނާ ވިދާޅުވީ މިއުޅެނީ "ޖަލަށް އިން" ނުވެވިގެން ކަމަށެވެ. އަދި ޖަލުގައި އޮންނައިރު ޖެހިގެން އޮންނަ ގޮޅީގައި އޮންނާނީ އަލީ އާޒިމްކަމަށް ޝުޖާއު ވިދާޅުވިއެވެ.
މިއުޅެނީ ޖަލަށް "ޖަލަށް އިންވޭތޯ ބްރޯ. ޖަލުގައި މަށާ ޖެހިގެން އޮންނާނީ އަލީ އާޒިމް. ގަޓު
– އިބްރާހިމް ޝުޖާއު
އާޒިމްގެ ލިޔުމުގައިވަނީ "އިންޑިޔާ އައުޓް" ގެ ނަމުގައި ގޮވާލަމުންދާ ގޮވާލުންތަކަކީ ސަރުކާރުން ވައްކަމާއި ކޮރަޕްޝަންގެ މައްސަލައް ބަލާތީ އެކަމުގެ އަޑު ކަޑުވާލުމަށް ކުރާ ކަމެއްގެ ގޮތުގައި ސިފަކުރައްވާފައެވެ. އަދި އޭނާވަނީ އިދިކޮޅު ފަރާތްތަކުން ޒިންމާދާރުކަމާއިއެކު ސަރުކާރުން ގޯސްކޮށް ކަމެއްކުރާނަމަ އެކަމެއް ރަނގަޅު ކޮށްދިނުމަށް އެދިވަޑައިގެންފައެވެ.
ހިޔާނާތުގެ ތުހުމަތުތަކެއްކޮށް އިދިކޮޅު އިސް ސަފުގައި ތިއްބެވި ބޭފުޅުންގެ މައްސަލަތަކެއް ބަލަމުންދާ ކަަމަށް ވިދާޅުވެ އަލީ އާޒިމް ނަންތަކެއް އާއްމުކުރެއްވިއިރު، ތަހުގީގީ އެއްވެސް އިދާރާއަކުން މިހާތަނަށް ރަސްމީކޮށް މި ބޭފުޅުންނަށް ތުހުމަތުކޮށް އެމްއެމްޕީއާރުސީގެ ހިޔާނާތުގެ މައްސަލަތަކެއް ބަލަމުން އަންނަ ކަަމަށް އާއްމުކޮށްފައެއް ނުވެއެވެ.
އެމްއެމްޕީއާރުސީގެ ޚިޔާނާތުގެ ފައިސާ 267 ފަރާތަކަށް ލިބުނުކަމަށް އެ މައްސަލަ ތަޙްޤީޤުކުރާ އިދާރާތަކުންވަނީ ވިދާޅުވެފައެވެ. ޚިޔާނާތުގެ ފައިސާ ލިބިފައިވާ ފަރާތްތަކުގެ ތެރޭގައި 18ވަނަ ރައްޔިތުންގެ މަޖިލީހުގެ 44 މެމްބަރަކާއި، ރައްޔިތުންގެ މަޖިލީހުގެ މިހާރުގެ 16 މެމްބަރަކާއި، މިނިވަން މުވައްސަސާތަކުގައި އިސްކޮށް ތިއްބެވި 5 ބޭފުޅަކުވެސް ހިމެނިވަޑައިގަންނަވައެވެ. މީގެ އިތުރުން މިހާރު ސަރުކާރުގެ މަގާމުގައިތަކުގައި ތިބި 7 މީހަކާއި، 7 ފަނޑިޔާރެއްގެ އިތުރުން ސަލާމަތީ ބާރުތަކުގައި ހިމެނޭ 23 އޮފިސަރެއްވެސް މިމައްސަލައިގެ ތެރޭގައި ހިމެނެއެވެ.
އެމްއެމްޕީއާރުސީގެ ޚިޔާނާތުގެ ފައިސާތައް ބޭނުނުންކޮށްފައި ވަނީ ސިޔާސީ މަންފާތަކެއް ބޭނުންކުރުމަށްކަމަށް ކޮރަޕްޝަން އެންޑް އެސެޓް ރިކަވަރީ ކޮމިޝަނުންވަނީ ބުނެފައެވެ. މިހާތަނަށް ކުރެވުނު ތަހުޤީޤުތަކުން އެގޭ ގޮތުގައި އެމްއެމްޕީއާރުސީގެ ޚިޔާނާތް 3.4 ބިލިޔަން ރުފިޔާއަށް އަރައެވެ.
ކޮމެންޓު ފޮނުވާ