އަކްޝޭ ކުމާރާއި ޓްވިންކަލް ކަންނާ ވަނީ ސޯޝަލް މީޑިއާގައި ލޯބިން ފުރުފައިވާ ސެލްފީ އެއް ހިއްސާކޮށްފަ އެވެ. މި ފޮޓޯ ހިއްސާކުރުމަށް އަކްޝޭ ބޭނުންކޮށްފައިވަނީ އިންސްޓަގްރާމެވެ.
މި ފޮޓޯއިން މި ދެމަފިރިން ތިބީ ޗުއްޓީގައި ކަން އެނގެއެވެ. ޗުއްޓީއަށް ގޮސްފައިވަނީ ކޮންތަނަކަށް ހާމަ ކޮށްފައި ނުވިނަމަވެސް އެއީ މޫދުކައިރިކަން މި ފޮޓޯ ބަލާލުމުން ލަފާކޮށްލެވެއެވެ.
ބެލެވޭ ގޮތުގައި އަކްޝޭ މިހާރު ޗުއްޓީ ހޭދަކުރަމުން ދަނީ ރާއްޖޭގައެވެ. ޕްރައިވެޓް ޖެޓެއްގައި އަކްޝޭ ރާއްޖެ އައިސްފައިވާ ކަމަށް މައުލޫމާތު އެނގޭ ފަރާތަކުން ވަނީ ކަށަވަރުކޮށްދީފަ އެވެ.
މި ފޮޓޯ އިންސްޓްގަރާމުގައި ހިއްސާ ކުރަމުން އަކްޝޭ ބުނެފައިވަނީ މި ޕެންޑަމިކް ތެރޭގައި މިފަދަ ޗުއްޓީއެއް ހޭދަކޮށްލަން ލިބުމުން ވަރަށް އުފާ ވާކަމަށެވެ. އަދި އުފާވެރި މާހައުލެއްގައި އުޅުމުން ހިތްހަމަޖެހުންވެސް ލިބިގެންދާކަމަށްށެވެ. މި ފޮޓޯ ޓްވިންކަލް ވެސް ވަނީ ހިއްސާކޮށްފަ އެވެ.
View this post on Instagram
ޓްވިންކަލް އާއި އަކްޝޭ ކައިވެނި ކޮށްފައިވަނީ 2000 ވަނަ އަހަރު އެވެ. ދާދި ފަހުން ވަނީ މި ދެމީހުންގެ ކައިވެންޏަށް 21 އަހަރު ފުރިފައެވެ. އަކްޝޭ ބުނެފައިވަނީ އެކުގައި 20 އަހަރު ހޭދަވެފައިވީ ނަމަވެސް އަދިވެސް ޓްވިންކަލް ފެނުމުން އޭނާ އުފާވާ ކަމަށެވެ. ޓްވިންކަލް އާއި އަކްޝޭއަށް ވަނީ ދެކުދިން ލިބިފައެވެ. އާރަވް އަދި ނިތާރާއެވެ.
މިދިޔަ އަހަރުގެ އޯގަސްޓު މަހުން ފެށިގެން އަކްޝޭ ދަނީ ވަރަށް ގިނަ ޕްރޮޖެކްޓުތަކުގައި މަސައްކަތް ކުރަމުންނެވެ. އެގޮތުން "ބެލްބޮޓަމް" ފިލްމުގެ ޝޫޓީންގ ސްކޮޓްލޭންޑުގައި ކޮށްފައިވާއިރު "އަތުރަންގީ ރޭ"ގެ ޝޫޓިންގ ވަނީ އިންޑިއާގެ އެކި ހިސާބުތަކުގައި ކުރިއަށް ގެންގޮސްފަ އެވެ. މިވަގަތު އަކްޝޭ އިންތިޒާރު ކުރަމުން ދަނީ އޭނާގެ ފިލްމު "ސޫރްޔަވަންޝީ" ރިލީސްވާނެ ދުވަހަކަށެވެ. މި ފިލްމު އަޅުވަން މިހާރު ހަމަޖެހިފައި ވާ ތާރީހަކީ އަންނަ މަހުގެ 2 ވަނަދުވަހެވެ.
