ޝްރަދާ ކަޕޫރާއި ރޯހަން ޝްރެސްތާ އުޅެނީ އަކީ ލޯބިވެރިން ކަމުގައި އަޑުތަށް ފެތުރޭތާ ދުވަސްކޮޅެއްވެއްޖެއެވެ. ނަމަވެސް މިކަން އަދި ދެމީހުންކުރެ އެކަކުވެސް ޔަޤީންކޮށް ނުދެއެވެ. ނަމަވެސް މިދިޔަ ބުދަ ދުވަހު ޝްރަދާގެ 34 ވަނަ އުފަންދުވަސް ރާއްޖޭގައި ފާހަގަކުރަނިކޮށް އާންމުވެފައިވާ ފޮޓޯތަކުން ޝްރަދާ އަދި ރޯހަން އެކުގައި ވަނީ ފެނިފައެވެ.
ޝްރަދާގެ އުފަންދުވަސް ފާހަގަ ކޮށްފައިވަނީ އޮޒެން ލައިފް މާދޫ ރިސޯޓް އެވެ. ޝްރަދާ ރައްޓެހިންނާއި އާއިލާއާ އެކު ރާއްޖެ އައިސްފައިވަނީ އޭނާގެ ދެބެންގެ ދެދަރި ޕްރިޔާންކް ޝަރްމާގެ ކައިވެނީގެ ހަފްލާގައި ބައިވެރިވުމަށެވެ. ޕްރިޔާންކް ކައިވެނި ކޮށްފައިވަނީ ޝަޒާ މޯރަނީ އާއިއެވެ.
މި އުފާވެރި ހަފްލާއިން އާންމު ވެފައިވާ ވީޑިއޯއިން ފެންނަ ގޮތުގައި ކޭކު ފެޅުމަށްފަހު ޝްރަދާވަނީ ފިލްމް "ސްތިރީ"ގެ ކަމަރިޔާއަށް ނަށާފައެވެ. އަދި މީގެ ފަހުން އާންމުވެފައިވާ ފޮޓޯއަކުން ރޯހަން ޝްރަދާގެ ފުރަގަހުން ބައްދާލައިގެން ހުއްޓާވަނީ ފެނިފައެވެ. މި ގައިގޯޅި ފޮޓޯގައި ޝްރަދާގެ ރައްޓެހިންގެ އިތުރުން އާއިލާގެ މެމްބަރުންވެސް ވަނީ ފެނިފައެވެ.
މީގެ އިތުރުން ޕްރިޔާންކްގެ ކައިވެނީގެ އުފަލުގައި ބޭއްވުނު ހަފްލާގައި "ބެސްޓް މޭން"ގެ ރޯލު ޝްރަދާ ވަނީ އަދާކޮށްފަ އެވެ. އަދި މި ހަފްލާއިން ޝްރަދާ ފެނިފައިވަނީ ބެއިޖް ކުލައިގެ ފަޓޫލޫނަކާއި ހުދު މަތިކޮޅެއްގެ އިތުރުން ރީދޫކުލައިގެ ސަސްޕެންޑާއަކުންނެވެ. އަދި މިއީ "ގްރޫމްސްމެން"ގެ އައުޓްފިޓްއާއި ގުޅުވާލުމުގެ ގޮތުން ކޮށްފައިވާ ކަމެކެވެ. ހަމަ އެހެންމެ ޝްރަދާވަނީ މި ދެމަފިރިންނާއި ބެހޭގޮތުން މި ހަފްލާގައި ވާހަކަ ދައްކާފައެވެ.
View this post on Instagram
ޝްރަދާ އެންމެ ފަހުން ފެނިގެންގޮސްފައިވަނީ "ބާގީ 3″ އިންނެވެ. މި ފިލްމުގެ ސިނަމާތަކުގައި އެޅުވުމަށްފަހު ތިއަރަޓިކަލް ރަން ކުރުކޮށްލީ ކޯވިޑް-19ގެ ސަބަބުންނެވެ. މިހާރު ޝްރަދާ މަސައްކަތް ކުރަމުން ދަނީ ލަވް ރާންޖަންގެ ޑައިރެކްޝަންގެ ދަށުން ކުރިއަށް ދާ ފިލްމެއްގައެވެ. މި ފިލްމުގެ ނަމެއް އަދި ހާމަ ކޮށްފައެއް ނުވެއެވެ. މި ފިލްމުން ޝްރަދާގެ އިތުރުން ރަންބީރް ކަޕޫރުވެސް ފެނިގެންދާނެއެވެ.
