ސަލްމާން ޚާނާއި ކެޓްރީނާ ކައިފް "ޓައިގާރ 3″ގެ މަސައްކަތް އަންނަ މާރިޗު މަހު ފެށުމަށް ވަނީ ހަމަޖެހިފައެވެ. މި ފިލްމުގެ ޝޫޓިން ފެށުމަށް ހަމަޖެހިފައިވަނީ މުމްބާއީގެ ޔަޝް ރާޖް ސްޓޫޑިއޯސްގައެވެ.
މި ވަގުތު ކެޓްރީނާ ހުރީ "ފޯން ބޫތު"ގެ ޝޫޓިންގައި އުދައިޕޫރުގަ އެވެ. "ފޯން ބޫތު" އިން ކެޓްރީނާއާއި އެއްކޮށް ފެނިގެން ދާނީ ސިދްހާންތު ޗަތުރްވެދީ އާއި އިޝާން ޚައްތަރެވެ.
މީގެ އިތުރުން ސަލްމާނު ވެސް "އަންތިމް: ދަ ފައިނަލް ޓްރުތު"ގެ ޝޫޓިންއާއި އެކު ބިޒީއެވެ. މި ޝޫޓިންތައް ނިންމާފައި މި ދެ ތަރިން ވަނީ ޓައިގާ 3 އެއްގެ ޝޫޓިން ފެއްޓުމަށް ހަމަޖެހިފައެވެ.
މިއީ "ޓައިގާ" ސީރީޒް ގެ 3 ވަނަ ފިލްމަށް ވުމާއި އެކު މި ފިލްމަށް ވަރަށް ބޮޑެތި ތައްޔާރީތަކާއި ބަޖެޓެއްވަނީ ހަމަޖެހިފައެވެ. އެގޮތުން މިހާރު ހަމަޖެހިފައިވާ ބަޖެޓަކީ 350 ކަރޯޑް ރުޕީސް އެވެ. މީގެ އިތުރުން މި ފިލްމުގެ ޔޫރަޕްގެ ޝޫޓިން ފެށުމަށް ހަަމަޖެހިފައިވަނީ ޖޫން 2021 ގައެވެ. މި ފިލްމް ޑައިރެކްޓު ކުރުމަށް ހަމަޖެހިފައިވަނީ މަނީޝް ޝަރްމާއެވެ.
ޔޫރަޕުގެ އެކި ހިސާބުތަކުގައި 40 ނުވަތަ 45 ދުވަހުގެ ޝޫޓީން ކުރިޔަށް ގެންދިޔުމަށް ޔަޝް ރާޖް ސްޓޫޑިއޯއިން ވަނީ ހަމަޖައްސާފައެވެ. މިވަގުތު ކޮވިޑް 19ގެ ކޭސްތައް ޔޫރަޕްގައި ގިނަވި ނަމަވެސް ޖޫން މަސް އަންނަން ވާއިރަށް ހާލަތު ބަދަލުވާނެ ކަމަށް މިފިލްމުގެ ޕްރޮޑަކްޝަން ޓީމުން ދަނީ އުއްމީދުކުރަމުންނެވެ.
ހާލަތު ތަން ނުދީފިނަމަ މި ބައި އިސްތަންބުލްގައި ވެސް ކުރިއަށް ގެންދެވޭނެއެވެ. އެހެންނަމަވެސް ޕްރޮޑިއުސަރުން ބޭނުންވަނީ ވީހާވެސް ބޮޑަށް އަސްލު ތަންތަނުގައި ޝޫޓިން ކުރިޔަށް ގެންދިޔުމަށެވެ.
"ޓައިގާ-3″ ސިނަމާއަށް އަންނާނެކަމަށް މިހާރު ލަފާކުރަނީ 2022 ވަނަ އަހަރު ޢީދު ދުވަހަށެވެ.
