ރާއްޖޭގެ އިގްތިސާދާ ވިޔަފާރިތަކަށް ހާއްސަކޮށްގެން އަލަށް ފަށާ ޓީވީ ޗެނަލަކަށް ބްރޯޑްކާސްޓިންގ ކޮމިޝަނުން ލައިސަންސް ދޫކޮށްފި އެވެ.
ބިޒްނަސް ސެންޓަރ ކޯޕަރޭޝަން، ބީސީސީގެ ފަރާތުން "މޯލްޑިވްސް ބިޒްނަސް ނެޓްވޯކް"ގެ ނަމުގައި ފަށަން ތައްޔާރުވާ ޓީވީ ޗެނަލަށް ބްރޯޑްކާސްޓިންގ ލައިސަންސް ދޫކުރީ އާދީއްތަ ދުވަހު އެވެ. މި ޓީވީ ޗެނަލްގެ މައިގަނޑު މަގްސަދަކީ ކުދި ވިޔަފާރި އާއި މެދު ފަންތީގެ ވިޔަފާރިތައް ކުރިއެރުވުމަށް ބޭނުންވާ އެކިއެކި ފުރުސަތުތައް ފުޅާ ދާއިރާއެއްގައި ފޯރުކޮށްދީ އާންމު ރައްޔިތުންގެ އިޤްދިސާދީ އަދި މާލީ ހޭލުންތެރިކަން އިތުރު ކުރުން ކަމަށް ބީސީސީން ބުނެއެވެ.
އެގޮތުން މޯލްޑިވްސް ބިޒްނަސް ނެޓްވޯކް މެދުވެރިކޮށް ރާއްޖޭގެ އެކިކަންކޮޅުތަކުގައި ހިންގަމުންދާ ވިޔަފާރިތަކަށް ދުވަހުން ދުވަހަށް ބޭނުންވާ މައުލޫމާތުތަކާއި ވިޔަފާރީގެ ނަފާ އިތުރުކޮށް ދެމެހެޓެނިވިގޮތެއްގައި ވިޔަފާރިކުރުމަށް ބޭނުންވާ ފަންނީ އިރުޝާދާއި މައުލޫމާތުތައް ފޯރުކޮށްދެވޭނެ ކަމަށްވެސް އެ ކޯޕަރޭޝަނުން ބުނެއެވެ.
މި ޗެނަލްގެ ކޮންޓެންޓުގެ ތެރޭގައި ވިފާރީއާއި ގުޅުންހުރި ތައުލީމީ ޕްރޮގްރާމްތައް، މައުލޫމާތު ފޯރުކޮށްދިނުމުގެ ޕްރޮގްރާމްތައް، ވިޔާފާރިއާއި ޓެކްނޮލޮޖީ، ވިޔަފާރިއާއި ކުޅިވަރު، އަދި ވިޔަފާރިއާ ގުޅުންހުރި މުނިފޫހިފިލުވުގެ ޕްރޮގްރާމްތައް ވެސް ހިމެނޭނެ ކަމަށް ބީސީސީން ބުނެއެވެ. މީގެ އިތުރުން ޒުވާން ވިޔަފާރިވެރިން އުފެއްދުމަށް އެންމެ ފުރަތަމަ އަޅަންޖޭހެ ބިންގާ އެޅުމަށްޓަކައި ސްކޫލްދަރިވަރުންނަށް ހާއްސަކޮށް ވިޔަފާރިއާއި ގުޅުންހުރި ތައުލީމީ ޕްރޮގްރާމްތައް ވެސް މި ޗެނަލުން ގެނެސްދޭނެ ކަމަށް އެ ކޯޕަރޭޝަނުން ބުނެއެވެ.
ކުދި ވިޔަފާރިއާއި މެދުފަންތީގެ ވިޔަފާރިތަކަކީ ރާއްޖޭގެ އިޤްތިދާސްގެ ދިރުން ކަމުގައިވާއިރު، އާންމު ފަރުދުންނާއި ވިޔަފާރިތަކުގެ މާލީ އަދި އިގްތިސާދީ ހާލަތު ރަނގަޅުކޮށްދިނުމަށް މަސައްކަތްކުރާނެ ވަސީލަކަށް މި ޗެނަލް ވާނެކަމަށް ބިޒްނަސް ސެންޓަރ ކޯޕަރޭޝަން އުންމީދުކުރެއެވެ.
ބީސީސީ އަކީ ކުދި ވިޔަފާރިއާއި މެދުފަންތީގެ ވިޔަފާރިތައް ކުރިއެރުވުމަށް ބޭނުންވާ އެކިއެކި ފުރުސަތުތަކާއި ހިދުމަތްތައް ފޯރުކޮށްދީ ކުދި ވިޔަފާރިތަކަށް ފަހި މާހައުލެއް ގާއިމް ކޮށްދިނުމަށް މަސައްކަތް ކުރުމަށް 2017 ވަނަ އަހަރު އުފެއްދި ސައްތައިން ސައްތަ ސަރުކާރު ހިއްސާވާ ކުންފުންޏެކެވެ.
ކޮމެންޓު ފޮނުވާ