މުޒާހިރާތައް ވަރުގަދަވަމުން ދާއިރު، އަސްކަރިއްޔާއިން މިޔަންމާގެ ބަޢާވާތް ދިފާއު ކޮށްފި

ފާއިތުވެދިޔަ ހަފްތާގައި މިޔަންމާގެ އަސްކަރިއްޔާއިން އެގައުމުގައި ގެނެސްފައިވާ ބައާވާތާއި ދެކޮޅަށް އެގައުމުގައި ހިގަމުންދާ މުޒާހިރާތައް ދުވަހެއް ދުވަހަކަށް ވަރުގަަ ވަމުން ދަނިކޮށް، އަސްކަރީ ލީޑަރު ގައުމާ މުޚާތަބުކުރައްވާ، އެގައުމަށް ގެނެވިފައިވާ ބައާވާތް ދިފާއުކޮށްފިއެވެ.

މިޔަންމާގެ އަސްކަރީ ވެރިޔާ، ސީނިއަރ ޖެނެރަލް މިން އަންގ ލައިންގ، އެގައުމުގެ ސަރުކާރު ޓީވީން ވަގުތުން ދުރައް ފޮނުވި، ޚިތާބުގައި ވިދާޅުވެފައިވަނީ، އެގައުމުގެ އަސްކަރިއްޔާއިން، އެގައުމުގައި މިނިވަން އާންމު އިންތިޚާބެއް ބާއްވާނެ ކަމަށާއި އަދި އެ އިންތިޚާބު ކާމިޔާބު ކުރާ ފަރާތަކާ ވެރުކަމުގެ ބާރުތައް ހަވާލުކުރެވިގެން ދާނޭ ކަމަށެވެ.

މިމަހުގެ 1 ވަނަ ދުވަހަށްފަހު، މިޔަންމާރގެ ޓީވީ މެދުވެރިކޮށް ގައުމާ މުޚާތަބުކޮށް ވާހަ ދައްކަވަމުން ސީނިއަރ ޖެނެރަލް މިން އަންގ ލައިން ވަނީ ޖަޒްބާތު އިސްނުކުރައްވާ، ހަގީގަތް އިސްކުރެއްވުމަށް އެގައުމުގެ ރައްޔިތުންނަށް ގޮވާލައްވާފައެވެ. އޭނާ ވިދާޅުވެފައިވަނީ، ހަގީގަތުގައިވެސް، ފާއިތުގެދިޔަ ނޮވެމްބަރު މަހު ބޭއްވުނު އެގައުމުގެ ރިޔާސީ އިންތިޚާބުގައި އޮޅުވާލުންތަކާ އަދި، ދެކޮޅު ނުޖެހޭ އެތައްކަމެއް ހިގާފައި ވެއެވެ.

މިއީ، ފާއިތވެދިޔަ ރިޔާސީ އިންތިޚާބު ތަފާތު ބޮޑުކޮށް، އަންގް ސަން ސޫކީއާއި އޭނާއަށް ތާއީދުކުރާ ފަރާތްތަކުން ކާމިޔާބު ކޮށްފައިވަނިކޮށް، އަންގް ސަން ސޫކީ އެގައުމުގެ އަސްކަރިއްޔާއިން ހައްޔަރު ކުރިފަހުން، އަސްކަރީ ވެރިޔާ ގައުމާ މުޚާތަބުކޮށް ވާހަކަަ ދައްކަވާފައިވާ ފުރަތަމަ ފަހަރެވެ.

އެހެންނަމަވެސް، ފާއިތުވެދިޔަ 3 ދުވަހުވެސް، މިޔަންމާރގެ ތަފާތު ސިޓީތަކުގައި، އެގައުމުގެ އެތައްހާސް ރައްޔިތުން މަގުތަކެއް ނިކުމެ ބަޢާވާތުގެ ސަރުކާރާ ދެކޮޅަށް ވަނީ އަޑު އުފުލާފައެވެ.

މިޔަންމާގެ ފުލުހުންވަނީ، މުޒާހިރާކުރާ ފަރާތްތައް ސުލްހަވެރިކަމާއެކު، އެއްވުންތައް ހުއްޓާ ނުލައިފިނަމަ، ބާރުގެ ބޭނުން ކުރަން ފަށާނެކަމުގެ އިންޒާރު ދީފައެވެ.

މިޔަންމާރގެ ބާރުގަދަ އަސްކަރިއްޔާއިން، އަންގ ސަން ސޫކީ ހައްޔަރުކޮށް އަދި، އޭނާގެ ޕާޓީއަށް ނިސްބަތްވާ އިސް އެތަކެއް ސިޔާސީ ލީޑަރުން ހައްޔަރު ކުރުމާއިއެކު، ފާއިތުވެދިޔަ 10 ވަރަކަށް އަހަރުގެ ތެރޭގައި އެގައުމަށް އަންނަމުންދިޔަ ޑިމިކްރަޓިކް ބަދަލުތައް މިވަނީ ނެތިގެން ގޮސްފައެވެ. އަދި ދުނިޔޭގެ އެތަކެއް ގައުމުތަކުން ވަނީ މި ބައާވާތް ކުއްވެރުކޮށްފައެވެ.

ހޯމަދުވަހު، ގައުމާ މުޚާތަބު ކުރައްވަމުން، މިޔަންމާރގެ އަސްކަރި ވެރިޔާ މިން އަންގ ހައިންގ ވިދާޅުވެފައިވަނީ، އޭނާގެ އަސްކަރީ ސަރުކާރުން، "ހަގީގީ އަދި، އެންމެ ރިވެތި ޑިމޮކްރަސީ" އެގައުމުގައި ދަމަހައްޓާނެ ކަމަށެވެ.

އަދި އޭނާ ވިދާޅުވީ، މިހާރު އޮތް އަސްކަރީ ވެރިކަމަކީ، މާޒީވެދިޔަ ތަނުގައި އަސްކަރިއްޔާއިން އެގައުމުގައި ކޮށްފައިވާ ވެރިކަންތަކާ މުޅިން ތަފާތު ވެރިކަމެއް ކަމުގައިވެސްމެއެވެ.