ސަައުތު އެފްރިކާއިން އެސްޓްރާޒެނިކާ ވެކްސިން ޖެހުން ވަގުތީ ގޮތުން މަޑުޖައްސާލައިފިއެވެ.
ސައުތު އެފްރިކާގެ އޮފިޝަލުން ވިދާޅުވެފައިވަނީ، މިވެކްސިން ޖެހުން މަޑުޖައްސާލަފައިވަނީ، ހެދުނު ދިރާސާއަކުން، އެގައުމުން އެންމެ ފުރަތަމަ ފެނުނު ވޭރިއެންޓާއި ދެކޮޅަށް މިވެކްސިން އިން ރައްކާތެރިކަން ފޯރުކޮށް ނުދޭކަމަށް ދައްކާފައިވާތީއެވެ.
އެސްޓްރާޒެނިކާ ވެކްސިންދިނުން ވަގުތީ ގޮތުން މަޑުޖައްސާލުމާގުޅޭ ގޮތުން މައުލޫމާތު ދިނުމަށް ބޭއްވުނު ނިއުސް ބްރީފިންގައި އެގައުމުގެ ހެލްތު މިނިސްޓަރ ޒުވެލީ ޚައިޒެ ވިދާޅުވެފައިވަނީ، މިވެކްސިން ބޭނުން ކުރުން މަޑު ޖައްސާލެވިފައިވަނީ، ސައިސްވެރިންނަށް މިވެކްސިން އެންމެ ރަގަޅަށް ބޭނުން ކުރެވޭނެ ގޮތެއް ހޯދާ އިތުރަށް ދިރާސާ ކުރުމަށް ފުރުސަތު ދިނުމުގެ ގޮތުން، ވަގުތީގޮތުން ކަމުގައެވެ.
ޚައިޒެ ވިދާޅުވި ގޮތުގައި ސައުތު އެފްރިކާއިން ފައިޒާ/ބައޯއެންޓެކް ވެކްސިނާއި އަދި ޖޯންސަން އެންޑް ޖޯންސަންގެ ވެކްސިން އެގައުމުގައި ބޭނުން ކުރަމުންދާނެއެވެ.
މިހަފްތާގެ އާދީއްދަ ދުވަހު އާންމު ކުރެވިފައިވާ މިދިރާސާގެ މައުލޫމާތުތަކަށް ބަލާއިރު، ސައުތު އެފްރިކާއިން އެންމެ ފުރަތަމަ ފެނިފައިވާ ކޯވިޑް19 ވޭރިއަންޓުން ބައްޔަށް ޕޮޒިޓިވްވާ މީހުންގެ ކިބައިން ފެންނަ ކޯވިޑް19ގެ އާދައިގެ އަލާމާތްތަކަށްވެސް އޮކްސްފޯޑް/އެސްޓްރާޒެނިކާ ވެކްސިންގެ ދެ ޑޯޒުން ފޯރުކޮށްދެނީ އާދައިގެ ރައްކާތެރިކަމެކެވެ.
އާންމު ކޮށްފައިނުވާ މި ދިރާސާގައި 31 އަހަރުން މަތީގެ 2،000 ވޮލަންޓިއަރުން ބައިވެރި ވެފައިވެއެވެ. އަދި މީގެތެރެއިން ދެބައިކޮށްފަ އެއްބައި މީހުންނަށް އަސްލު ވެކްސިން ދީފައިވާއިރު، އަނެއްބައި މީހުންނަށް ދީފައިވަނީ އަސްލު ނޫން ވެކްސިނެވެ.
މި ދިރާސާ ހަދާފައިވާ ފަރާތްތަކުގެ ފަރާތުން ނެރެފައިވާ ބަޔާނެއްގައި ބުނެފައިވަނީ، ކޯވިޑް19ގެ އެހެން ސްޓްރެއިންތަކާ އަޅާ ބަލާއިރު، މިވައިރަހުގެ B.1.351 ވޭރިއެންޓުގެ ބާރުކަޑުވާލުމަށް މިވެކްސިންއިން ފޯރުކޮށްދީފައިވަނީ ވަރަށް އާދައިގެ ރައްކާތެރިކަމެއް ކަމުގައެވެ. ކޯވިޑްގެ ހާލަތު ގޯސްވެގެން ހޮސްޕިޓަލުގައި އެޑްމިޓް ކުރާ މީހުންނާ އަދި މަރުވާ މީހުންނަށް މިވެކްސިންގެ އަސަރު ކުރާމިންވަރު ދެނެގަތުމަށް މި ދިރާސާގައި މަސައްކަތް ކުރެވިފައެއް ނުވެއެވެ.
ސައުތު އެފްރިކާގެ ޔުނިވަރސިޓީ އޮފް ވިޓްވޯޓާރސްރަންޑްއާއި އަދިވެސް އިތުރު ޔުނިވާރސިޓީތަކުގެ އިތުރުން ސުނިވަރސިޓީ އޮފް އޮކްސްފޯރޑްގެ ރިސާޗްކުރާ ފަރާތްތަކުން ކުރި މިދިރާސާގެ ބައެއް މައުލުމާތުތައް މި ނޫސް ކޮންފަރެންސްގައިވަނީ ހިއްސާކުރެވިފައެވެ.
އޮކްސްފޯޑުން ބުނެފައިވަނީ، އިތުރަށް ބެލުމަށް މިހާރު މިދިރާސާ ވަނީ، ކަމާގުޅުންހުރި މުވައްސަސާތަކަށް ހުށަހެޅިފައިކަމަށާއި އަދި މިމަސައްކަތް ނިމުނުހާ އަވަހަކަސް މިދާރާސާ އާންމު ކުރެވިގެންދާނެ ކަމަށެވެ.
މިދިރާސާގެ މައުލޫމާތު އާންމު ކުރެވިގެން ދިއުމާއެކު، އެސްޓްރާޒެނިކާގެ ތަރުޖަމާން ނެރުއްވި ސްޓޭޓްމަންޓެއްގަި ބުނެފައިވަނީ، "އެންފުނިން ދަނީ، ކޯވިޑް19ގެ ނުރައްކާތެރި ވޭރިއެންޓެއް ކަމުގައިވާ B.1.351 އާއި ދެކޮޅަށް މިވެކްސިން ބޭނުން ކުރެވޭނެ ގޮތްތަކާ ގުޅޭގޮތުން ސައުތު އެފްރިކާގެ ހެލްތު މިނިސްޓްރިއާއެކީ މަސައްކަތް ކުރަމުން،" ކަމުގައެވެ. އަދި "މި ވެކްސިން މިވޭރިއަންޓާ ދެކޮޅަށް މަަސައްކަތް ކުރުމުގައި ކާމިޔާބުކަމަށް ނިންމުމާއެކު، ސައުތު އެފްރިކާގެ ރައްޔިތުންނަށް އަނެއްކާވެސް މިވެކްސިން ފޯރުކޮށްދިނުމަށް މަސައްކަތް ކުރާނެ" ކަމަށްވެސް މި ސްޓޭޓްމަންޓުގައި ތަރުޖަމާން ވިދާޅުވެފައި ވެއެވެ.
މި ބަޔާނުގައި އެސްޓްރާޒެނިކާ ކުންފުނިން ބުނެފައިވަނީ، އެކުންފުނިން އަދިވެސް ގަބޫލުކުރަނީ، މިވެކްސިންގެ ދެ ޑޯޒު ދޭ މުއްދަތު 8 ހަފްތާއާއި 12 ހަފްތާއާއި ދެމެދަށް ފައްތައިފިނަމަ، B.1.351 ވޭރިއެންޓުން ރައްކާތެރި ކޮށްދިނުމުގައި މިވެކްސިންއިން ނަތީޖާ ނެރޭނެއެވެ.
ކުރިން އެސްޓްރާޒެނިކާ ކުންފުނިން ބުނެފައިވަނީ، އެކުންފުނިން ދަނީ B.1.351 ވޭރިއެންޓާއި ދެކޮޅަށް މަސްކައްކަތް ކުރުމަށްޓަކާ އެކުންފުނީގެ ވެކްސިނަށް ގެންނަޖެހޭ ބަދަލުތައް ގެނައުމަށް އޮކްސްފޯޑް ޔުނިވަރސިޓީއާއެކީ މަސައްކަތް ކުރަމުންނެވެ. އަދި ފިނި މޫސުން ނިމޭ ހިސާބަށް، އިތުަށް ބޭނުންވާނަމަ، މިވެކްސިން ފޯރުކޮށްދެވޭނެކަމަށްވެސް އެސްޓްރާޒެނިކާ ކުންފުނިން އުއްމީދު ކުރެއެވެ.
ދުނިޔޭގެ ސިއްހަތު ޖަމިއްޔާގެ ޓެކްނިކަލް ލީޑް ފޯރ ކޯވިޑް19، މާރިއާ ވޭން ކާރޚޯވް ވިދާޅުވެފައިވަނީ، ޑަބްލިއު އެޗްއޯގެ އިންޑަޕެންޑެން ވެންސިން ޕެނަލްއިން، އަލަށް މިކުރެވުނު ދިރާސާއާއި ގުޅިގެން، މިވެކްސިންގެ މުސްތަގްބަލާ ގުޅޭގޮތުން މަޝްވަރާ ކުރުމަށް ހޯމަދުވަހު، އެސްޓްރާޒެނިކާ ކުންފުންޏާ ބައްދަލުކުރާގޮތަށް މިހާރުވަީ ހަމަޖެހިފައެވެ.
