ދުނިޔޭގެ ވިޔަފާރި ޖަމްއިއްޔާ (ވަރލްޑް ޓްރޭޑް އޯގަނިޒޭޝަން)ގެ ޑިރެކްޓަރ ޖެނެރަލްގެ މަގާމު އެންމެ ފުރަތަމަ ފަހަރަށް ފުރުއްވާނެ އަންހެން ބޭކަބަލަކަށް، އަދި މިމަގާމް އެފްރިކާ ބައްރުން ފުރުއްވާނެ ފުރަތަމަ ބޭފުޅެއްގެ ގޮތުގައި، އުމުރުން 66 އަހަރުގެ ނައިޖީރިއާގެ އޮކޮންޖޯ ވިއާލާ ވެވަޑައިގެންފިއެވެ.
އެކަމަނާ، ދުނިޔޭގެ ވިޔަފާރި ޖަމިއްޔާ (WTO)ގެ އެންމެ ފުރަތަމަ އަންހެން ޑިރެކްޓަރ ޖެނެރަލަކަށް އަދި އެފްރިކާ ބައްރުން މިގަމާ ފުރުރުއްވާ ފުރަތަމަ ބޭފުޅާއަށް ވެވަޑައިގަންނަވާނެކަން ޔަގީންވެގެން ދިޔައީ، މިމަގާމަށް ދެކުނު ކޮރެއާގެ ޓްރޭޑް މިނިސްޓަރ ޔޫ ޔަންގހީ އައްޔަން ކުރުން ނޫން ހައްލެއް ކުރީގެ ރައީސް ޓްރަމްޕްގެ ސަރުކާރުން ގަބޫލު ނުކޮތް އޮތުން، އެމެރިކާ އަލަށް އިންތިޚާބުވި ބައިޑްންގެ ސަރުކާރުން، ދޫކޮށްލެއްވުމާ ގުޅިގެންނެވެ.
އަދި، މިގަމާމަށް ނައިޖީރިއާގެ އޮކޮންޖޯ ވިއާލާއާއި ވާދަކުރަވަމުން ގެންދެވި ޔޫ ޔަންގހީ ވަނީ، އެމެރިކާގެ މިހާރުގެ ސަރުކާރާ މަޝްވަރާ ކުރެއްވުމަށްފަހު ނަން އަބުރާ ގެންދަވާފައެވެ.
ފާއިތުވެދިޔަ އޮކްޓޯބަރުމަހު ބޭއްވުނު ބޭއްވުނު އިންތިޚާބުގައި ޑަބްލިއިޓީއޯގެ 164 މެންބަރު ގައުމުގެ ތާއީދާއެކު މިއިންތިޚާބު ކާމިޔާބު ކޮށްފައިވަނީ ނައިޖީރިއާގެ ކުރީގެ ފިނޭންސް މިނިސްޓަރ ގޯޒި އޮކޮންޖޯ ވިއާލާއެވެ. އެހެންނަމަވެސް، ފާއިތުވެދިޔަ އަހަރު ނޮވެމްބަރު މަހު 3 ވަނަ ދުވަހު ބޭއްވުނު އެމެރިކާގެ ރިޔާސީ އިންތިޚާބަށް އެންމެ 6 ދުވަހަށް ވެފައިވަނިކޮށް، އެމެރިކާގެ އޭރުގެ ރައީސް ޑޮނަލްޑް ޓްރަމްޕްވަނީ، އޮކޮންޖޯ ވިއާލާއަކީ ޗައިނާއަށް ތާއީދު ކުރައްވާ ބޭފުޅެއްކަމަށް ތުހުމަތުކޮށް އެކަމަނާ އެމަގާމަށް އައްޔަންކުރުމަށް ދެކޮޅު ހައްދަވާފައެވެ.
އޭރު އެކަމަނާ މަގާމަށް އިސްކުރުމަށް މައިގަޑުގޮތެއްގައި ތާއީދު ކޮށްފައިވަނީ، ކެރީބިއަން ގައުމުތަކުގެ އިތުރުން، އެފްރިކާ، ޔޫރަޕިއަން ޔޫނިއަން، ޗައިނާ، ޖަޕާން އަދި އޮސްޓްރޭލިއާއިންނެވެ.
އެންމެ ފުރަތަމަ އަށް ކެނޑިޑޭޓަކު ވާދަކުރި މިމަގާމުގެ އިންތިޚާބުގެ އެންމެ ފަހުގެ މަރުހަލާއާއި ހަމައަށް އައިއިރު ވާދަވެރިންގެ ގޮތުގައި ތިބީ އަންހެން ދެބޭފުޅެކެވެ. އެއީ ގޯޒި އޮކޮންޖޯ ވިއާލާ އާއި ދެކުނު ކޮރެއާގެ ޓްރޭޑް މިނިސްޓަރ ޔޫ ޔަންގހީ އެވެ. މިދެބޭފުޅުން މިޖަމްއިއްޔާގެ އެންމެ އިސްމަގާމަށް އައްޔަން ކުރުމަށް ބޭއްވޭ އިންތިޚާބުގެ އެންމެ ފަހު މަރުހަލާއާއި ހަމައަށް އައުމުން، ބޭފުޅަކާއިމެދު މެމްބަރުންނަށް ކޮންމެ ގޮތަކަށް އެއްބަސްވިޔަސް، މިއިންތިޚާބު ވެގެންދާނީ މިޖަމްއިއްޔާގެ ތާރީޚުގައިވެސް އަންހެން ބޭފުޅަކު މިމަގާމަށް އައްޔަން ކުރެވޭނެ ފުތަމަ ފަހަރު ކަމުގައި އޮތީ ޔަގީން ކުރެވިފައެވެ.
ނައިޖީރިއާގެ އޮކޮންޖޯ ވިއާލާ އާއި ދެކުނު ކޮރެއާގެ ޔޫ އަކީވެސް ސިޔާސީ އަދި ބައިނަލް އަގުވާމީ ގޮތުން ތަޖުރިބާކާރު ދެބޭފުޅުންނެވެ.
އެމެރިކާގެ ރައްޔިތުކަންވެސް އޮންނަ އޮކޮންޖޯ ވިއާލާ ވަނީ ދެފަހަރެއްގެ މަތިން ނައިޖީރިއާގެ ފިނޭންސް މިނިސްޓަރުކަން ކުރައްވާ އަދި ކުޑަދުވަސްކޮޅަކަށް ފޮރިން މިނިސްޓަރުކަންވެސް ކުރައްވާފައެވެ. މީގެ އިތުރުން އެކަމަނާ ވަނީ 25 އަހަރުގެ ދިގު މުއްދަތެއް ވަންދެން ވަރލްޑް ބެންކުގައި އިކޮނޮމިސްޓެއްގެ ގޮތުގައި މަސައްކަތް ކުރައްވާފައެވެ. އަދި އެ ޖަމްއިއްޔާގައި މަސައްކަތް ކުރައްވަމުން ޖަމްއިއްޔާގެ ދެވަނައަށް އެންމެ މަތީ މަގާމް ކަމުގައިވާ މެނޭޖިންގ ޑިރެކްޓަރކަމުގެ މަގާމަށް ވަޑައިގެން އެމަގާމް ފުރުއްވާފައި ވެއެވެ. އެހެންނަމަވެސް ވަރލްޑް ބެންކުގެ ރައީސްކަމުގެ މަގާމަށް ވާދަކުރައްވާ ވަނީ ފެއިލްވެ ވަޑައިގެންފައެވެ. މިހާތަނަށް އައިއިރު، އެކަމަނާ ފުރުއްވަމުން ގެންދަވި މަގާމަކީ ދުނިޔޭގެ ވެކްސިން އެލަޔަންސްގެ ބޯޑުގެ ޗެއަރމަންކަމުގެ މަގާމެވެ.
ވަރލްޑް ޓްރޭޑް އޯގަނިޒޭޝަންގެ ޑިރެކްޓަރ ޖެނެރަލްގެ މަގާމަށް ހޮވިވަޑައިގަތުމުން، އެކަމަނާ ވެވަޑައިގެންފައި މިވަނީ އެފްރިކާ ބައްރުން މިމަގާމަށް ވަޑައިގަންނަވާނެ ފުރަތަމަ ބޭފުޅާއަށެވެ.
ދާދިފަހުން އެކަމަނާ އެމެރިކާގެ ރައްޔިތުކަން ހޯއްދަވާގައިވި ނަމަވެސް، އެކަނާއަކީ ވަރަށް ބޮޑަށް ވަތަނީ، އަދި ހެދުން އެޅުއްވުކުގައިވެސް މުޅިންވެސް ނައިޖީރިއާގެ ސަގާފަތް އިސްކުރައްވާ ބޭކަނބަލެކެވެ.
