މަގާމުން ވަކިކުރުމުގެ މައްސަލަ ރައްޔިތުންގެ މަޖިލިހަށް ފޮނުވަން ޖުޑިޝަލް ސާވިސް ކޮމިޝަނުން ނިންމާފައި ވަނިކޮށް، ކްރިމިނަލް ކޯޓުގެ ގާޒީ އިބްރާހިމް އަލީ މިއަދު އިސްތިއުފާ ދެއްވައިފި އެވެ.
ގާޒީ އިބްރާހިމް އަލީ މަގާމުން އިސްތިއުފާ ދެއްވާފައި މި ވަނީ، ޖޭއެސްސީ އިން ބަލަމުން ދިޔަ އޭނާގެ ސުލޫކީ މައްސަލާގައި 60 ދުވަހުގެ ސަސްޕެންޝަންއެއްގައި ވެސް ހުންނަވަނިކޮށެވެ.
ގާޒީ އިބްރާހިމް ފަނޑިޔާރު ކަމުން ވަކިކުރަން މަޖިލީހަށް ފޮނުވަން ނިންމީ ތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ ދައުވާ ލިބޭ 10 މީހަކު ބަންދުން ދޫކޮށްލި ގޮތް ގޯސް ކަމަށް ހައި ކޯޓުން ނިންމައި، އަދި ކްރިމިނަލް ކޯޓުގެ ނިންމުން މުރާޖައާ ކުރަން ހައި ކޯޓު އަމުރު ކުރުމުން އެކަމާ މެދު ގޮތެއް ނިންމުން އޭނާ ލަސް ކުރައްވާފައިވާ މައްސަލައާ ގުޅިގެންނެވެ.
ދޫކޮށްލި މީހުންގެ ތެރެއިން އެކަކުގެ މައްސަލައިގައި ފަސް ދުވަސް ތެރޭގައި އެ ނިންމުން މުރާޖައާ ކުރަން ހައި ކޯޓުން އެންގުމުން ގާޒީ އިބްރާހިމް އަލީ އެކަމާ މެދު ގޮތެއް ނުނިންމައި، ލަސް ކޮށްފައިވާ ކަމަށް ޖޭއެސްސީގެ ބަޔާނުގައިވެ އެވެ.
ބަންދުގެ މައްސަލަ މުރާޖައާ ކުރުން ލަސްވެގެން ދިޔައީ ކުރިމިނަލް ކޯޓުގެ އިދާރީ ކަންތައްތަކެއްގެ ސަބަބުން ކަމަށް ގާޒީ އިބްރާހިމް އަލީ ވިދާޅުވެފައިވެއެވެ.
ކޮމެންޓު ފޮނުވާ