މިސަރަހައްދުގެ ވިޔަފާރި ބަނދަރު ތަރައްޤީކުރަން އެންމެ ރަނގަޅީ ތިލަފުށިކަމަށާއި، އެކަން ނުކުރެވެންވީ ސަބަބެއް ނެތްކަމަށް ކުރީގެ ހައުސިންގ މިނިސްޓަރ ޑރ.މުޙައްމަދު މުޢިއްޒު ވިދާޅުވެއްޖެއެވެ.
މާލޭގެ ވިޔަފާރި ބަނދަރަށް ދިމާވެފައިވާ ދަތިތައް ހައްލުކުރުމުގެ ގޮތުން މާލެ ވިޔަފާރި ބަނދަރު ތިލަފުއްޓަށް ބަދަލުކުރުމަށް ކުރީގެ ރައީސް ޢަބްދުﷲ ޔާމީންގެ ސަރުކާރުން ވަނީ ނިންމާފައެވެ. ނަމަވެސް ސަރުކާރު ބަދަލުވުމާއެކު މިސަރުކާރުންވެސް އެންމެ ފުރަތަމަ ވިޔަފާރި ބަނދަރު ތިލަފުށީގައި ތަރައްޤީކުރުމަށް ނިންމެވިނަމަވެސް މިހާރު ވަނީ އެނިންމުން ބަދަލުކޮށް ގުޅީފަޅުގައި އެބަނދަރު ތަރައްޤީކުރުމަށް ނިންމާފައެވެ.
ކުރީގެ ހައުސިންގ މިނިސްޓަރ އަދި މާލޭގެ މޭޔަރުކަމަށް މިހާރު ވާދަކުރައްވާ ޑރ.މުޙައްމަދު މުޢިއްޒު ކުރެއްވި ޓްވީޓެއްގައި ވިދާޅުވީ، ގުޅީފަޅުގައި އަޅަން ނިންމާފައިވާ ވިޔަފާރި ބަނދަރު ތިލަފުއްޓަށް ބަދަލުކުރުމުގައި ޓެކްނިކަލް އެއްވެސް މައްސަލައެއް ނެތްކަމަށެވެ. އެކަން ސަރުކާރަށް ނުކުރެވެންވީ އެއްވެސް ސަބަބެއް އޮވެގެން ނުވާނެކަމަށާއި، މިސަރަހައްދުގައި ޕޯރޓް އަޅަން އެންމެ ރަނގަޅީ ތިލަފުށިކަން އެއީ ޓެކްނިކަލީ ބަލާއިރުވެސް ފެންނަން އޮތް ހަޤީގަތެއްކަމަށްވެސްް މުޢިއްޒު ވިދާޅުވިއެވެ،
Gulhifalhugai alhan nimmaafa oiy port Thilafuhtah badhalu kurumugai technical evves massalaeh nei. Ekan sarukaarah nukurevenvee evves sababeh ovegen nuvaane. Adhi Misarahadhuga porteh alhan emme rangalhee Thilafushikan eyee technically balaairu fennan oi haqeeqai.
— Dr Mohamed Muizzu (@MMuizzu) January 16, 2021
މާލޭ ވިޔަފާރި ބަނދަރުގެ ޖާގައިގެ ދަތިކަމާއި ތޮށްޖެހުމުގެ ސަބަބުން މުދާ ހުސްކުރުމަށް ގިނަ ދުވަސްތަކެއް ހޭދަވުމަކީ ވިޔަފާރިވެރިންގެ ޝަކުވާއެކެވެ. އެކަމުގެ ހައްލަކީ ބަނދަރުގެ ޖާގަ ބޮޑުކުރުންކަމަށްވާއިރު، ބަނދަރުގެ ޖާގަ ބޮޑުކުރެވޭނެ އެއްވެސް ގޮތެއް މާލޭގައި ނެތްކަމަށް ސަރުކާރުން ބުނެއެވެ.
އެކަމަށް އޮތް ހަމައެކަނި ޙައްލަކީ ބަނދަރު އެހެން ތަނަކަށް ބަދަލުކުރުންކަމަށާއި އެ މަސައްކަތް ސަރުކާރުން ކުރިއަށްގެންދަވާނީ ފިޔަވަހިތަކަކަށް ބަހާލައިގެންކަމަށް މާލޭ ވިޔަފާރި ބަނދަރު ހިންގާ އެމްޕީއެލްއިން ބުނެއެވެ. މިސަރުކާރުގެ ދެއަހަރު ނުވަތަ ތިން އަހަރެއްހާ ދުވަހުގެތެރޭގައި ބަނދަރު ބަދަލުކުރުމުގެ ފުރަތަމަ ފިޔަވަހި މަސައްކަތް ފެށިގެންދާނެކަމަށްވެސް ސަރުކާރުން ކުރިން ބުނިނަމަވެސް އަދިވެސް އެމަސައކްަތް ފެށިފައެއް ނުވެެއެވެ.
ކޮމެންޓު ފޮނުވާ