މާލެއާއި ސިނަމާލެ ބްރިޖު ހައިވޭގައި ޑިއުޓީގައި ތިބޭ ފުލުހުން މަސައްކަތްކުރާނެ ގޮތުގެ އާ ޕްލޭނެއް ކޮމިޝަނާ އޮފް ޕޮލިސް އަހުމަދު މުހައްމަދު އިފްތިތާހުކޮށްދެއްވައިފި އެވެ.
މި ޕްލޭން އިފްތިތާހުކޮށްދެއްވީ ޓްރެފިކް ޕޮލިސް އެންޑް ރޯޑް މެނޭޖްމަންޓުގެ މުވައްޒަފުންނާ ބައްދަލުކުރެއްވުމަށް އިސްކަންދަރު ކޮށި 1ގައި ބޭއްވި ރަސްމިއްޔާތެއްގައި އެވެ. މި ބައްދަލުވުމުގައި ސީޕީ އަހުމަދު މުހައްމަދު ވަނީ މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށާއި، ޓްރެފިކް ތޮއްޖެހުމުގެ މައްސަލައަށް ހައްލެއް ހޯދައިދިނުމަށް ފުލުހުން ކުރަމުންދާ މަސައްކަތްތައް އިތުރަށް ހަރުދަނާކުރުމަށް ބާރު އަޅުއްވާފަ އެވެ.
ސީޕީ ވިދާޅުވި ގޮތުގައި، ޓްރެފިކް އޮޕަރޭޝަންތަކުގައި ހަރަކާތްތެރިވާ ފުލުހުންގެ އަދަދު މިހާރު ވަނީ އިތުރުކުރެވިފަ އެވެ. އަދި މާލޭގެ ކާރުބާރު ބޮޑު ސަރަހައްދުތަކުގައި ފުލުހުން ހަރަކާތްތެރިވާ މިންވަރު އިތުރުކޮށް، އާންމު ރައްޔިތުންނަށް ދިމާވާ ދަތިތައް ކުޑަކުރުމަށް ހާއްސަ އިސްކަމެއް ދީގެން މަސައްކަތްކުރެއްވުމަށް އޭނާ ވަނީ ފުލުހުންގެ ކިބައިން އެދިވަޑައިގެންފަ އެވެ.
ޓްރެފިކް އެންޑް ރޯޑް މެނޭޖްމަންޓުން ދީފައިވާ ޔަގީންކަމަކީ، މިހާރު ބަލަހައްޓަމުން އަންނަ ސަރަހައްދުތަކުގެ އިތުރުން މާލޭގެ އިތުރު ސަރަހައްދުތަކުގައި ވެސް ފުލުހުން ހަރަކާތްތެރިވަމުންދާނެ ކަމުގެ ޔަގީންކަމެވެ. މީގެ ސަބަބުން މަގު ބޭނުންކުރާ ފަރާތްތަކުގެ ސަލާމަތާއި ރައްކާތެރިކަން އިތުރުވެ، ޓްރެފިކް ފްލޯ ރަނގަޅުވެގެންދާނެ ކަމަށް ފުލުހުން ދެކެ އެވެ.
މި ރަސްމިއްޔާތުގައި ޑެޕިއުޓީ ކޮމިޝަނާ އޮފް ޕޮލިސް ފަރުހާދު ފިކުރީގެ އިތުރުން، ޓްރެފިކް އެންޑް ރޯޑް މެނޭޖްމަންޓުގެ އެކި ފަންކްޝަންތަކުގެ ކޮމިޝަންޑް އޮފިސަރުން ބައިވެރިވެވަޑައިގެންނެވި އެވެ.
ކޮމެންޓު ފޮނުވާ