މެކްސިކޯގެ ދެކުނުގެ އައްސޭރިފަށަށް މިރޭ އައި ބާރުގަދަ ބިންހެލުމުގެ އެއްވެސް ނުރައްކަލެއް ރާއްޖެއަށް ނެތްކަމުގެ ޔަގީންކަން މޫސުމާބެހޭ ގައުމީ އިދާރާ (މެޓް އޮފީސް) އިން ދީފި އެވެ.
މެޓް އޮފީހުން މިރޭ ނެރުނު ބަޔާނެއްގައި ބުނެފައިވަނީ ރާއްޖެ ގަޑިން 7:48 ހާއިރު ރިކްޓާ މިންގަނޑުން 7.3 މެގްނިޓިއުޑްގެ ބާރުމިނުގައި ބިންހެލުމެއް އައިސްފައިވަނީ މެކްސިކޯގެ ދެކުނުގެ ސްޓޭޓެއް ކަމަށްވާ ޗިއާޕަސްގެ އައްސޭރިފަށަށް ކަމަށެވެ. މި ސަރަހައްދަކީ ރާއްޖޭގެ ވެރިރަށް މާލެއާ ގާތްގަނޑަކަށް 17،416 ކިލޯމީޓަރު ދުރުގައި އޮތް ސަރަހައްދެއް ކަމުން، ބިންހެލުމުގެ ސީދާ އެއްވެސް އަސަރެއް ރާއްޖެއަށް ނުކުރާނެ ކަމަށް އެ އިދާރާއިން ބުނެ އެވެ.
ނަމަވެސް ބައިނަލްއަގުވާމީ ހަބަރުތައް ބުނާގޮތުން، މި ބިންހެލުމާ ގުޅިގެން މެކްސިކޯގެ އައްސޭރިފަށުގެ ސަރަހައްދުތަކަށް މިހާރު ވަނީ ސުނާމީގެ އިންޒާރު ނެރެފަ އެވެ. ބިންހެލުމުގެ ލޮޅުންތައް މެކްސިކޯއާ އިންވެގެން އޮންނަ އެލް ސެލްވަޑޯ އަދި ގުއަޓެމާލާ ފަދަ ސެންޓްރަލް އެމެރިކާގެ ބައެއް ގައުމުތަކަށްވެސް ވަނީ އިހުސާސް ކުރެވިފަ އެވެ.
ކަމާބެހޭ އިދާރާތަކުން ބުނާގޮތުގައި، މިއީ ބާރުގަދަ ބިންހެލުމަކަށް ވީނަމަވެސް، ދެ ސަރަހައްދުގެ ދޭތެރޭގައި ހުރި ދުރުމިނަށް ބަލާއިރު ރާއްޖެއަށް މީގެ އެއްވެސް ނުރައްކަލެއް ކުރިމަތިވުމުގެ ފުރުސަތެއް ނެތެވެ.
ކޮމެންޓު ފޮނުވާ