ރާއްޖެއާއި އިންޑިއާއާ ދެމެދު ގާއިމުކުރާ މިނިވަން ވިޔަފާރީގެ އެއްބަސްވުން (އެފްޓީއޭ) މިއަހަރުގެ ތެރޭގައި ތަންފީޒުކުރަން ފެށުމަށް ސަރުކާރުން އަންނަނީ މަސައްކަތް ކުރަމުންނެވެ.
މި އެއްބަސްވުމުގެ މަޝްވަރާތައް ފެށުމަށް ނިންމާފައިވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު 2024 ވަނަ އަހަރު އިންޑިއާއަށް ކުރެއްވި ދަތުރުފުޅުގައެވެ. މިކަމާ ގުޅޭގޮތުން އިކޮނޮމިކް މިނިސްޓަރު މުހައްމަދު ސައީދު ވިދާޅުވީ، މިއީ ރާއްޖޭގެ އިގްތިސާދު އެންމެ ސިނާއަތަކަށް ބަރޯސާވެފައި އޮންނަ އޮތުން ނިމުމަކަށް ގެނެސް، އިގްތިސާދު ސިންދަފާތުކުރުމަށް އެޅޭ ވަރަށް މުހިންމު ފިޔަވަޅެއް ކަމަށެވެ. އަދި މި އެއްބަސްވުން އެކުލަވާލުމުގައި ރާއްޖޭގެ މަސްލަހަތު ހިމާޔަތްކުރުމަށް އިސްކަންދޭނެ ކަމަށާއި، މިހާރު ކުރިއަށްދަނީ ވިޔަފާރިވެރިންނާއި ކަމާގުޅޭ ފަރާތްތަކުގެ ހިޔާލު ހޯދުމުގެ މަސައްކަތްކަން އޭނާ ފާހަގަކުރެއްވިއެވެ.
މި އެއްބަސްވުމުގެ އެންމެ ބޮޑު މަންފާއެއް ލިބިގެންދާނީ ކުދި އަދި މެދުފަންތީގެ ވިޔަފާރިތަކަށެވެ. އޭގެ ތެރޭގައި އަންހެނުންނާއި ޒުވާނުން ހިންގާ ވިޔަފާރިތަކުގެ އިތުރުން ގޭގައި ތިބެގެން ކުރާ މަސައްކަތްތަކަށްވެސް އިންޑިއާގެ ބޮޑު މާކެޓުން ފުރުސަތުތައް ފަހިވެގެންދާނެއެވެ. ހާއްސަކޮށް ދިވެހި މަސްވެރިކަމުގެ އުފެއްދުންތަކަށް ހާއްސަ އިނާޔަތްތަކެއް ލިބި، ކަސްޓަމްސް ޑިއުޓީ ކުޑަވުމާއި އިދާރީ ހުރަސްތައް ނެތިގެންދާނެކަމަށް މިނިސްޓަރު ވިދާޅުވިއެވެ. މީގެ ސަބަބުން މުދާ އެތެރެކުރުމާއި ބޭރުކުރުމުގެ މަރުހަލާތައް އަވަސްވެ، ލިޔެކިޔުންތައް ޑިޖިޓަލްވުމުން ވިޔަފާރިތަކުގެ ހިންގުމުގެ ހަރަދުތައް ކުޑަވެގެންދާނެއެވެ.
މި އެއްބަސްވުމުގެ ދަށުން މަސްވެރިކަމާއި، ޓޫރިޒަމް، އިއާދަކުރަނިވި ހަކަތަ، ސިއްހީ ދާއިރާ، ތައުލީމީ ދާއިރާ އަދި ފިންޓެކް ފަދަ ދާއިރާތަކުން ދެ ގައުމުގެ ދެމެދުގައި އިންވެސްޓްމަންޓްތައް އިތުރުކުރެވޭނެއެވެ. ޗައިނާއާއެކުވެސް ރާއްޖެއިން މިނިވަން ވިޔަފާރީގެ އެއްބަސްވުމެއް ގާއިމުކޮށްފައިވާއިރު، އިންޑިއާއާއެކު މި އެއްބަސްވުމަށް އަމަލުކުރަން ފެށުމުން ދުނިޔޭގެ އެންމެ ބޮޑު ދެ މާކެޓަށް ދިވެހި އުފެއްދުންތައް ވިއްކުމުގެ ފަހި މަގު ތަނަވަސްވެ، ދުނިޔޭގެ އިގްތިސާދީ ލޮޅުންތަކުން ސަލާމަތްވުމަށް ރާއްޖޭގެ އިގްތިސާދީ ވިލުންވެރިކަން އިތުރަށް ހަރުދަނާވެގެންދާނެ ކަމަށް ސަރުކާރުން ލަފާކުރެއެވެ.
ކޮމެންޓު ފޮނުވާ