އާންމުންނަށް ފޯރުކޮށްދޭ ޚިދުމަތްތައް އިތުރަށް ފުޅާކުރުމުގެ ގޮތުން، ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގެ އައު ކޯލް ސެންޓަރެއް އަންނަ ޖުލައި މަހުގެ ތެރޭގައި އައްޑޫ ސިޓީގައި ހުޅުވައި ޚިދުމަތް ދޭން ފެށުމަށް އެ އިދާރާއިން ނިންމައިފިއެވެ.
މިކަން ހާމަކުރައްވައި މީސްމީޑިއާގައި އާންމުކުރެއްވި ވީޑިއޯ މެސެޖެއްގައި އެންސްޕާގެ ސީއީއޯ އާމިނަތު ޝިރުނާ ވިދާޅުވީ، ދެކުނުގެ އެންމެ ބޮޑު އާބާދީގައި މި މަރުކަޒު ގާއިމުކުރެވިގެން ދިޔުމުން، ކޯލް ސެންޓަރުން ޚިދުމަތް ދޭ ވަގުތުތައް އިތުރުކުރެވިގެންދާނެ ކަމަށެވެ. އަދި މީގެ ސަބަބުން މުޅި ރާއްޖޭގެ އެކި ކަންކޮޅުތަކުގައި ދިރިއުޅޭ ރައްޔިތުންނަށް އެޖެންސީއާ މުއާމަލާތްކޮށް ޚިދުމަތް ހޯދުމުގައި ވަރަށް ބޮޑު ލުއިފަސޭހަތަކެއް ލިބިގެންދާނެކަން އެކަމަނާ ފާހަގަކުރެއްވިއެވެ.
އެންސްޕާގެ ރަސްމީ ހޮޓްލައިން '1402′ މެދުވެރިކޮށް މިހާރުވެސް އާންމުންނަށް ގިނަ ޚިދުމަތްތަކެއް އަންނަނީ ފޯރުކޮށްދެމުންނެވެ. އޭގެ ތެރޭގައި މެޑިކަލް ވެލްފެއަރގެ މައުލޫމާތާއި، ޚާއްސަ އެހީއަށް ބޭނުންވާ ފަރާތްތަކަށް ދޭ އިނާޔަތްތަކުގެ ތަފުސީލު ހޯދުމުގެ އިތުރުން، އެކިއެކި އެހީތަކަށް އެދޭ ފޯމުތައް ފުރިހަމަކުރުމުގައި ބޭނުންވާ ފަންނީ އެހީތެރިކަން ހިމެނެއެވެ.
ކޯލް ސެންޓަރުގެ ޚިދުމަތުގެ އިތުރުން، ޒަމާނީ ޓެކްނޮލޮޖީގެ އެހީގައި ފަސޭހައިން ޚިދުމަތް ހޯދޭނެ މަގު ތަނަވަސްކޮށްދިނުމަށް ސަރުކާރުގެ 'ވަން ގަވް' ޕޯޓަލް މެދުވެރިކޮށްވެސް އެންސްޕާގެ ގިނަ ޚިދުމަތްތަކަކަށް މިހާރު އެދެވެއެވެ. އެގޮތުން، އެކަނިވެރި މައިންނާއި ބަފައިންނަށް ދޭ އެލަވަންސާއި، ފަގީރުންނަށް ދޭ ކާބޯތަކެތީގެ އެހީއާއި، ތެލެސީމިއާ ކުދިންގެ އިނާޔަތުގެ އިތުރުން، ނުކުޅެދުންތެރިކަން ހުންނަ ފަރާތްތަކަށް ބޭނުންވާ ތެރަޕިއުޓިކް ފަރުވާގެ އެހީއަށްވެސް އޮންލައިންކޮށް ފޯމު ހުށަހެޅޭނެ އިންތިޒާމު ވަނީ ހަމަޖައްސާފައެވެ.
ކޮމެންޓު ފޮނުވާ