ދ. މީދޫ ކައުންސިލްގެ ރައީސަކު ހޮވުމަށް އިއްޔެ ބޭއްވި ބައި-އިލެކްޝަން ސަރުކާރު ހިންގާ ޕާޓީ، ޕީއެންސީން ކާމިޔާބު ކުރުމާ ގުޅިގެން، އެ އުފަލުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެރަށަށް ވަޑައިގެންފިއެވެ.
މި އިންތިޚާބަކީ، ކުރިން ބޭއްވި އިންތިޚާބުގެ ވޯޓު ހައިކޯޓުގެ އަމުރަކަށް އަލުން ގުނުމުން ޕީއެންސީގެ ކެންޑިޑޭޓް ސުހާ އިބްރާހީމް އަދި އެމްޑީއޭގެ ކެންޑިޑޭޓް މުޙައްމަދު ޝާހިދުގެ ވޯޓު އެއްވަރުވުމުގެ ސަބަބުން އަލުން ބޭއްވި އިންތިޚާބެކެވެ. އިއްޔެގެ ވޯޓލުމުން ސުހާ ވަނީ 529 ވޯޓު ހޯއްދަވައި، 80 ވޯޓުގެ ތަފާތަކުން ޝާހިދުގެ މައްޗަށް ކުރި ހޯއްދަވާފައެވެ. މި އިންތިޚާބުގައި ޝާހިދަށް ލިބިވަޑައިގަތީ 449 ވޯޓެވެ.
މި ކާމިޔާބީ ފާހަގަކުރެއްވުމަށް ރައީސް މުޢިއްޒުއާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު މީދޫއަށް ވަޑައިގަތުމުން، އެރަށުގެ ކުދިބޮޑު ގިނަ އަދަދެއްގެ ރައްޔިތުން ވަނީ ބަނދަރު ސަރަޙައްދަށް ޖަމާވެ އެ ދެކަނބަލުންނަށް ވަރަށް ހޫނު މަރުޙަބާއެއް ދަންނަވާފައެވެ.
މީގެ އިތުރުން، މި އިންތިޚާބާ ގުޅިގެން ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އިން ބުނެފައިވަނީ، ވޯޓުލުމުގެ އެންމެހާ ކަންކަން އިލެކްޝަންސް ކޮމިޝަނުން ކުރިއަށް ގެންދިޔައީ ވަރަށް ފުރިހަމައަށް ކަމަށެވެ.
ކޮމެންޓު ފޮނުވާ