އެމެރިކާއިން ދިން އަސްކަރީ ހަމަލާތަކަކަށް ރައްދުދިނުމުގެ ގޮތުން އީރާނުން ހޮރްމޫޒް ކަނޑުއޮޅި ބަންދުކުރުމާ އެކު، ދުނިޔޭގެ ބާޒާރުގައި ތެލުގެ އަގު ވަރަށް ބޮޑަށް އުފުލިއްޖެ އެވެ.
މި ބަދަލާއެކު ބްރެންޓް ކްރޫޑްގެ އަގު ފީފާއަކަށް 95.40 ޑޮލަރަށް އަރާފައިވާއިރު، އެމެރިކާގެ ވެސްޓް ޓެކްސަސް އިންޓަމީޑިއަޓް ކްރޫޑްގެ އަގު ވަނީ 92.63 ޑޮލަރަށް މައްޗަށް ގޮސްފަ އެވެ. އީރާނުގެ އަސްކަރިއްޔާއިން ވަނީ ވިޔަފާރި އުޅަނދުތަކާއި ތެޔޮ ޓޭންކަރުތަކަށް އެ ކަނޑުއޮޅި ބޭނުންކުރުން މަނާކޮށް، އެ ސަރަހައްދުން ދަތުރުކުރާ ކޮންމެ އުޅަނދަކަށް ހަމަލާދޭނެ ކަމުގެ އިންޒާރު ދީފަ އެވެ. ދުނިޔޭގެ ތެލާއި ގޭހުގެ ބޮޑު ބައެއް އާންމުކޮށް އުފުލަނީ މި މުހިންމު ކަނޑުއޮޅި މެދުވެރިކޮށެވެ.
ނަމަވެސް، އެމެރިކާގެ އަސްކަރިއްޔާއިން ބުނާ ގޮތުގައި ވިޔަފާރި އުޅަނދުތައް އަދިވެސް ދަނީ އެ ސަރަހައްދުން ދަތުރުކުރަމުންނެވެ. އަދި އެމެރިކާގެ މަނަވަރަކަށް އީރާނުން ހަމަލާދިން ކަމަށް ބުނާ ވާހަކަތައް އެ ގައުމުން ވަނީ ދޮގުކޮށްފަ އެވެ. ދެ ގައުމުގެ ދެމެދުގައި އުފެދިފައިވާ މި ނުތަނަވަސްކަމުގެ ސަބަބުން، މިދިޔަ އޭޕްރިލް މަހު ގާއިމުކުރި ހަނގުރާމަ މެދުކަނޑާލުމުގެ އެއްބަސްވުން ރޫޅިދާނެ ކަމުގެ ބިރު ވަނީ ބޮޑުވެފަ އެވެ.
ތެލުގެ އަގު އުފުލުމަށް މެދުވެރިވި އަނެއް ސަބަބަކީ އެމެރިކާގެ ތެލުގެ ރިޒާވްއިން 7.2 މިލިއަން ފީފާ މަދުވެފައިވާ ކަމަށް އެ ގައުމުން ހާމަކުރުމެވެ. މިއީ މާހިރުން ލަފާކުރި ވަރަށް ވުރެ މާ ބޮޑު ދަށްވުމެކެވެ. މިދިޔަ ފެބްރުއަރީ މަހުން ފެށިގެން ހިނގަމުންދާ ހަމަނުޖެހުންތަކާ ގުޅިގެން ދުނިޔޭގެ ހަކަތައިގެ ސަޕްލައިއަށް ބުރޫއަރައި، ދިގު މުއްދަތަކަށް މިކަން ދެމިގެން ހިނގައްޖެނަމަ އިގްތިސާދަށް ބޮޑެތި ގެއްލުންތަކެއް ވެދާނެ ކަމުގެ ކަންބޮޑުވުން މިހާރު ވަނީ އިންތިހާއަށް އިތުރުވެފަ އެވެ.
ކޮމެންޓު ފޮނުވާ