އެމެރިކާގައި ފާއިތުވެދިޔަ ހަފްތާގައި، ހިގި ހަމަނުޖެހުންތަކަށް ހިއްވަރު ދެއްވިކަމުގެ ތުހުމަތުގައި އެމެރިކާގެ ރައީސް ޑޮނަލްޑް ޓަރްމްޕަށް ހުރިހާ ފަރާތަކުން ފިއްތުންތައް ކުރިމަތިވަމުން ދަނިކޮށް، އެމެރިކާގެ ނިއުޔޯކު ސްޓޭޓުން ޓްރަޕްގެ ކުންފުނިތަކާއެކު ހަދާފައިވާ ވިޔަފާރީގެ އެއްބަސްވުންތައް އުވާލުމަށް ނިންމާފައިވާކަން އެ ސްޓޭޓުގެ މޭޔަރ ބިލް ޑީ ބްލާސިއޯ އިއުލާން ކުރައްވައިފިއެވެ.

ޓްރަމްޕް އޯގަނިޒޭޝަނުން ވަނީ، ނިއުޔޯކު ސިޓީއާއެކު، އެސިޓީގައި އައިސްކޭޓް ކުރާ ދެ ރިންކްއަކާ އަދި ނިއުޔޯކުގެ ސެންޓްރަލް ޕާކުގައި ތަރައްގީ ކޮށްފައިވާ ކޯސަލްއަކާއި އަދި މީގެއިތުރުން އެސިޓީގެ ބްރޮންކްސްގައި ގޯލްފް ކޯސްއެއް ހިންގުމަށް ސިޓީ ކޮންޓްރެކްޓެއްގައި ސޮއިކޮށްފައެވެ.

މޭޔަރ ބިލް ޑީ ބްލާސިއޯ ވިދާޅުވި ގޮތުގައި، މި ތަންތަނުން ޓްރަމްޕް އޯގަނިޒޭޝަނަށް އަހަރަކު 17 މިލިއަން ޑޮލަރުގެ ފައިދާއެއް ވަމުން ދާކަމަށެވެ.

"އަހަރެން މިއަދު މިއިއުލާން ކުރަނީ، ނިއުޔޯކު ސިޓީން ޓްރްމަޕް އޯގަނިޒޭޝަނާއެކު ހަދާފައިވާ ހުރިހާ އެއްބަސްވުމެއް ބާތިލް ކުރުމަށް ނިންމާފައިވާކަމަށް،" ބިލް ޑީ ބްލާސިއޯ ވިދާޅުވިއެވެ.

މިއީ، ޖެނުއަރީ މަހުގެ 6 ވަނަދުވަހު، ޓްރަމްޕަށް ތާއީދުކުރާ ފަރާތްތަކުން ގާނޫނު ހަދާ މަޖިލިހަށް ދިން ހަމަލާއަށްފަހު، ރިޕަބްލިކަން ޕާޓީއަށް ނިސްބަތްވާ، އެމެރިކާގެ މިހާރުގެ ރައީސް ޑޮނަލްޑް ޓްރަމްޕްގެ ވިޔަފާރީގެ މަސްލަހަތުތަކަށް ލިބެނުންދާ ގެއްލުންތަކުގެ ތެރެއިން އެންމެފަހުން ލިބިގެން ގޮސްފައިވާ އެންމެ ބޮޑު ގެއްލުމެވެ.

އެމެރިކާގައި ގޮލްފް ކުރިއެރުވުމަށް މަސައްކަތްކުރާ ޕީޖީއޭ އޮފް އެމެރިކާއިން މިހަފްތާގެ އާދީއްތަ ދުވަހުވަނީ، އަންނަ އަހަރު އެޖަމައިއްޔާއިން ބޭއްވުމަށް ހަމަޖައްސާފައިވާ ގޯލްފް ޗެމްޕިއަންޝިޕް، ޓްރަމްޕްގެ ނިއު ޖާޒީ ގޯލްފް ކޯސްގައި ނުބޭއްވުމަށް މިހާރު ހަމަޖައްސާފައިވާ ކަންވެސް އިއުލާން ކޮށްފައެވެ.

ޓްރަމްޕްގެ ސަޕޯޓަރުންނަށް އެމެރިކާގެ ގާނޫނު ހަދާ މަޖިލިސްކުރާގެ ކެޕިޓަލް ހިލްއަށް ހަމަލާދިނުމަށް އޭނާ ހިތްވަރު ދިންކަމުގެ ތުހުމަތުގައި އެތަކެއް ސޯޝަލް މިޑީއާ ޕްލެޓްފޯމްތަކަކުން މިހާރު ވަނީ ޓްރަމްޕް ސަސްޕެންޑް ކޮށްފައެވެ. މީގެއިތުރުން، ކެނެޑާގެ މަޝްހޫރު އީކޮމާސް އޮންލައިން ވިޔަފާރި ޕްލެޓްފޯމެއް ކަމުގައިވާ، ޝޮޕިފީއިން ވަނީ އެ ޕްލެޓްފޯމުގައި ހިންގަމުންދާ ޓްރަމްޕާ ގުޅުންހުރި ހުރިހާ އޮންލައިން ސްޓޯރުތަކެއްވެސް ޑައުން ކޮށްލާފައެވެ.

އެމެރިކާގައި ހިގި ހަމަނުޖެހުންތަކާއި ގުޅިގެން ޓްރަމްޕްގެ ވިޔަފާރީ މަސްލަހަތުތަކަށް ބޮޑެތި ގެއްލުންތަކެއް ވަމުން ދާއިރު، އެމެރިކާގެ ކޮންގްރެސްއިން މިހާރު ދަނީ ޓްރަމްޕްގެ މައްޗަށް އިތުބާރު ނެތްކަމަށް ނިންމާ އޭނާ މަގާމުން ދުރުކުރުމަށްވެސް މަސައްކަތް ކުރަމުންނެވެ. މިގޮޮތުން އިއްޔެ އެމެރިކާގެ ކޮންގްރެސް (ގާނޫނު ހަދާ މަޖިލިހުގެ ތިރިގެ)ގެ ހައުސް އޮފް ރެޕްރެސެންޓޭޓިވްސްއިން، ޓްރަމްޕް މަގާމުން ދުކުރުމަށް، އެގައުމުގެ ނާއިބު ރައީސަށް ގޮވާލާ ގަރާރު ވަނީ ފާސްކޮށްފައެވެ.

އެހެހްނަނަމަވެސް، ހައުސް އޮފް ރެޕްރެސެންޓޭޓިވްސްއިން ފާސްކުރި މިގަރާރަށް ޕެންސް ދެކޮޅު ހެއްދެވުމާއެކު، މެމްބަރުން މިހާރު އަވަސްވެގެންފައިވަނީ، ގާނޫނު ހަދާ މަޖިލިހުގެ ތިރިގެއިން ޓަރްޕްގެ މައްޗަށް އިތުބާރު ނެތްކަމުގެ ވޯޓު (އިމްޕީޗްމަންޓް ވޯޓު) ނެގުމަށެވެ. ޓްރަމްޕް އިންޕީޗްކުރުމަށް ހަމަޖެހިފައިވަނީ، ގާނޫނު ހަދާ މަޖިލިސް، ކެޕިޓަލް ހިލްއަށް، ޓްރަމްޕްގެ ސަޕޯޓަރުން ދީފައިވާ ހަމަލާއާއި ގުޅިގެން، އެމެރިކާގެ "އިދާރާތަކާއި ދެކޮޅަށް ހަމަނުޖެހުން އުފެއްދުމުގެ" ތުހުމަތުގައެވެ.