އަވަށްޓެރި ގައުމުތަކުން އީރާނަށް ހަމަލާއެއް ނުދޭހާ ހިނދަކު، އެ ގައުމުތަކަށް ހަމަލާ ދިނުން ހުއްޓާލުމަށް އީރާނުން ނިންމައިފިއެވެ.
އީރާނުގެ ރައީސް މަސޫދު ޕެޒެޝްކިއަން ވިދާޅުވީ، މި ނިންމުމަށް އެ ގައުމުގެ ވަގުތީ ލީޑަޝިޕް ކައުންސިލުން މިހާރު ރުހުން ދީފައިވާ ކަމަށެވެ. އީރާނުން މިކަން ހާމަކޮށްފައި މިވަނީ، އެމެރިކާ އާއި އިސްރާއީލުން އީރާނަށް ދިން ހަމަލާތަކަށް ރައްދު ދިނުމުގެ ގޮތުން، އަވަށްޓެރި ގައުމުތަކުގައި ހުރި އެ ދެ ގައުމުގެ އަސްކަރީ މަރުކަޒުތަކަށް އީރާނުން ވަރުގަދަ ހަމަލާތަކެއް ދީފައިވާ ދަނޑިވަޅެއްގައެވެ.
މިހާރު ހިނގަމުންދާ ހަނގުރާމަ ހުއްޓުވުމަށް ބައެއް ގައުމުތަކުން މެދުވެރިންގެ ދައުރު އަދާކުރަމުން އަންނައިރު، ރައީސް ޕެޒެޝްކިއަން 'އެކްސް' ގައި ކުރެއްވި ޕޯސްޓެއްގައި ވިދާޅުވީ މެދުއިރުމަތީގެ ސަރަހައްދީ ސުލްހައަށް އީރާނުގެ ފުރިހަމަ ތާއީދާއި އެއްބާރުލުން ލިބޭނެ ކަމަށެވެ. އެހެންނަމަވެސް، އީރާނުގެ ސިޔާދަތާއި މިނިވަންކަން ދިފާއުކުރުމަށް ކުރަންޖެހުނު ކޮންމެ ކަމެއް ކުރުމުގައި ފަސްޖެހުމެއް ނެތްކަން އޭނާ ވަނީ ފާހަގަކުރައްވާފައެވެ.
ކިތަންމެ ދިގު ހަނގުރާމައަކާ ކުރިމަތިލާން ޖެހުނަސް އެކަމަށް ތައްޔާރަށް އޮތްކަން އީރާނުން މީގެ ކުރިންވެސް ވަނީ ހާމަކޮށްފައެވެ. އަދި ހޮރްމޫޒް ކަނޑުއޮޅި އާންމު ދަތުރުފަތުރަށް ހުޅުވާލާފައި އޮތް ނަމަވެސް، އެ ސަރަހައްދުން ދަތުރުކުރަން މަސައްކަތްކުރާ އެމެރިކާ އާއި އިސްރާއީލުގެ ކޮންމެ އުޅަނދަކަށް ހަމަލާދޭނެ ކަމުގެ އިންޒާރު އީރާނުގެ އަސްކަރިއްޔާއިން ވަނީ ދީފައެވެ.
ކޮމެންޓު ފޮނުވާ