އެމެރިކާއާއި އިސްރާއީލުން އީރާނާ ދެކޮޅަށް ފަށާފައިވާ ވަރުގަދަ ހަނގުރާމަ ހުއްޓާލުމަށް އެދި އެމެރިކާއާއެކު މަޝްވަރާގެ މޭޒަށް ދިއުމުގެ އެއްވެސް ޝައުގުވެރިކަމެއް ނެތް ކަމަށާއި، އީރާނުން އޮތީ ކޮންމެ ފަދަ ހަމަލާއަކަށްވެސް ތައްޔާރަށް ކަމަށް އެގައުމުގެ ޚާރިޖީ ވަޒީރު އައްބާސް އަރަގްޗީ ވިދާޅުވެއްޖެއެވެ.
އެންބީސީ ނިއުސްއަށް ދެއްވި ޚާއްސަ އިންޓަވިއުއެއްގައި އަރަގްޗީ ވިދާޅުވީ، ހަމަލާ ބަދަލުކުރުން ހުއްޓާލުމަށް އެދި އީރާނުން އާދޭސް ނުކުރާނެ ކަމަށެވެ. އަދި އެމެރިކާއަކީ އިހުލާސްތެރިކަމެއް ހުރި ބައެއް ނޫންކަން ފާހަގަކުރައްވައި އޭނާ ވިދާޅުވީ، މީގެ ކުރިންވެސް މަޝްވަރާތައް ކުރިއަށްދަނިކޮށް އެމެރިކާއިން އީރާނަށް ހަމަލާދީފައިވާތީ، އެގައުމާއެކު ވާހަކަދައްކަންޖެހޭ ސަބަބެއް މިހާރު ނެތް ކަމަށެވެ. މީގެ އިތުރުން، އެމެރިކާގެ އެއްގަމު ސިފައިން އީރާނަށް އަރައިފާނެ ކަމަށް ބަލައި އެކަމަށް ފުރިހަމައަށް ތައްޔާރުވެފައިވާ ކަމަށާއި، އެއީ އެމެރިކާއަށް ކުރިމަތިލާންޖެހޭނެ ބޮޑު ނުރައްކަލަކަށް ވާނެކަމުގެ އިންޒާރުވެސް އޭނާ ދެއްވިއެވެ.
ހަނގުރާމަ ފެށިތާ ހަ ދުވަސް ވެފައިވާއިރު، އެމެރިކާ ބޭނުންވި ފަދަ އަވަސް ކާމިޔާބީއެއް ނުލިބި އެގައުމު ނާކާމިޔާބުވެފައިވާކަން ފާހަގަކުރައްވައި އަރަގްޗީ ވަނީ ރަމަޟާން މަހު މުސްލިމް ގައުމުތަކަށް އީރާނުން ހަމަލާދޭ ކަމަށް ދެކެވޭ ވާހަކަތައް ދޮގުކުރައްވާފައެވެ. އޭނާ ތަފްސީލުކޮށްދެއްވި ގޮތުގައި އީރާނުގެ ހަމަލާތައް އަމާޒުކުރަނީ އަވަށްޓެރި ގައުމުތަކަށް ނޫން ކަމަށާއި، ހަމަލާދެނީ އެ ގައުމުތަކުގެ ފަސްގަނޑުގައި ގާއިމުކޮށްފައިވާ އެމެރިކާގެ އަސްކަރީ މަރުކަޒުތަކަށާއި ވަސީލަތްތަކަށް އެކަންޏެވެ. އަދި މިކަން އެ ގައުމުތަކުގެ ޚާރިޖީ ވަޒީރުންނަށްވެސް ސާފުކޮށްދީފައިވާނެ ކަމަށް ވިދާޅުވިއެވެ.
ދުނިޔޭގެ ތެލުގެ ވިޔަފާރީގެ މައި މަގު ކަމަށްވާ ހޯރްމޫޒް ކަނޑުއޮޅި ބަންދުކުރުމުގެ ވިސްނުމެއް މިވަގުތު ނެތް ނަމަވެސް، ހަނގުރާމައިގެ ހާލަތު ބަދަލުވަމުންދާ ގޮތަކުން އަޅަންޖެހޭ ކޮންމެ ފިޔަވަޅެއް އަޅަން އީރާނުން ފަސްނުޖެހޭނެ ކަމަށްވެސް އަރަގްޗީ ވިދާޅުވިއެވެ. މީގެ އިތުރުން، ހަމަލާތަކުގައި އަވަހާރަވެފައިވާ ئީރާނުގެ ރޫހީ ލީޑަރު އާޔަތުﷲ އަލީ ޚާމަނާއީގެ ބަދަލުގައި އައު ވެރިޔަކު ކަނޑައެޅުމަކީ ހަމައެކަނި އީރާނުގެ ރައްޔިތުންގެ ނިންމުމެއް ކަމަށާއި، އެކަމުގެ ތެރެއަށް އެމެރިކާގެ ރައީސް ޑޮނަލްޑް ޓްރަމްޕް ވަދެވަޑައިގަތުމުގެ ފުރުސަތު ނޯންނާނެ ކަމަށް އޭނާ ވިދާޅުވިއެވެ.
އީރާނުގެ ޚާރިޖީ ވަޒީރުގެ ވާހަކަ ނިންމަވާލައްވަމުން ވިދާޅުވީ، މިއީ އެމެރިކާއިން އަމިއްލަ އިހުތިޔާރުގައި ފެށި، އެއްވެސް ބަޔަކަށް ފައިދާއެއް ނެތް ހަނގުރާމައެއް ކަމަށާއި، ނަމަވެސް ގައުމުގެ ދިފާއުގައި އީރާނުން ސާބިތުކަމާއެކު ދެމިއޮންނާނެ ކަމަށެވެ.
ކޮމެންޓު ފޮނުވާ