ލ. ފޮނަދޫ ލިންކު ރޯޑުގައި މިއަދު މެންދުރުފަހު ބާރު ސްޕީޑުގައި ދުއްވާފައި ދިޔަ ކާރެއް ކޮންޓްރޯލުން ނެއްޓި، މަގުމަތީގައި ހުރި ތަކެއްޗަށް ޖެހި ނުރައްކާތެރި އެކްސިޑެންޓެއް ހިނގައިފިއެވެ.
މި ހާދިސާ ހިނގާފައިވަނީ މިއަދު 3:00 ހާއިރު، އެ އަތޮޅު ކައްދޫއިން ފޮނަދުއަށް ދުއްވާފައި ދިޔަ ކާރެކެވެ. މަންޒަރު ދުށް ފަރާތްތަކުން މަޢުލޫމާތު ދޭ ގޮތުގައި، ބާރު ސްޕީޑުގައި ދުއްވާފައި ދިޔަ އެ ކާރު ކޮންޓްރޯލުން ނެއްޓި އެންމެ ފުރަތަމަ ޖެހިފައިވަނީ މަގުގެ މެދުގައި އޮންނަ ޑިވައިޑަރ ނުވަތަ ބެޑްގައެވެ. އަދި ކާރު ގޮސް ހުއްޓިފައިވަނީ އެތަނާ ގާތްގަނޑަކަށް 50 ވަރަކަށް ފޫޓު ދުރުގައި ހުރި ހޮޅިދަނޑިއެއްގައި ޖެހިގެންނެވެ.
މި އެކްސިޑެންޓުގައި ކާރުގެ ކުރީކޮޅަށް ވަނީ ވަރަށް ބޮޑެތި ގެއްލުންތަކެއް ލިބިފައެވެ. ހާދިސާ ހިނގިއިރު ކާރުގައި ދެ މީހަކު ތިބި ނަމަވެސް، ކާރުގެ އެއާބޭގްތައް ހުޅުވުމުގެ ސަބަބުން އެއްވެސް މީހަކަށް ސީރިއަސް އަނިޔާއެއް ނުލިބި ސަލާމަތްވެފައިވާކަން ފާހަގަކުރެވެއެވެ.
ލ. އަތޮޅު ލިންކު ރޯޑަކީ އާންމުކޮށްވެސް ބާރު ސްޕީޑުގައި ދުއްވުމުގެ ސަބަބުން ނުރައްކާތެރި އެކްސިޑެންޓްތައް ހިނގާ ސަރަހައްދެކެވެ. މީގެ ކުރިން މިފަދަ ހާދިސާތަކުގައި ބައެއް މީހުންގެ ފުރާނަވެސް ގެއްލިފައިވާކަން ފާހަގަކޮށްލެވެއެވެ.
ކޮމެންޓު ފޮނުވާ