ދުނިޔޭގެ އެންމެ ބޮޑު ފަތުރުވެރިކަމުގެ ފެއާ، އައިޓީބީ ބާލިން ޖަރުމަނުވިލާތުގައި މިއަދު ފަށައިފި އެވެ. މި އަހަރުގެ ފެއާގައި ވިސިޓް މޯލްޑިވްސް ކޯޕަރޭޝަން (ވީއެމްސީ) ގެ އިތުރުން ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ 67 ކުންފުންޏަކުން ވަނީ ބައިވެރިވެފަ އެވެ.
"މޯލްޑިވްސް، ދަ ސަނީ ސައިޑް އޮފް ލައިފް" ޝިއާރުގެ ދަށުން ފަރުމާކޮށްފައިވާ ރާއްޖޭގެ ސްޓޭންޑުން، މަތީ ފަންތީގެ ރިސޯޓުތަކާއި ގެސްޓްހައުސްތަކުގެ އިތުރުން ސަފާރީތަކާއި އާއިލީ ޗުއްޓީއަށް ހާއްސަ ފުރުސަތުތައް ދައްކާލާނެ އެވެ. އަދި ތިމާވެއްޓާ ރައްޓެހި ނުވަތަ ދެމެހެއްޓެނިވި ފަތުރުވެރިކަމުގެ ތަޖުރިބާތައް ވެސް މި ފެއާގެ ތެރެއިން ދުނިޔެއަށް ހާމަކުރާނެ ކަމަށް ވީއެމްސީން މައުލޫމާތު ދެއެވެ.
ފެއާގެ ހަވާސާގައި ކުރިއަށްދާނެ އެންމެ ފާހަގަކޮށްލެވޭ އެއް ހަރަކާތަކީ "މޯލްޑިވިއަން ނައިޓް" އެވެ. މިއީ ވިލާތުގެ ޓުއާ އޮޕަރޭޓަރުންނާއި، އެއާލައިންތަކާއި އަދި މީޑިއާތަކާ ގުޅުން ބަދަހިކުރުމަށް ބާއްވާ ހާއްސަ ހަފުލާއެކެވެ. މި ހަފުލާގައި ބޭންކް އޮފް މޯލްޑިވްސް (ބީއެމްއެލް) އާ ގުޅިގެން، ފަތުރުވެރިންނަށް ފައިސާ ދެއްކުމުގައި ލުއިފަސޭހަ ގޮތްތަކެއް ހޯދައިދިނުމަށް "ސްވައިޕް" ގެ ނަމުގައި އާ ޑިޖިޓަލް ޕޭމަންޓް ސޮލިއުޝަނެއް ތައާރަފުކުރުމަށް ވަނީ ހަމަޖެހިފަ އެވެ.
މީގެ އިތުރުން، ދިވެހި ކެއުންތަކުގެ ރަހަތައް ދައްކާލުމާއި، ބައިނަލްއަގުވާމީ މީޑިއާތަކަށް ހާއްސަ ނޫސްވެރިންގެ ބައްދަލުވުމެއް ވެސް އޮންނާނެ އެވެ. މި ބައްދަލުވުމުގައި 2027 ވަނަ އަހަރަށް އަމާޒުކޮށް ރާއްޖޭގެ ފަތުރުވެރިކަން ކުރިއެރުވުމަށް ރާވާފައިވާ މުހިންމު ސްޓްރެޓެޖީތައް އިއުލާންކުރުމަށް ވަނީ ނިންމާފަ އެވެ.
ކޮމެންޓު ފޮނުވާ