އެމެރިކާ އާއި އިޒްރޭލު ގުޅިގެން އިރާނަށް ދެމުންދާ ވަރުގަދަ ހަމަލާތަކުގައި މިހާތަނަށް 787 މީހުން މަރުވެފައިވާ ކަމަށް އިރާނުގެ ރެޑް ކްރެސެންޓުން ކަށަވަރުކޮށްދީފިއެވެ.
އިރާނުގެ ވެރިކަން ބަދަލުކޮށްލުމުގެ މަޤްސަދުގައި މިދިޔަ ހޮނިހިރު ދުވަހު ފެށި މި ހަނގުރާމައިގައި، އިރާނުގެ ރޫހީ ލީޑަރު އާޔަތުﷲ އަލީ ހާމަނާއީ އާއި އަސްކަރިއްޔާގެ އިސް ކޮމާންޑަރުންތަކެއް ވަނީ އަވަހާރަކޮށްލާފައެވެ. މިކަމުގެ ރައްދުގައި އިރާނުން ވެސް ގެންދަނީ އިޒްރޭލަށާއި، މެދުއިރުމަތީގެ އެކި ޤައުމުތަކުގައި ޤާއިމުކޮށްފައިވާ އެމެރިކާގެ އަސްކަރީ މަރުކަޒުތަކަށް އަމާޒުކޮށް ހަމަލާތައް ދެމުންނެވެ.
ތަފާސްހިސާބުތައް ދައްކާގޮތުން އިރާނަށް މިހާތަނަށް 1،039 ހަމަލާއެއް ދީފައިވާއިރު، ޤައުމުގެ 153 ސަރަހައްދަކަށް އޭގެ އަސަރު ވަނީ ކޮށްފައެވެ. މަރުވި މީހުންގެ ތެރޭގައި ސިފައިންގެ 13 މީހަކު ހިމެނޭކަމަށް ރެޑް ކްރެސެންޓުން މަޢުލޫމާތު ދެއެވެ.
މަސްރަހު ފިނިވާނެކަމުގެ ނިޝާނެއް ނެތުމާއެކު، އެމެރިކާއިން ވަނީ މެދުއިރުމަތީގެ ނުރައްކާ ބޮޑު ސަރަހައްދުތަކުގައި ތިބި އެޤައުމުގެ ރައްޔިތުން ވަގުތުން ފޭބުމަށް އަންގާފައެވެ. މި އެންގުމުގައި ބަހްރެއިން، މިސްރު، އިރާގު، ސައުދީ އަރަބިއްޔާ، ޔޫއޭއީ އަދި ގަތަރު ފަދަ ޤައުމުތައް ހިމެނެއެވެ. މީޑިއާ ރިޕޯޓުތައް ބުނާގޮތުން ކުރިއަށް އޮތް 24 ގަޑިއިރުގެ ތެރޭގައި އެމެރިކާއިން އިރާނަށް އިތުރު ވަރުގަދަ ހަމަލާތަކެއް ދިނުމަށް ދަނީ ތައްޔާރުވަމުންނެވެ.
ކޮމެންޓު ފޮނުވާ