އީރާނުގެ މިހާރު އޮތް ވެރިކަން ނިމުމަކަށް ގެނެސް، އެ ޤައުމުގެ އަސްކަރީ ޤާބިލުކަން މުޅިން ނައްތާލުމަށްޓަކައި ވަރުގަދަ ހަމަލާތަކެއް ދޭން ފަށާފައިވާކަން އެމެރިކާގެ ރައީސް ޑޮނަލްޑް ޓްރަމްޕް ރަސްމީކޮށް އިއުލާން ކުރައްވައިފިއެވެ.
އިޒްރޭލާއި އެމެރިކާ ގުޅިގެން އީރާނަށް ހަމަލާތަކެއް ދިނުމަށްފަހު އާންމުކުރެއްވި ވީޑިއޯ މެސެޖެއްގައި ޓްރަމްޕް ވިދާޅުވީ، މިއީ އީރާނުގެ ރައްޔިތުންނަށް މިނިވަންކަން ހޯދައިދިނުމުގެ ވަގުތު ކަމަށެވެ. މި ހަމަލާތަކުގެ މައިގަނޑު މަގުސަދަކީ 1979 ވަނަ އަހަރުން ފެށިގެން އީރާނުގައި ވެރިކަން ކުރަމުން އަންނަ އިސްލާމީ ޖުމްހޫރިއްޔާގެ ވެރިކަން ވައްޓާލުން ކަމަށް އޭނާ ފާހަގަކުރެއްވިއެވެ. އަދި އީރާނުގެ ނޭވީ އާއި މިސައިލް އުފައްދާ ކާރުހާނާތައް ބިމާ ހަމަކޮށް، އެ ޤައުމުގެ އަސްކަރީ ބާރުވެރިކަން އެއްކޮށް ނެތިކޮށްލާނެކަމުގެ ވަރުގަދަ އިންޒާރެއް ވެސް ޓްރަމްޕް ވަނީ ދެއްވާފައެވެ.
އީރާނުގެ ރައްޔިތުންނަކީ ފަޚުރުވެރި ބައެއްކަން ފާހަގަކުރައްވައި ޓްރަމްޕް ވަނީ، ހަމަލާތައް ކުރިއަށްދާ ވަގުތުތަކުގައި ރައްކާތެރިކަން ހޯދުމަށް ގޭގައި ތިބުމަށް ރައްޔިތުންނަށް އިލްތިމާސްކުރައްވާފައެވެ. ނަމަވެސް، ހަމަލާތައް ނިމުމާއެކު ރައްޔިތުން ނުކުމެ ސަރުކާރުގެ އިދާރާތައް ހިފައި، ވެރިކަން ރައްޔިތުންގެ އަތްމައްޗަށް ގެނައުމަށް އޭނާ ގޮވާލެއްވިއެވެ. ހުރިހާ ދިމާލަކުން ވެސް ނުރައްކާތެރި ހަމަލާތައް އަމާޒުވާނެތީ ބޭރަށް ނުނިކުތުމަށް އޭނާ ތަކުރާރުކޮށް އެދިވަޑައިގެންނެވިއެވެ.
މީގެއިތުރުން، އީރާނުގެ ސިފައިންނާއި ސަލާމަތީ ބާރުތަކަށް އަމާޒުކޮށް ޓްރަމްޕް ވިދާޅުވީ، ފުރާނަ ސަލާމަތް ކުރަން ބޭނުންނަމަ ހަތިޔާރު ބެހެއްޓުމަށެވެ. ހަތިޔާރު ދޫކޮށްލާ ސިފައިންނާއި، ފުލުހުންނާއި އަދި އިންޤިލާބީ ގާޑުންގެ މެމްބަރުންނަށް ރައްކާތެރިކަން ލިބޭނެ ކަމަށާއި، އެހެން ނޫންނަމަ މަރުން ސަލާމަތް ނުވެވޭނެ ކަމަށް ވިދާޅުވެ ޓްރަމްޕް ވަނީ އީރާނުގެ އަސްކަރިއްޔާއަށް ވަރުގަދަ އިންޒާރެއް ދެއްވާފައެވެ.
ކޮމެންޓު ފޮނުވާ