ބޭންކް އޮފް މޯލްޑިވްސް (ބީއެމްއެލް) އިން 2025 ވަނަ އަހަރުގެ މާލީ ނަތީޖާ އިއުލާނުކޮށްފައިވާއިރު، އެ ބޭންކަށް ތާރީޚީ ބޮޑު ކާމިޔާބީއެއް ލިބިއްޖެއެވެ. ތަފާސްހިސާބުތައް ދައްކާގޮތުން 2025 ވަނަ އަހަރު ޓެކްސްއަށް ކެނޑުމުގެ ކުރިން ބޭންކަށް 3.2 ބިލިއަން ރުފިޔާގެ ފައިދާއެއް ލިބިފައިވާއިރު، މިއީ އޭގެ ކުރީ އަހަރާ އަޅައިބަލާއިރު 10 އިންސައްތައިގެ ކުރިއެރުމެކެވެ. އަދި ހަމައެކަނި އަހަރުގެ ފަހު ކުއާޓަރުގައި ވެސް ހިންގުމުގެ ފައިދާގެ ގޮތުގައި 828.7 މިލިއަން ރުފިޔާ ވަނީ ހޯދާފައެވެ.
ބޭންކުގެ މާލީ ހާލަތު އިތުރަށް ވަރުގަދަވެ، ޖުމްލަ އެސެޓް ވަނީ 55.7 ބިލިއަން ރުފިޔާއަށްވުރެ މައްޗަށް އަރާފައެވެ. މި ކުރިއެރުމާއެކު، ވޭތުވެދިޔަ އަހަރު ބޭންކުން ވަނީ އާންމު ފަރުދުންނާއި ވިޔަފާރިތަކަށް 10 ބިލިއަން ރުފިޔާގެ އާ ލޯނު ދޫކޮށްފައެވެ. މީގެ އިތުރުން ބޯހިޔާވަހިކަމަށް ލުއި ހޯދައިދިނުމުގެ ގޮތުން 5 އިންސައްތައިގެ ރޭޓުގައި 'ހިޔާވެހި ފައިނޭންސިންގ' ތައާރަފްކުރުމާއި، ގެދޮރު ލޯނުގެ އިކުއިޓީ 5 އިންސައްތައަށް ކުޑަކުރުން ފަދަ މުހިންމު ބަދަލުތައް ވަނީ ގެނެސްފައެވެ.
ބޭންކުގެ ޚިދުމަތް މުޅި ރާއްޖެއަށް ފުޅާކުރުމަށް ކުރަމުންދާ މަސައްކަތުގެ ދަށުން، މިހާރު ރާއްޖޭގެ މީހުން ދިރިއުޅޭ ހުރިހާ ރަށެއްގައި އޭޓީއެމްގެ ޚިދުމަތް ވަނީ ގާއިމްކޮށްފައެވެ. އަދި ޑިޖިޓަލް ޚިދުމަތްތައް ފުޅާކޮށް، 'ސްވައިޕް' ޑިޖިޓަލް ވޮލެޓާއި ބޭރު ފައިސާގެ އެކައުންޓްތައް ތައާރަފްކުރުމަކީވެސް ފާހަގަކޮށްލެވޭ ކާމިޔާބީތަކެކެވެ. ބޭންކުގެ ސީއީއޯ މުހައްމަދު ޝަރީފް ވިދާޅުވީ މި ނަތީޖާތަކުން ދައްކުވައިދެނީ ބޭންކުގެ ސްޓްރެޓެޖިކް އަމާޒުތައް ހާސިލްވެ، މުޖުތަމައުއަށް އެހީތެރިކަން ފޯރުކޮށްދިނުމުގައި ބޭންކު ދެމިއޮތްކަން ކަމަށެވެ.
ކޮމެންޓު ފޮނުވާ