ގެދޮރުވެރިކުރުން ޕްރޮގްރާމްގެ ދަށުން ހުޅުމާލޭގައި އިމާރާތް ކޮށްފައި ވާ 704 ފްލެޓް ދޫކޮށްފައިވާ ފަރާތްތަކުގެ ތެރެއިން، ފައިސާ ނުދެއްކުމުގެ ސަބަބުން ޖޫރިމަނާ ވެފައި ވާ ފަރާތްތަކަށް ފައިސާ ދެއްކުމުގައި ލުއިތަކެއް ސަރުކާރުން ހަމަޖައްސައިދީފި އެވެ.
ހައުސިން މިނިސްޓްރީން ބުނީ މިފަދަ ލުއިތަކެއް ދިނުމަށް ނިންމީ މި ފްލެޓްތައް ލިބިފައިވާ ފަރާތްތަކުގެތެރެއިން އެއްބަސްވުމާ އެއްގޮތަށް ފައިސާ ދެއްކުމަށް އުޒުވެރިވެފައި ވާ ފަރާތްތައް، ނުދެއްކިވާ ފައިސާ ދެއްކުމަށް ލުއި ގޮތެއް ހަމަޖައްސައި ދިނުމަށް އެ މިނިސްޓްރީގައި އެދެމުންދާތީ ކަމަށެވެ.
މިކަމަށް ލުއިފަސޭހަ ގޮތްތަކެއް ހޯދައިދިނުމުގެ ގޮތުން ސެޓްލްމަންޓް އެއްބަސްވުމެއްގެ ދަށުން މިފަދަ ފަރާތްތަކަށް ނުދެއްކި ހުރި ފައިސާއާއި ޖޫރިމަނާ 6 މަސް ދުވަހަށް ބަހާލައިގެން ދެއްކޭނެ ގޮތް މިހާރު ހަމަޖައްސާފައި ވާ ކަމަށް ހައުސިން މިނިސްޓްރީން ބުނެއެވެ.
މިކަމަށް އެދޭ ފަރާތްތަކުން މިމަހުގެ 31 ވާ އާދީއްތަ ދުވަހުގެ 02:00 ގެ ކުރިން، އައިޑީ ކާޑު ކޮޕީއާއި ފްލެޓް ނަންބަރު އަދި ގުޅޭނެ ފޯން ނަންބަރު އެނގޭނެ ގޮތަށް މިނިސްޓްރީއަށް އީމެއިލުން ހުށަހެޅުމަށް ހައުސިން މިނިސްޓްރީން އެދެއެވެ.
މިނިސްޓްރީން ބުނީ މިހާތަނަށް ގަވާއިދުން ފައިސާ ދައްކާފައި ނުވާ ފަރާތްތަކުގެ ތެރެއިން، ހަ މަސް ދުވަހުގެ ލުޔަށް އެދި ހުށަނާޅާ ފަރާތްތަކާއި، 6 މަސް ދުވަހުގެ ލުއި ދިނުމަށް އެދި ހުށަހެޅުމަށް ފަހު ގާއިމްކުރާ ސެޓްލްމަންޓް އެއްބަސްވުމާ އެއްގޮތަށް ފައިސާ ނުދައްކާ ފަރާތްތަކާމެދު، ފްލެޓް ވިއްކުމުގެ އެއްބަސްވުމުގެ ދަށުން ފިޔަވަޅު އަޅާނެ ކަމަށެވެ.
މިއީ ޗައިނާ އެގްޒިމް ބޭންކުގެ ލޯންގެ އެހީގައި ހުޅުމާލޭގައި ތަރައްޤީކޮށްފައިވާ 704 ފްލެޓެވެ. މި ފްލެޓްތަކުގައި މީހުން ދިރިއުޅެން ފަށާފައިވަނީ 2018 ވަނަ އަހަރު އެވެ.
