މޯލްޑިވްސް ގޭސް ޕްރައިވެޓް ލިމިޓެޑުގެ މެނޭޖިންގ ޑިރެކްޓަރުގެ މަޤާމުގައި ހުންނަވައިގެން ރިޝްވަތު ނެންގެވިކަމަށް ތުހުމަތުކޮށް ދައުލަތުން އުފުލި ފަސް ދައުވާއެއް، އެ ކުންފުނީގެ ކުރީގެ އެމްޑީ ޢަބްދުﷲ މައުމޫންގެ މައްޗަށް ސާބިތުނުވާކަމަށް ކްރިމިނަލް ކޯޓުން މިއަދު ޙުކުމްކޮށްފިއެވެ. މައުމޫންގެ މައްޗަށް މި ދައުވާތައް އުފުލާފައިވަނީ ކުރީގެ ރައީސް ޢަބްދުﷲ ޔާމީންގެ ވެރިކަމުގައި، 2016 ވަނަ އަހަރު މޯލްޑިވް ގޭސްގެ އިސްވެރިއަކަށް ހުންނަވައިގެން ރިޝްވަތުގެ ގޮތުގައި ފައިސާ ނެންގެވިކަމަށް ބުނެއެވެ.
މި މައްސަލައިގައި ޖުމްލަ ހަތް ދައުވާއެއް ދައުލަތުން އޭނާގެ މައްޗަށް އުފުލިއިރު، އޭގެ ތެރެއިން ދެ ދައުވާއެއް ސާބިތުވާކަމަށް ކަނޑައަޅައި، 12 އަހަރާއި ނުވަ މަހާއި 18 ދުވަހުގެ ޖަލު ޙުކުމެއް މީގެ ކުރިން ވަނީ އިއްވާފައެވެ. ނަމަވެސް، ބާކީ އޮތް ފަސް ދައުވާއާ ގުޅިގެން މިއަދު ބޭއްވި ޝަރީއަތުގެ މަޖިލީހުގައި މައްސަލަ ބެއްލެވި ޤާޒީ ނިންމެވީ، އެ ދައުވާތަކުގެ ރުކުންތައް މައުމޫންގެ މައްޗަށް ސާބިތުނުވާ ކަމަށެވެ. މި މައްސަލައިގެ އަސްލު ގުޅިފައިވަނީ މޯލްޑިވް ގޭސްއަށް ބޭނުންވާ ކައްކާ ގޭސް (އެލްޕީޖީ) ބޭރުގެ ކުންފުންޏަކުން ހޯދުމަށް ހިންގި މުއާމަލާތުގެ ތެރެއިން، ރިޝްވަތުގެ ގޮތުގައި 3.1 މިލިއަން ރުފިޔާ ނެންގެވިކަމަށް ކުރެވުނު ތުހުމަތުތަކާއެވެ.
ދައުލަތުން އުފުލި ދައުވާތަކުގެ ތެރޭގައި ރިޝްވަތު ހިފުމާއި، މަޤާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދައިދިނުމާއި، ކުށެއް ކުރަން އުޅުމާއި، ކުށެއް ކުރަން އެދުމުގެ އިތުރުން ކުށެއް ކުރުމަށް ރޭވުން ފަދަ ބޮޑެތި ތުހުމަތުތައް ހިމެނެއެވެ. މިއަދު ފަސް ދައުވާއިން މައުމޫން ސަލާމަތްވި ނަމަވެސް، މީގެ ކުރިން ސާބިތުވެ ޖަލު ޙުކުމް އިއްވާފައިވާ ދެ މައްސަލަ އިސްތިއުނާފް ކުރުމަށް ފާއިތުވި ޑިސެމްބަރު މަހު ވަނީ ހައިކޯޓަށް ހުށަހަޅާފައެވެ.
ކޮމެންޓު ފޮނުވާ