ދައުލަތުގެ ބަޖެޓުން ޚަރަދުކޮށްގެން ހިންގާ ތަރައްޤީގެ މަޝްރޫޢުތައް ނުވަތަ ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) އަށް ނިމިދިޔަ އަހަރު ޖުމްލަ 8.6 ބިލިއަން ރުފިޔާ ހޭދަކޮށްފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ. މިއީ އޭގެ ކުރީ އަހަރު ކަމަށްވާ 2024 ވަނަ އަހަރު ޕީއެސްއައިޕީއަށް ހޭދަކުރި 11.9 ބިލިއަން ރުފިޔާއާ އަޅާބަލާއިރު 3.2 ބިލިއަން ރުފިޔާ ދަށް ޢަދަދެކެވެ. އަދި މިއީ މިދިޔަ އަހަރު ޕީއެސްއައިޕީއަށް ހޭދަކުރުމަށް ބަޖެޓުގައި ކަނޑައެޅި 12.3 ބިލިއަން ރުފިޔާއަށްވުރެ ވެސް މަދު ޢަދަދެކެވެ.
ފިނޭންސް މިނިސްޓްރީން އާންމުކޮށްފައިވާ "ވީކްލީ ފިސްކަލް ޑިވެލޮޕްމަންޓް" ރިޕޯޓަށް ބަލާއިރު، މިދިޔަ އަހަރު އެންމެ ބޮޑު ހޭދައެއް ކޮށްފައިވަނީ އެއަރޕޯޓް ތަރައްޤީކުރުމުގެ މަޝްރޫޢުތަކަށެވެ. އެގޮތުން އެއަރޕޯޓް މަޝްރޫޢުތަކަށް ބަޖެޓުގައި 2.3 ބިލިއަން ރުފިޔާ ކަނޑައަޅާފައި އޮތް ނަމަވެސް، އަހަރު ނިމުނުއރު އެ ދާއިރާއަށް 3.4 ބިލިއަން ރުފިޔާ ވަނީ ޚަރަދުކޮށްފައެވެ. މިއީ ބަޖެޓު ކުރެވުނު ވަރަށްވުރެ އިތުރު އަދަދެކެވެ.
މީގެ އިތުރުން ހިންގުނު އެހެނިހެން މައިގަނޑު މަޝްރޫޢުތަކުގެ ތަފްސީލަށް ބަލާއިރު، ބްރިޖު މަޝްރޫޢަށް 923.6 މިލިއަން ރުފިޔާ ހޭދަކޮށްފައިވާއިރު، ބިން ހިއްކުމުގެ މަޝްރޫޢުތަކަށް 652.5 މިލިއަން ރުފިޔާ ވަނީ ހޭދަކޮށްފައެވެ. އަދި މަގު ހެދުމުގެ މަޝްރޫޢުތަކަށް 574.3 މިލިއަން ރުފިޔާ ހޭދަކުރިއިރު، ތިމާވެށި ޙިމާޔަތްކުރުމާ ގުޅޭ އެކިއެކި މަޝްރޫޢުތަކަށް 696.4 މިލިއަން ރުފިޔާ ހަރަދުކޮށްފައިވާ ކަމަށް ތަފާސްހިސާބުތަކުން ދައްކައެވެ. ފެނާއި ނަރުދަމާގެ ދާއިރާއަށް ހޭދަކޮށްފައިވަނީ 366.9 މިލިއަން ރުފިޔާއެވެ.
ކޮމެންޓު ފޮނުވާ