ރާއްޖޭގައި ގަވާއިދާ ޚިލާފަށް ހިންގާ ފާމަސީތަކާއި، ކަމާބެހޭ ހުއްދަ ނެތި މަސައްކަތްކުރާ ފާމަސިސްޓުންނާ މެދު ގާނޫނީ ގޮތުން އަޅަންޖެހޭ ހަރުކަށި ފިޔަވަޅުތައް އަޅާނެކަމުގެ އިންޒާރު މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ދީފިއެވެ. އެ އޮތޯރިޓީން ނެރުނު ބަޔާނެއްގައި ބުނެފައިވަނީ، ދިވެހިރާއްޖެއަށް ބޭސް އެތެރެކޮށް ވިއްކުމުގެ ވިޔަފާރި ކުރެވޭނީ ހަމައެކަނި އެ އޮތޯރިޓީގައި ރަޖިސްޓްރީވެ، ލައިސަންސް ލިބިފައިވާ ފަރާތްތަކަށް ކަމަށެވެ. އެހެންކަމުން ބޭސް ވިއްކާ ކޮންމެ ފާމަސީއަކީ ރަޖިސްޓްރީ ކޮށްފައިވާ ތަނަކަށް ވުމާއެކު، އެތަންތަނުގައި ޚިދުމަތް ދޭން ތިބޭ ފަރާތްތަކަކީވެސް ކަމާބެހޭ ހުއްދަ އޮންނަ ފަންނީ މާހިރުންނަށް ވުން ލާޒިމުކަމަށް އެމްއެފްޑީއޭއިން ފާހަގަކުރެއެވެ.
އެމްއެފްޑީއޭއިން ވަނީ ބޭސް ވިއްކުމުގެ ހުއްދަ ނެތި ބޭސް ވިއްކުމާއި، ފާމަސިސްޓް އައިޑީ ކާޑު ނެތި އެ މަސައްކަތުގައި ހަރަކާތްތެރިވުމަކީ މަނާ ކަމެއްކަން ހަނދާންކޮށްދީފައެވެ. އަދި އާންމު ރައްޔިތުންގެ ސިއްހީ ރައްކާތެރިކަން ކަށަވަރުކުރުމުގެ ގޮތުން، ބޭސް ގަންނައިރު ޚާއްސަ ސަމާލުކަމެއް ދިނުމަށް އެ އޮތޯރިޓީން ވަނީ އިލްތިމާސްކޮށްފައެވެ. އެގޮތުން، ޚިދުމަތް ހޯދާ ފާމަސީއަކީ ބޭސް ވިއްކުމުގެ ހުއްދަ ބަހައްޓާފައި ހުރި ތަނެއްތޯ އާއި، ޚިދުމަތްދޭ މުވައްޒަފުގެ އަތުގައި ފާމަސިސްޓް އައިޑީ ކާޑު އޮތްތޯ ބެލުމަށް އެދިފައިވެއެވެ. މީގެ އިތުރުން ބޭހުގެ މުއްދަތު ހަމަވެފައިވޭތޯ ބެލުމާއި، ބޭނުންކުރާނެ ގޮތުގެ އިރުޝާދު ސާފުކޮށް ލިޔެފައިވޭތޯ އަދި ބޭސް ބަންދުކޮށްފައި ވަނީ ރައްކާތެރިކަމާއެކުތޯ (މިސާލަކަށް ފިނިކުރަން ޖެހޭ ބޭސް، އައިސްޕެކާއެކު ހުރިތޯ) ޔަގީންކުރުމަށްވެސް އެމްއެފްޑީއޭއިން ނަސޭހަތްތެރިވެއެވެ.
މި މިންގަނޑުތަކާ ޚިލާފަށް އަމަލުކުރާ ފަރާތްތައް ހޯދައި، އެ ފަރާތްތަކާމެދު ފިޔަވަޅު އަޅަމުންދާނެ ކަމަށާއި، މިކަމާ ގުޅޭގޮތުން ޝަކުވާއެއް ނުވަތަ އިތުރު މައުލޫމާތެއް ސާފުކުރަން ބޭނުންވާނަމަ އެ އޮތޯރިޓީގެ ހޮޓްލައިން ނަންބަރު 7200321 އަށް ގުޅުމަށް އެމްއެފްޑީއޭއިން ވަނީ އެދިފައެވެ.
ކޮމެންޓު ފޮނުވާ