ދުނިޔޭގެ ދުންފަތުގެ އިސްތިޢުމާލު ނުކުރާ ދުވަހާ ގުޅުވައިގެން ދެވޭ އެވޯޑަށް ކުރިމަތިލުމުގެ ފުރުސަތު ހެލްތު ޕްރޮޓެކްޝަން އެޖެންސީ (އެޗްޕީއޭ)އިން މިހާރު ހުޅުވާލައިފިއެވެ.
ކޮންމެ އަހަރެއްގެ މެއި މަހުގެ 31 ވަނަ ދުވަހު ފާހަގަކުރާ ދުނިޔޭގެ ދުންފަތުގެ އިސްތިޢުމާލު ނުކުރާ ދުވަހުގެ މުނާސަބަތުގައި ސިއްޙަތު ޖަމިއްޔާއިން ދެއްވަނީ "ވޯލްޑް ނޯ ޓޮބޭކޯ ޑޭ އެވޯޑް" އެވެ. މި އެވޯޑަކީ ދުންފަތް ކޮންޓްރޯލްކުރުމުގައި ޝާމިލުވާ ފަރާތްތަކުން ކުރާ މަސައްކަތްތަކުގެ އަގުވަޒަންކޮށް، އެ މަސައްކަތުގައި ދެމިތިބުމަށް ހިތްވަރުދިނުމުގެ މަޤްސަދުގައި ދެވޭ އެވޯޑެކެވެ.
އެޗްޕީއޭއިން ބުނީ ދުންފަތުގެ ނުރައްކަލުން މުޖުތަމަޢު ރައްކާތެރިކުރުމުގެ ގޮތުން މަސައްކަތްކުރާ ފަރުދުންނާއި، ޖަމިއްޔާ ޖަމާޢަތްތަކާއި، އިދާރާތަކުން މި އެވޯޑަށް އެދި ކުރިމަތިލުމުގެ ފުރުސަތު މިހާރު ހުޅުވާލައިފައިވާ ކަމަށެވެ. މިއަހަރުގެ ދުނިޔޭގެ ދުންފަތުގެ އިސްތިޢުމާލު ނުކުރާ ދުވަހުގެ ޝިޢާރަކީ "އަންމާސްކިންގ ދަ އެޕީކް-ކައުންޓަރިން ނިކޮޓިން އެންޑް ޓޮބޭކޯ އެޑިކްޝަން" އެވެ.
މި އެވޯޑަށް އެދި ހުށަހަޅަން ބޭނުންފުޅުވާ ފަރާތްތަކުން ޑަބްލިއުއެޗްއޯގެ ލިންކް މެދުވެރިކޮށް މިމަހުގެ 16 ވަނަ ހުކުރު ދުވަހުގެ ކުރިން ހުށަހެޅުމަށް އެޗްޕީއޭއިން އެދިފައިވެއެވެ.
ކޮމެންޓު ފޮނުވާ