ވެނެޒުއޭލާގެ ކުރީގެ ރައީސް ނިކޮލަސް މަދޫރޯ އާއި އޭނާގެ އަނބިކަނބަލުން ސީލިއާ ފްލޯރެސް ހޯމަ ދުވަހު މެންހަޓަންގެ ފެޑެރަލް ކޯޓަކަށް ހާޒިރުކޮށްފިއެވެ. ބްރުކްލިންގެ ޖަލަކުން ހެލިކޮޕްޓަރެއްގައި މެންހަޓަނަށް މި ދެމަފިރިން ބަދަލުކުރިއިރު، އެމީހުން ތިބީ ވަރުގަދަ ސަލާމަތީ ފިޔަވަޅުތަކާއެކު ބިޑި އަޅުވާފައެވެ. ކޯޓަށް އެމީހުން ގެންދެވުނީ ވަޒަން ނާރާ ރައްކާތެރި އުޅަނދެއްގައި ކަމަށް މީޑިއާތަކުން ރިޕޯޓުކުރެ އެވެ.
އުމުރުން 63 އަހަރުގެ މަދޫރޯ ހައްޔަރުކޮށްފައި ވަނީ މިދިޔަ ހޮނިހިރު ދުވަހު ކަރަކާސްގައި ހުންނަ ރިޔާސީ ގަނޑުވަރުން އެމެރިކާގެ ޚާއްޞަ ސިފައިންގެ ފައުޖަކުން ހިންގި އޮޕަރޭޝަނެއްގައެވެ. އޭނާ އާއި އޭނާގެ އަނބިކަނބަލުންގެ މައްޗަށް އުފުލާފައި ވަނީ މަސްތުވާތަކެތީގެ ވަގު ވިޔަފާރިކުރުމުގެ ދައުވާއެވެ. ކޮންމެހެން ހިންގަންޖެހޭ އިޖުރާއަތްތަކެއްގެ މަތިން ފަނޑިޔާރެއްގެ ކުރިމައްޗަށް މި ދެމަފިރިން ހާޒިރުކުރީ އެމެރިކާގައި މަދޫރޯގެ މައްޗަށް ޝަރީއަތް ހިންގިދާނެތޯ ކަނޑައެޅުމަށް ކުރިއަށްދާ ގާނޫނީ މަރުހަލާގެ ބައެއްގެ ގޮތުންނެވެ.
ރައީސް ޓްރަމްޕް ވަނީ ވެނެޒުއޭލާ ވަގުތީ ގޮތުން އެމެރިކާ އިން ބަލަހައްޓާނެ ކަމަށް ވިދާޅުވެފައެވެ. ނަމަވެސް ޚާރިޖީ ވަޒީރު މާކޯ ރޫބިއޯ އާދީއްތަ ދުވަހު ވިދާޅުވީ ތެލުގެ ވިޔަފާރިއާ ގުޅޭ ގޮތުން އަޅާފައިވާ ހުރަސްތައް ތަންފީޒުކުރުން ފިޔަވައި، އެ ގައުމުގެ ދުވަހުން ދުވަހަށް ކުރަންޖެހޭ ކަންކަމުގެ ތެރެއަށް އެމެރިކާ އިން ނުވަންނާނެ ކަމަށެވެ. މި ހާދިސާއާ ގުޅިގެން ޗައިނާ އާއި އީރާނުން މަދޫރޯ މިނިވަންކުރުމަށް އެމެރިކާ އަށް ގޮވާލާފައިވާއިރު، މިގައުމުތަކުން ބުނެފައިވަނީ އެމެރިކާގެ މި އަމަލަކީ ބައިނަލްއަގުވާމީ ގާނޫނުތަކާ ކަނޑައެޅިގެން ޚިލާފު ކަމެއް ކަމަށެވެ.
ކޮމެންޓު ފޮނުވާ