ހއ. ކެލާ، ކާނިގަސްދޮށުގޭ ޢަބްދުލްފައްތާހު ޢަބްދުލްޤައްޔޫމް ކުއްލި ގޮތަކަށް ނިޔާވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޢާއިލާއަށް ތަޢުޒިޔާ ވިދާޅުވެއްޖެއެވެ. ރައީސް ކުރެއްވި ސޯޝަލް މީޑިއާ ޕޯސްޓެއްގައި ޢާއިލާއަށް ތަޢުޒިޔާ ދަންނަވައި، މައްޔިތާއަށް ސުވަރުގޭގެ ދާއިމީ ނިޢުމަތް ދެއްވުމަށާއި، މާތް ﷲ ގެ ރުއްސެވުމާއި ފުއްސެވުމުގައި ލެއްވުމަށް އެދި ދުޢާ ދަންނަވާފައިވެއެވެ.
54 އަހަރުގެ ފައްތާހު ނިޔާވީ ސްޓްރޯކެއް ޖެހި ފަރުވާ ދެމުން ދަނިކޮށެވެ. ހަމަޖެހި ދިރިއުޅުމެއް ކެލާގައި ހޭދަކުރަމުން ގެންދިޔަ ފައްތާހު ސްޓްރޯކް ޖެހުނީ އެ ރަށުގައި ހުއްޓައެވެ. ވަގުތުން ދިއްދޫ އަތޮޅު ހޮސްޕިޓަލަށް ގެންދިޔަ ނަމަވެސް ފަރުވާ ދެމުން ދަނިކޮށް އޭނާ ވަނީ ނިޔާވެފައެވެ. ފައްތާހުގެ މައްޗަށް ކަށުނަމާދު ކުރީ ރޭ ފަތިހުގެ ނަމާދަށްފަހު ދިއްދޫ މަސްޖިދުލް ޣުފްރާން ހުކުރު މިސްކިތުގައެވެ. އަދި ވަލުލާފައިވަނީ އެ ރަށުގެ ދެކުނު ސަހަރާގައެވެ.
ފިލްމީ ދާއިރާއިން މުޅީން ދުރުވެ އަމިއްލަ ވިޔަފާރީގައި އުޅެމުން ގެންދިޔަ ފައްތާހު ނިޔާވިއިރު އިރު ދިޔައީޗކައުންސިލް އިންތިހާބުގައި ވާދަކުރުމަށް ތައްޔާރުވަމުންނެވެ. ސަރުކާރު ހިންގާ ޕީއެންސީގެ ޓިކެޓް ހޯދައިގެން ކައުންސިލް ރައީސްގެ މަގާމަށް ވާދަކުރަން ނިންމި އޭނާ، ފޯރިގަދަ ކެމްޕެއިނެއް ކުރަމުން ގެންދިޔައެވެ. ފައްތާހުގެ ކުއްލި ނިޔާވުމާއި ގުޅިގެން ގިނަ ބަޔަކު ދަނީ ހިތާމަކޮށް ތަޢުޒިޔާ ކިޔަމުންނެވެ.
ކޮމެންޓު ފޮނުވާ