މެދުރާއްޖެތެރޭގެ ރަށެއްގައި އަންހެން މީހަކަށް ވަޅިން ހަމަލާދީ މަރާލަން އުޅުނު ކަމަށް ތުހުމަތުކުރެވޭ ފިރިހެނަކު ބަންދުން ދޫކޮށްލި މައްސަލަ މިއަދު ސުޕްރީމް ކޯޓުގައި ފަށަން ތާވަލުކޮށްފައިވެއެވެ.
މި މައްސަލައަކީ 2024 ވަނަ އަހަރުގެ ކުރީކޮޅު ހިނގި ހާދިސާއަކާ ގުޅިގެން އެ ފިރިހެން މީހާ ކޯޓު އަމުރުގެ ދަށުން ހައްޔަރުކޮށް ޝަރީއަތް ނިމެންދެން ބަންދުކޮށްފައި ހުއްޓާ، އޭނާގެ ފަރާތުން ހައިކޯޓުގައި އިސްތިއުނާފުކުރުމުން ނޮވެންބަރު މަހު ހައިކޯޓުން ބަންދުން ދޫކޮށްލި މައްސަލައެކެވެ. މި މައްސަލަ ސުޕްރީމް ކޯޓަށް ހުށަހަޅާފައި ވަނީ ދައުލަތުގެ ފަރާތުންނެވެ.
މި މައްސަލައިގައި ދައުލަތުން އެ ފިރިހެން މީހާގެ މައްޗަށް ހަތަރު ދައުވާ އުފުލާފައިވެއެވެ. އެއީ ގެވެށި އަނިޔާ ހުއްޓުވުމުގެ ގާނޫނުގެ ދަށުން ރައްކާތެރިވުމުގެ އަމުރާ ހިލާފުވުމުގެ ދައުވާއާއި، އެނގިހުރެ ހުއްދަ ނޫން ތަނަކަށް ވަދެވުމުގެ ދައުވާއާއި، ތޫނު އެއްޗެއް ބޭނުންކޮށްގެން މާރާމާރީ ހިންގުމުގެ ދައުވާއާއި، މީހެއްގެ ފުރާނައަށް ނުވަތަ ހަށިގަނޑަށް ގެއްލުމެއް ދީފާނެކަމުގެ ބިރު ދެއްކުމުގެ ދައުވާއެވެ.
މި މައްސަލައަކީ އާއްމުކޮށް ހުޅުވައިނުލާ ސިއްރުކޮށްގެން ކުރިއަށް ގެންދާ މައްސަލައެއް ކަމުން މައްސަލައިގެ ތަފުސީލް ހާމައެއް ނުވެއެވެ. މިހާރު ސުޕްރީމް ކޯޓަށް ހުށަހަޅާފައިވަނީ އަސްލު މައްސަލައިގެ ތެރެއިން އުފަންވެފައިވާ ބަންދު އަމުރުގެ މައްސަލައެއް ކަމަށް މައުލޫމާތު ލިބިފައިވެއެވެ.
ކޮމެންޓު ފޮނުވާ