ރާއްޖެއަށް މަސްތުވާތަކެތި ފޮނުވުމުގައި ބައިވެރިވާ ދިވެހިން މި ސަރަހައްދުގެ ބައެއް ގައުމުތަކުގައި ހަރަކާތްތެރިވަމުން އަންނަ ކަމަށާއި އެ މީހުން ހޯދުމަށް އިންޓަޕޯލް މެދުވެރިކޮށް މަސައްކަތްކުރަމުން އަންނަ ކަމަށް ފުލުހުން މިއަދު ހާމަކޮށްފި އެވެ.
ޑްރަގް އެންފޯސްމަންޓް ޑިޕާޓްމަންޓުން ބޭއްވި ނިއުސް ކޮންފަރެންސްގައި ވާހަކަދައްކަވަމުން ޗީފް އިންސްޕެކްޓާ އޮފް ޕޮލިސް އަހުމަދު ނާއިފް ވިދާޅުވީ މެލޭޝިއާއާއި ތައިލެންޑްގައި ތިބެގެން އެއާ ކާގޯއާއި ސީ ކާގޯ މެދުވެރިކޮށް މަސްތުވާތަކެތި ރާއްޖެއަށް ފޮނުވާ ތިން ދިވެހިން ފާހަގަކުރެވިފައިވާ ކަމަށެވެ. އެމީހުން އިލެކްޓްރޯނިކް އާއި ބަދިގެ ސާމާނުތަކުގައި ހިމެނޭ އަވަނާއި ތެލީގެ ތެރޭގައި ޑްރަގްސް ފޮރުވައިގެން އެތެރެކުރަމުން އަންނަ ކަމަށާއި އެ ތިން މީހުންގެ ތެރޭގައި ބޮޑެތި ކުށުގެ ރިކޯޑު އޮތް މީހުން ވެސް ހިމެނޭ ކަމަށް އޭނާ ވިދާޅުވި އެވެ.
ދުނިޔޭގެ ކޮންމެ ހިސާބެއްގައި ތިބިއަސް ޑްރަގް ވިޔަފާރީގައި ބައިވެރިވާ މީހުން އިންޓަޕޯލް ރެޑް ނޯޓިސް މެދުވެރިކޮށް ރާއްޖެ ގެނެސް ތަހުގީގުކުރާނެ ކަމަށާއި އެ ނޯޓިސް ނެރުމުގެ މަސައްކަތް މިހާރު ކުރަމުން އަންނަ ކަމަށް ނާއިފް ވިދާޅުވި އެވެ. މީގެ އިތުރުން ޑްރަގްސްގެ ތުހުމަތުތައް ކުރެވޭ މީހުން ރާއްޖެއިން ފިލައިގެން ދާން އުޅެނިކޮށް ހިފަހައްޓާފައިވާ ކަމަށާއި ގެރެންޓާއިންގެ ގޮތުގައި ބޭރު ގައުމަށް ދާން އުޅުން ހުއްޓުވުމަށް އެހެން ގައުމުތަކުގެ އެހީތެރިކަން ވެސް ހޯދާފައިވާ ކަމަށް އޭނާ ވިދާޅުވި އެވެ.
މިކަމާ ގުޅިގެން ފުލުހުން ވަނީ މަސްތުވާތަކެތީގެ ވިޔަފާރީގެ އިތުރު ޓްރެންޑަކާ ހެދި ކަންބޮޑުވުން ފާޅުކޮށްފަ އެވެ. ސްކޫލު ނިންމާފައި ވަޒީފާއަށް ނުގޮސް ތިބި ކުދިންނަށް ސޯޝަލް މީޑިއާގެ ކްލޯސްޑް ގްރޫޕުތަކުގައި ޑްރަގް މުއާމަލާތްތަކުގައި ބައިވެރިވުމަށް ދައުވަތު ދެމުން އަންނަ ކަމަށާއި އެކަމަށް ބެލެނިވެރިން ސަމާލުވުމަށް ނާއިފް އެދިވަޑައިގެންފި އެވެ.
ކޮމެންޓު ފޮނުވާ