މި އަހަރު މާލޭގައި ވިޔަފާރި އުސޫލުން މަސްތުވާތަކެތި ވިއްކާ 11 ތަނެއް ފުލުހުން ވަނީ ބަންދުކޮށްފައެވެ. މަސްތުވާތަކެތީގެ ވިޔަފާރިކުރާ ޖުމްލަ 50 ތަނެއް ފާހަގަކުރެވިފައިވާއިރު، މާލޭގައި އެކްޓިވްކޮށް މި ވިޔަފާރި ހިންގާ 30 ތަނެއް ފުލުހުންނަށް އެނގިފައިވާކަން ފާހަގަކުރެވެއެވެ.
މަސްތުވާތަކެތީގެ މައްސަލަތަކާ ގުޅޭގޮތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ފުލުހުންގެ ޑްރަގް އެންފޯސްމަންޓުގެ ކައުންޓަރ ނާކޮޓިކްސް އޮޕަރޭޝަންސް ހިންގެވުމާ ހަވާލުވެ ހުންނެވި ޗީފް އިންސްޕެކްޓަރ އޮފް ޕޮލިސް ފާތިޙް މުޙައްމަދު ވިދާޅުވީ، މި އަހަރު ބަންދުކުރި 11 ތަނުގެ އިތުރަށް 20 ވަރަކަށް ތަން އަދިވެސް މާލޭގައި މި ވިޔަފާރި ހިންގަމުންދާ ކަމަށް ލަފާކުރެވޭ ކަމަށެވެ.
ފާތިހް ވިދާޅުވީ، ފުލުހުން އަބަދުވެސް އެކިއެކި އޮޕަރޭޝަންސްތައް ހިންގަމުން އެތަންތަން ރޫޓިންކޮށް މޮނިޓަރކުރަމުންދާ ކަމަށާއި، ކުރިއަށް އޮތް ދުވަސްތަކުގައިވެސް މާލެއާއި އަތޮޅުތަކުގައި މަސްތުވާތަކެތީގެ ވިޔަފާރިކުރާ ތަންތަން ހުއްޓުވުމަށް އޮޕަރޭޝަންތައް ހިންގަމުންދާނެ ކަމަށެވެ.
ކޮމެންޓު ފޮނުވާ