މަސްތުވާތަކެތީގެ މައްސަލައިގައި ބޭރުގައުމުތަކުގައި ދިވެހިން ތިބެގެން ރާއްޖެއަށް ޑްރަގު ފޮނުވުމުގެ މައްސަލަ އިތުރުވެފައިވާކަން ފުލުހުން ހާމަކޮށްފިއެވެ. ޑްރަގް އެންފޯސްމަންޓުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޗީފް އިންސްޕެކްޓަރ އޮފް ޕޮލިސް އަޙްމަދު ނާއިފް ވިދާޅުވީ ސަރަހައްދީ ގައުމުތަކުގައި ދިވެހިން ގާއިމުވެ ތިބެގެން އެއަރކާގޯ އާއި ސީކާގޯ މެދުވެރިކޮށް އަދި އިލެކްޓްރިކް ސާމާނުތަކުގައި މަސްތުވާތަކެތި ފޮރުވައިގެން ރާއްޖެއަށް ފޮނުވަމުންދާކަމަށެވެ. ދުނިޔޭގެ ކޮންމެ ސަރަހައްދެއްގައި ތިބެގެން ޖިނާއީ ކުށް ކުރާ ދިވެހިންނަށް އިންޓަޕޯލް ރެޑް ނޯޓިސް ނެރެގެންވިޔަސް އެމީހުން ރާއްޖެ ގެނެސްގެން ތަހުގީގު ހިންގާނެކަމަށް ނާއިފް ވިދާޅުވިއެވެ.
މި އަހަރުގެ މިހާތަނަށް މުޅި ރާއްޖޭގައި މަސްތުވާތަކެއްޗާ ދެކޮޅަށް ހިންގި 6،860 އޮޕަރޭޝަންގައި 498.99 ކިލޯގްރާމުގެ މަސްތުވާތަކެތި ހިފަހައްޓާފައިވާއިރު މި ތަކެތީގެ މަގުމަތީ އަގު 871.24 މިލިއަން ރުފިޔާއަށް އަރާކަމަށް ފުލުހުން ހާމަކުރިއެވެ. މި މަސައްކަތްތަކުގެ ނަތީޖާއެއްގެ ގޮތުން 193 މީހުން ހައްޔަރުކޮށް 1،130 ތަން ބަންދުކޮށްފައިވާއިރު 16،024 މީހުން ބަލައިފާސްކޮށް 39 ރަށެއްގައި 500 އަށްވުރެ ގިނަ ފުލުހުން ހަރަކާތްތެރިވެފައިވާކަމަށްވެސް ބައްދަލުވުމުގައި ހާމަކުރެވުނެވެ.
ކޮމެންޓު ފޮނުވާ