ރާއްޖޭގެ ރަށްރަށުގައި ބޮޑެތި އެއާޕޯޓު އެޅުމުގެ ބަދަލުގައި، ކުދި މަތިންދާބޯޓު ޖެއްސޭ ވަރުގެ އެއާސްޓްރިޕް ހެދުމާ ގުޅޭ ގޮތުން ސަރުކާރުން ދިރާސާކުރަމުން އަންނަ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ޒުވާނުންނާ އެކު ބޭއްވި "ޔޫތު ކޮފީ ވިތު ޕްރެޒިޑެންޓް" ހަފުލާގައި ވާހަކަދައްކަވަމުން ރައީސް ވިދާޅުވީ، ސީޕްލޭން ސާވިސް ރޭގަނޑު ނުދެވުމަކީ މިހާރު އޮތް އެންމެ ބޮޑު ގޮންޖެހުން ކަމަށެވެ. މިކަމަށް ހައްލެއް ހޯދުމުގެ ގޮތުން، ބިން އޮތް ރަށްރަށުގައި ގާތްގަނޑަކަށް 600 މީޓަރުގެ އެއާސްޓްރިޕް ހަދައިގެން، ފުރޮޅުލީ ކުދި ބޯޓުފަހަރު ޖެއްސޭނެ އިންތިޒާމު ހަމަޖެއްސިދާނެ ކަމަށް އެ މަނިކުފާނު ވިދާޅުވިއެވެ.
ކޮންމެ ރަށަކުން 30 މިނެޓުން ދެވޭ ހިސާބުގައި އެއާޕޯޓެއް ގާއިމްކުރުމަކީ މި ސަރުކާރުގެ އަމާޒެކެވެ. އެހެން ނަމަވެސް، ކައިރި ކައިރީގައި ގިނަ އެއާޕޯޓު އެޅުމުން މާލީ ގޮތުން ދެކޮޅު ނުޖެހިދާނެ ކަމުގެ ކަންބޮޑުވުން އެކި ފަރާތްތަކުން ފާޅުކޮށްފައިވެއެވެ. ރައީސް ވިދާޅުވި ގޮތުގައި، މި ދިރާސާގެ ތެރެއިން ބޮޑު ހަރަދެއް ނުކޮށް ރޭގަނޑު ވެސް ވައިގެ މަގުން ދަތުރުކުރެވޭނެ ނިޒާމެއް ގާއިމްކުރެވޭނެއެވެ.
ކޮމެންޓު ފޮނުވާ