ހުޅުމާލޭގެ މަގުތަކުގައި ހަރުކޮށްފައިވާ ސްޕީޑް ބަމްޕަރުތަކާމެދު އާންމުންގެ ޝަކުވާ ބޮޑުވެ، ފަހުން އެ ބަމްޕަރުތައް ނެގުމަށްފަހު، ފުލުހުން މިއަދު ބުނެފައިވަނީ އެ ބަމްޕަރުތަކަކީ ދުނިޔޭގެ އެހެން ގައުމުތަކުގައި ވެސް ބޭނުންކުރާ ސްޓޭންޑަޑް ބަމްޕަރުތަކެއް ކަމަށެވެ. ރޯޑް ސޭފްޓީ އެވެއާނަސް އެންޑް ޕްރިވެންޝަން ހެޑް، ސުޕްރިންޓެންޑެންޓް އޮފް ޕޮލިސް އަޙްމަދު ފަޞީހް ނޫސްވެރިންނާ ބައްދަލުކުރައްވައި ވިދާޅުވީ މައްސަލައަކީ ބަމްޕަރު ނޫން ކަމަށާއި، މައްސަލައަކީ އުސޫލުގެ ތެރެއިން އަމަލުކުރަން ބައެއް ދިވެހީންނަށް ދަތިވުން ކަމަށެވެ.
ފަސީހް ވިދާޅުވީ ހުޅުމާލޭގައި ބަމްޕަރު އެޅުމުގެ ކުރިން އެޗްޑީސީއާ އެކު މަޝްވަރާކޮށް، ބަމްޕަރުތަކުގެ ސައިޒާއި ސްޓޭންޑަޑްތަކުގެ މައުލޫމާތު ހިއްސާކޮށްފައިވާ ކަމަށެވެ. އަދި އެ ބަމްޕަރުތަކަކީ ރާއްޖޭގައި ހައްދާފައި ގެނައި އެއްޗެއް ނޫންކަމަށާއި، ބައިނަލްއަގުވާމީ ގޮތުން ބޭނުންކުރާ ބަމްޕަރުތަކެއް ކަމަށް އޭނާ ފާހަގަކުރެއްވިއެވެ. ނިރޮޅުމަގުގައި ބަމްޕަރު އެޅުމުން އެކްސިޑެންޓް މަދުވެފައިވާކަން ފާހަގަވާ ކަމަށް ބުނެ، ފަސީހް ވިދާޅުވީ ބަމްޕަރަށް އަރާއިރު ސްޕީޑް ރަނގަޅަށް މަޑުކުރާނަމަ އެއްވެސް އުނދަގުލެއް ނުވާނެ ކަމަށެވެ. ނަމަވެސް ރައްޔިތުންގެ ޝަކުވާއަށް ރިއާޔަތްކޮށް، އެމީހުންނަށް ތަކުލީފުވާތީ އެ ބަމްޕަރުތައް ނެގީ ކަމަށް އޭނާ ވިދާޅުވިއެވެ.
މީގެ އިތުރުން ފަސީހް ރައުންޑްއެބައުޓްތަކާމެދު ފާޅުވި ނުރުހުންތަކަށް ރައްދު ދެއްވައި، އެއީ ވެސް ރަނގަޅު ގޮތުގައި ބޭނުންކުރާނަމަ ރައްކާތެރި އަދި ފަސޭހަ ގޮތެއް ކަމަށް ވިދާޅުވިއެވެ. ނަމަވެސް މަޑުކޮށްލައިގެން ރަނގަޅަށް ދިއުމަކީ ބައެއް މީހުންނަށް ޝަކުވާއަކަށް ވިޔަސް، މާލެ ހުޅުމާލެ ފަދަ އާބާދީ ބޮޑު ސަރަހައްދުތަކުގައި ސްޕީޑް ކޮންޓްރޯލްކުރުމަކީ ލާޒިމު ކަމެއް ކަމަށް އޭނާ ވަނީ ފާހަގަކުރައްވައިފައެވެ.
ކޮމެންޓު ފޮނުވާ