ހުޅުމާލޭ ފޭސް އެކެއްގެ ރަޔިތުންނާ ބައްދަލުކުރައްވައި، ރައީސް ޑރ. މުހައްމަދު މުއިއްޒު ވިދާޅުވީ ބޯހިޔާވަހިކަމުގެ މައްސަލަ ހައްލުކުރުމަށް މި ސަރުކާރުން މަސައްކަތްކުރަނީ އިހުލާސްތެރިކަމާއެކު ކަމަށާއި، އެއީ ރިޔާސީ އިންތިހާބެއް ގާތްވުމުން ހައްލުކުރަން އޮތް ކަމެއް ނޫންކަމަށެވެ.
ރެހެންދި ސްކޫލުގައި ރޭ ބޭއްވި ބައްދަލުވުމުގައި ރައީސް ވިދާޅުވީ، މީގެކުރީގެ އެއްވެސް ސަރުކާރަކުން ބޯހިޔާވަހިކަމުގެ މަޝްރޫއުތައް ނުފަށާހާ އަވަހަށް މި ސަރުކާރުން އެފަދަ މަޝްރޫއުތައް ފަށާފައިވާ ކަމަށެވެ. މިހާރު ރާއްޖޭގެ އެކި ކަންކޮޅުތަކުގައި ބޯހިޔާވަހިކަމުގެ މަޝްރޫއުތައް ކުރިއަށްގެންދަން ސޮއިކޮށްފައިވާއިރު، މި މަސް ނިމުމުގެ ކުރިން މާލެ ސަރަހައްދުގައި ވެސް ބޯހިޔާވަހިކަމުގެ މަޝްރޫއުތަކެއް ފެށުމަށް ސޮއިކުރުމަށް ތައްޔާރުވަމުންދާކަން ރައީސް ފާހަގަކުރެއްވި އެވެ.
ރައީސް ވިދާޅުވީ މި މަޝްރޫއުތައް ނިމިގެންދާއިރު މުޅި ރާއްޖޭގެ ބޯހިޔާވަހިކަމަށް ދާއިމީ ހައްލެއް އައިސްފައި އޮންނާނެ ކަމަށެވެ. އަދި 2040 ވަނަ އަހަރާ ހަމައަށް ރާއްޖެ ތަރައްގީކުރުމަށް 20 އަހަރުގެ މާސްޓަޕްލޭނެއް ހަދައި، ނެޝަނަލް ޑިވެލޮޕްމަންޓް ޕްލޭނަށް ގާނޫނީ ބާރުވެރިކަން ދިނުމުގެ މަސައްކަތްވެސް ކުރިއަށްދާކަން ރައީސް ބުނެލެއްވި އެވެ. ރައީސްގެ ވާހަކަފުޅުގައި، ރާއްޖޭގެ އިގްތިސާދު ވެއްޓިފައި އޮތް އަނދަވަޅުން ނެގުމަށްޓަކައި މަސައްކަތްކުރަމުން، ސަރުކާރުން ޑިފޯލްޓް ނުވެ، ފައިސާ ޗާޕު ނުކޮށް، ރާއްޖޭގެ އެތެރެއާއި ބޭރުގެ ދަރަނިތައް އަދާކުރަމުންދާކަމަށްވެސް ފާހަގަކުރެއްވި އެވެ.
ކޮމެންޓު ފޮނުވާ